(ຄະນະຜູ້ແທນຂັ້ນສູງຄະນະກຳມະການສູນກາງແນວໂຮມປະເທດຊາດ
ຫວຽດນາມ ເຮັດວຽກກັບການນຳສະຖາບັນສັງຄົມ)
(vovworld) – ໃນລະຫວ່າງວັນທີ 06/06 – 08/06 ທ່ານ ຫງວຽນທ້ຽນເຍີນ ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ນຳໜ້າຄະນະຜູ້ແທນຂັ້ນສູງຄະນະກຳມະການສູນກາງແນວໂຮມປະເທດຊາດ ຫວຽດນາມ ເດີນທາງໄປຢ້ຽມຢາມ ແລະ ເຮັດວຽກຢູ່ ສະຫະພັນ ລັດເຊຍ.
ວັນທີ 06/06 ຢູ່ນະຄອນຫລວງ ມົດສະກູ ຄະນະຜູ້ແທນ ຫວຽດນາມ ໄດ້ເຮັດວຽກກັບສະພາສະຫະພັນ ລັດເຊຍ. ທີ່ການຕ້ອນຮັບຄະນະ, ທ່ານ Evgheni Busmin ຮອງປະທານສະພາສະຫະພັນ ລັດເຊຍ ໄດ້ສະແດງຄວາມເຊື່ອໝັ້ນຕໍ່ພາລະກິດປ່ຽນໃໝ່ ແລະ ສ້າງສາປະເທດຊາດ ເຊິ່ງປະຊາຊົນ ຫວຽດນາມ ພວມປະຕິບັດຢ່າງມີໄຊ ໃນນັ້ນມີການປະກອບສ່ວນອັນໃຫຍ່ຫລວງຂອງແນວໂຮມປະເທດຊາດ ຫວຽດນາມ. ທ່ານ Evgheni Busmin ເນັ້ນໜັກວ່າ: ເລື່ອງຮັກສາ ແລະ ພັດທະນາການພົວພັນຄູ່ຮ່ວມມືຍຸດທະສາດຮອບດ້ານກັບ ຫວຽດນາມ ແມ່ນແຜນນະໂຍບາຍຂອງສະຫະພັນ ລັດເຊຍ ເພື່ອແນໃສ່ເພີ່ມທະວີການພົວພັນກັບພາກພື້ນອາຊີ - ປາຊີຟິກ. ສ່ວນທ່ານ ຫງວຽນທ້ຽນເຍີນ ຊີ້ແຈ້ງວ່າ:
“ການພົວພັນລະຫວ່າງ ຫວຽດນາມ ແລະ ສະຫະພັນ ລັດເຊຍ ແມ່ນການພົວພັນເພື່ອນມິດທີ່ເປັນມູນເຊື້ອ ນັບແຕ່ກ່ວາເຄິ່ງສະຕະວັດມານີ້ ແລະ ປະຈຸບັນເປັນຄູ່ຮ່ວມມືຍຸດທະສາດຮອບດ້ານ, ມີການພົວພັນແບບພິເສດ. ເມື່ອການນຳຂັ້ນສູງຂອງ 2 ປະເທດພົບປະກັນແຕ່ລະຄັ້ງ ກໍ່ແມ່ນໂອກາດເພື່ອໃຫ້ພວກເຮົາຢັ້ງຢືນນ້ຳໃຈອັນດີງາມທີ່ມີຕໍ່ກັນໃນອະດີດ ແລະ ຕັດສິນໃຈເຮັດໃຫ້ການພົວພັນນັບມື້ນັບດີງາມກ່ວາອີກ”.
ວັນທີ 07/06 ຄະນະຜູ້ແທນຂັ້ນສູງຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ເຮັດວຽກກັບການນຳສະຖາບັນສັງຄົມ ແລະ ແນວໂຮມປະຊາຊົນທົ່ວປະເທດ ລັດເຊຍ ຊຶ່ງແມ່ນອົງການທີ່ມີພາລະໜ້າທີ່ຄ້າຍຄືກັບແນວໂຮມປະເທດຊາດ ຫວຽດນາມ.