ທ່ານປະທານປະເທດ ເຈີນດ້າຍກວາງກ່າວປາໄສທີ່ກອງປະຊຸມສຸດຍອດບັນດາປະເທດໃຊ້ພາສາຝະລັ່ງຄັ້ງທີ 16 |
(vovworld)- ຕອນເຊົ້າວັນທີ 26/11, ຕາມເວລາທ້ອງຖິ່ນ, ຢູ່ Antananarivo, Madagascar ໄດ້ໄຂກອງປະຊຸມສຸດຍອດບັນດາປະເທດໃຊ້ພາສາຝະລັ່ງຄັ້ງທີ 16 ຂຶ້ນຊຶ່ງມີການເຂົ້າຮ່ວມຂອງບັນດາປະທານາທີບໍດີ, ນາຍົກລັດຖະມົນຕີ ແລະ ບັນດາດານນຳຂັ້ນສູງຂອງ 80 ປະເທດສະມາຊິກຂອງອົງການພາສາຝະລັ່ງສາກົນ. ທີ່ກອງປະຊຸມ, ທ່ານປະທານປະເທດຫວຽດນາມ ເຈີນດ້າຍກວາງໄດ້ກ່າວບົດປາໄສໄຂກອງປະຊຸມ. ຂຶ້ນຕົ້ນບົດປາໄສ, ທ່ານປະທານປະເທດຫວຽດນາມ ເຈີນດ້າຍກວາງໄດ້ສົ່ງຄຳແບ່ງປັນຄວາມເສົ້າສະລົດໃຈຢ່າງເລິກເຊິ່ງມາຍັງລັດ ແລະ ປະຊາຊົນກູບາຕໍ່ການເຖິງແກ່ມໍລະນະກຳຂອງຜູ້ນຳກູບາ Fidel Castro.
ກ່າວຄຳເຫັນທີ່ພິທີໄຂ, ທ່ານປະທານປະເທດຫວຽດນາມ ເຈີນດ້າຍກວາງ ໄດ້ເນັ້ນໜັກວ່າ ຫວຽດນາມຊົມເຊີຍປະຊາຄົມບັນດາປະເທດໃຊ້ພາສາຝະລັ່ງຊຶ່ງໄດ້ມານະພະຍາຍາມຊຸກຍູ້ການສ້າງຄວາມມີຫຼາຍຮູບຫຼາຍສີທາງດ້ານພາສາ, ວັດທະນະທຳ, ຮັກສາສີສັນວັດທະນະທຳແຫ່ງຊາດໃນສະພາວະໂລກາພິວັດ, ເພີ່ມທະວີການຮ່ວມມືທາງດ້ານເສດຖະກິດລະຫວ່າງບັນດາປະເທດໃນໂລກ. ທ່ານປະທານປະເທດຫວຽດນາມ ເຈີນດ້າຍກວາງ ຖືວ່າ ໂດຍແມ່ນສະມາຊິກອັນຕັ້ງໜ້າ ແລະ ມີຄວາມຮັບຜິດຊອບຂອງ ປະຊາຄົມບັນດາປະເທດໃຊ້ພາສາຝະລັ່ງ, ຫວຽດນາມເປັນເຈົ້າການເຂົ້າຮ່ວມການຜັນຂະຫຍາຍບັນດາຍຸດທະສາດ, ໂຄງການຮ່ວມມືຂອງປະຊາຄົມ, ປະກອບສ່ວນສຳຄັນເຂົ້າໃນການປັບປຸງນ້ຳໃຈສາມັກຄີ ແລະ ຄວາມເປັນເອກະພາບພາຍໃນກຸ່ມ, ເປີດກ້ວາງການຮ່ວມມືລະຫວ່າງບັນດາປະເທດສະມາຊິກ, ຜ່ານນັ້ນ ປະກອບສ່ວນເຂົ້າໃນຄວາມຈະເລີນວັດທະນາລວມ.
ທ່ານປະທານປະເທດຫວຽດນາມ ເຈີນດ້າຍກວາງສະເໜີປະຊາຄົມບັນດາປະເທດໃຊ້ພາສາຝະລັ່ງຊຸກຍູ້ ແລະ ໜູນຊ່ວຍການຜັນຂະຫຍາຍໂຄງການດຳເນີນງານ 2030 ແລະ ຂໍ້ຕົກລົງປາຣີກ່ຽວກັບການປ່ຽນແປງຂອງດິນຟ້າອາກາດ, ສ້າງບັນດາການພົວພັນຄູ່ຮ່ວມມືທົ່ວໂລກ, ຮັບປະກັນແຫຼ່ງກຳລັງ….
ກ່ຽວກັບບັນຫາຕາເວັນຕາເວັນອອກ, ທ່ານປະທານປະເທດຫວຽດນາມ ເຈີນດ້າຍກວາງສະເໜີວ່າ : ຫວຽດນາມຫວັງວ່າ ປະຊາຄົມບັນດາປະເທດໃຊ້ພາສາຝະລັ່ງສືບຕໍ່ມີສຽງເວົ້າຢ່າງພາວະວິໄສກ່ຽວກັບທະເລຕາເວັນອອກ, ຮຽກຮ້ອງບັນດາຝ່າຍທີ່ກ່ຽວຂ້ອງບໍ່ນຳໃຊ້ກຳລັງອາວຸດຫຼືນາບຂູ່ນຳໃຊ້ກຳລັງອາວຸດ, ແກ້ໄຂການຂັດແຍ້ງດ້ວຍມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ພ້ອມກັບບັນດາຝ່າຍທີ່ກ່ຽວຂ້ອງປະຕິບັດຕາມຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (DOC), ກ້າວໄປສູ່ການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (COC).
ທ່ານປະທານປະເທດຫວຽດນາມ ເຈີນດ້າຍກວາງຢືນຢັນວ່າ ຫວຽດນາມພ້ອມແລ້ວເປັນຂົວເຊື່ອມຕໍ່ຂອງ ປະຊາຄົມບັນດາປະເທດໃຊ້ພາສາຝະລັ່ງກັບປະຊາຄົມອາຊຽນ ແລະ ອາຊີ-ປາຊີຟິກ ເພື່ອຮ່ວມແຮງຮ່ວມໃຈເພື່ອໂລກແຫ່ງສັນຕິພາບ, ສະຖຽນລະພາບ ແລະ ພັດທະນາແບບຍືນຍົງ.