(vovworld) – ຕອນບ່າຍວັນທີ 11/4, ຢູ່ສຳນັກງານປະທານປະເທດ, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ໃຫ້ການຕ້ອນຮັບຄະນະປະຕິບັດງານລັດຖະບານ ສະໂລວັກ ໂດຍທ່ານ Pavol Pavlis, ຮອງລັດຖະມົນຕີກະຊວງເສດຖະກິດ ເປັນຫົວໜ້າຄະນະ. ທີ່ການຕ້ອນຮັບ, ທ່ານປະທານປະເທດ ຢືນຢັນວ່າ: ຫວຽດນາມ ຢາກຍູ້ແຮງການຮ່ວມມືເສດຖະກິດລະຫວ່າງ 2 ປະເທດ. ຫວຽດນາມ ພ້ອມແລ້ວທີ່ສ້າງທຸກໆເງື່ອນໄຂເພື່ອຊຸກຍູ້ການລົງທຶນຂອງ ສະໂລວັກ ຢູ່ ຫວຽດນາມ.
ທ່ານຮອງລັດຖະມົນຕີກະຊວງເສດຖະກິດ ສະໂລວັກ Pavol Pavlis ຢືນຢັນຄວາມປາດຖະໜາຢາກເປີດກ້ວາງການລົງທຶນຢູ່ ຫວຽດນາມ. ສະໂລວັກ ຢາກແບ່ງປັນບົດຮຽນ ແລະ ຮ່ວມມືກັບ ຫວຽດນາມ ໃນຂົງເຂດພະລັງງານ, ພິເສດແມ່ນພະລັງງານປະລະມານູ, ກະສິກຳ ແລະ ພັດທະນາຊົນນະບົດ, ອຸດສາຫະກຳປ້ອງກັນປະເທດ.
ແລະກໍ່ໃນວັນດຽວກັນ, ທ່ານຮອງລັດຖະມົນຕີການຕ່າງປະເທດ ຫວຽດນາມ ໂຮ່ຊວນເຊີນ ແລະ ຮອງລັດຖະມົນຕີການຕ່າງປະເທດ ສ. ສະໂລວັກ Peter Burian ໄດ້ດຳເນີນການທາບທາມຄວາມເຫັນດ້ານການເມືອງ. ທີ່ການທາບທາມຄວາມເຫັນ, 2 ຝ່າຍໄດ້ປະກາດໃຫ້ກັນຊາບກ່ຽວກັບສະພາບການເສດຖະກິດ - ການເມືອງຂອງແຕ່ລະປະເທດ, ປຶກສາຫາລືກ່ຽວກັບບັນດາມາດຕະການເພີ່ມທະວີການພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງ 2 ປະເທດໃນຂົງເຂດຕ່າງໆຄື: ການເມືອງ - ການຕ່າງປະເທດ, ເສດຖະກິດ - ການຄ້າ - ການລົງທຶນ, ການສຶກສາ - ບຳລຸງສ້າງ, ວັດທະນະທຳ - ການທ່ອງທ່ຽວ, ແລກປ່ຽນທັດສະນະກ່ຽວກັບບາງບັນຫາພາກພື້ນ ແລະ ສາກົນເຊິ່ງຕ່າງຝ່າຍຕ່າງມີຄວາມສົນໃຈ. ຮອງນາຍົກລັດຖະມົນຕີ ທັງ 2 ທ່ານພ້ອມກັນຢືນຢັນຄວາມຕັດສິນໃຈສືບຕໍ່ຮ່ວມມືກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສສາກົນ. ຮອງລັດຖະມົນຕີ 2 ທ່ານ ຕີລາຄາສູງໝາກຜົນແຫ່ງການຮ່ວມມືລະຫວ່າງກະຊວງການຕ່າງປະເທດໃນໄລຍະຜ່ານມາ ແລະ ເຫັນດີເພີ່ມທະວີກົນໄກທາບທາມຄວາມເຫັນການເມືອງເປັນປະຈຳກ່ວາອີກ ເພື່ອແນໃສ່ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນ 2 ຝ່າຍ.