ປະທານປະເທດ ເຈືອງເຕີນຊາງ ຕ້ອນຮັບຜູ້ອຳນວຍການບໍລິຫານກອງທຶນ UNICEF
ປະທານປະເທດ ຫວຽດນາມ ເຈືອງເຕີນຊາງ ແລະ ທ່ານ Anthony Lake ຜູ້ອຳນວຍການບໍລິຫານກອງທຶນເຍົາວະຊົນສະຫະປະຊາຊາດ UNICEF
(ພາບ: baomoi.com)
(vovworld) – ຕອນບ່າຍວັນທີ 29/5, ຢູ່ສຳນັກງານປະທານປະເທດ, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ໃຫ້ການຕ້ອນຮັບຜູ້ອຳນວຍການບໍລິຫານກອງທຶນເຍົາວະຊົນສະຫະປະຊາຊາດ UNICEF ທ່ານ Anthony Lake, ທີ່ພວມຢູ່ຢ້ຽມຢາມ ຫວຽດນາມ ຢ່າງເປັນທາງການ ແລະ ເຂົ້າຮ່ວມພິທີປະກາດທົ່ວໂລກບົດລາຍງານຂອງ UNICEF ກ່ຽວກັບ “ສະພາບການເດັກນ້ອຍໂລກປີ 2013”. ນະທີ່ນີ້, ທ່ານປະທານປະເທດ ຫວຽດນາມ ເນັ້ນໜັກວ່າ: ຍາມໃດລັດ ຫວຽດນາມ ກໍ່ສະຫງວນບຸລິມະສິດໃຫ້ແກ່ເລື່ອງເບິງແຍງດູແລ, ສຶກສາ ແລະ ປົກປ້ອງເດັກນ້ອຍ, ເອົາໃຈໃສ່ປະຕິບັດບັນດາຄຳໝັ້ນສັນຍາສາກົນຢ່າງຄົບຖ້ວນ. ທ່ານປະທານປະເທດ ຢືນຢັນວ່າໜຶ່ງໃນບັນດາຈຸດໝາຍສຳຄັນຂອງວິວັດການພັດທະນາເສດຖະກິດ - ສັງຄົມໃນປະຈຸບັນແມ່ນສ້າງສຳເລັດກອບກົດໝາຍ, ສ້າງລະບົບນິຕິກຳສະດວກໃຫ້ແກ່ການພັດທະນາຂອງເດັກນ້ອຍ. ທ່ານປະທານປະເທດ ເຈືອງເຕີນຊາງ ສະເໜີໃຫ້ UNICEF ສືບຕໍ່ຕັ້ງໜ້າໜູນຊ່ວຍ, ພິເສດແມ່ນໃນບັນດາຂົງເຂດສ້າງກົນໄກ, ນະໂຍບາຍ, ເພີ່ມທະວີການສຳຜັດກັບບັນດາການບໍລິການທີ່ຈຳເປັນ, ຕິດຕາມກວດກາເລື່ອງປົກປ້ອງ ແລະ ຊຸກຍູ້ສິດຂອງເດັກນ້ອຍ... ພ້ອມທັງ, ເອົາໃຈໃສ່ເຂົ້າຮ່ວມການໜູນຊ່ວຍເດັກພິການໃຫ້ຫຼາຍກ່ວາອີກ, ໃນນັ້ນມີບັນດາຜູ້ປະສົບເຄາະຮ້າຍຈາກທາດພິດສີສົ້ມ ແລະ ຜູ້ປະສົບເຄາະຮ້າຍຈາກລູກລະເບີດໝາກມິ່ນທີ່ຍັງຕົກຂ້າງພາຍຫຼັງສົງຄາມ.
ທ່ານຜູ້ອຳນວຍການຝ່າຍບໍລິຫານ UNICEF Anthony Lake ສະແດງຄວາມປາດຖະໜາຢາກຊຸກຍູ້ສາຍພົວພັນຮ່ວມມືອັນດີງາມ ແລະ ຍາວນານກັບ ຫວຽດນາມ, ສືບຕໍ່ໜູນຊ່ວຍຫວຽດນາມ ເພື່ອແນໃສ່ປະຕິບັດບັນດາຈຸດໝາຍພັດທະນາເສດຖະກິດ - ສັງຄົມ, ຍົກສູງຄວາມໝັ້ນຄົງຂອງບັນດາຜົນງານທີ່ບັນລຸໄດ້ໃນການປະຕິບັດບັນດາຈຸດໝາຍພັດທະນາສະຫັດສະຫວັດ (MDG) ແລະ ສ້າງສຳເລັດບັນດາຈຸດໝາຍທີ່ຍັງເຫຼືອກໍ່ຄືໜູນຊ່ວຍເພີ່ມທະວີວຽກງານເບິ່ງແຍງດູແລ ແລະ ປົກປ້ອງເດັກນ້ອຍ, ພິເສດແມ່ນການພັດທະນາຢ່າງສະໝຳ່ສະເໝີ ລະຫວ່າງບັນດາເຂດ ແລະ ບັນດາກຸ່ມເປົ້າໝາຍ, ເພີ່ມທະວີລະບົບຂໍ້ມູນກ່ຽວກັບເດັກນ້ອຍ, ໜູນຊ່ວຍສ້າງສຳເລັດ, ປັບປຸງກອບກົດໝາຍປົກປ້ອງ ແລະ ເບິ່ງແຍງດູແລເດັກ..