(vovworld) - ຕອນບ່າຍວັນທີ 02/04, ທ່ານປະທານປະເທດເຈືອງເຕີນຊາງ ໄດ້ມອບຂໍ້ຕົກລົງປະດັບຕຳແໜ່ງເອກອັກຄະລັດຖະທູດ ສສ ຫວຽດນາມ ໃຫ້ແກ່ພະນັກງານ, ພາລະກອນກະຊວງການຕ່າງປະເທດ 35 ທ່ານ. ກ່າວຄຳເຫັນທີ່ພິທີ, ທ່ານປະທານປະເທດ ຊີ້ແຈ້ງວ່າ ເລື່ອງ ມອບຂໍ້ຕົກລົງປະດັບຕຳແໜ່ງເອກອັກຄະລັດຖະທູດ ສສ ຫວຽດນາມ ຄັ້ງນີ້ ແມ່ນການຮັບຮູ້ຂອງພັກ ແລະ ລັດທີ່ມີຕໍ່ການປະກອບສ່ວນຂອງບັນດາເອກອັກຄະລັດຖະທູດໃນວຽກງານພົວພັນຕ່າງປະເທດເວົ້າສະເພາະ ແລະ ໃນພາລະກິດພັດທະນາປະເທດຊາດເວົ້າລວມ. ທ່ານປະທານປະເທດຖືວ່າ ບົດບາດຂອງວຽກງານການຕ່າງປະເທດແມ່ນມີຄວາມສຳຄັນທີ່ສຸດເພື່ອຜັນຂະຫຍາຍການປະຕິບັດແນວທາງຂອງກອງປະຊຸມໃຫຍ່ພັກຄັ້ງທີ 11 ກ່ຽວກັບຍຸດທະສາດໄລຍະຍາວທີ່ມີຕໍ່ພາລະກິດສ້າງສາ ແລະ ປົກປັກຮັກສາປະເທດຊາດ.
“ຂະແໜງການຕ່າງປະເທດພວມຢື່ນຢູ່ຕໍ່ໜ້າບັນດາໜ້າທີ່ໜັກໜ່ວງທີ່ສຸດ ແຕ່ກໍເປັນກຽດທີ່ສຸດ. ຂະແໜງການຕ່າງປະເທດຄວນມານະພະຍາຍາມກວ່າອີກ ເພື່ອປັບປຸງສະພາບແວດລ້ອມແຫ່ງສັນຕິພາບໃຫ້ແກ່ການພັດທະນາ, ປະກອບສ່ວນປົກປັກຮັກສາອະທິປະໄຕ, ຜືນແຜ່ນດິນອັນຄົບຖ້ວນ ແລະ ແກ້ໄຂການທ້າທາຍທີ່ມີຕໍ່ຄວາມໝັ້ນຄົງຂອງປະເທດຊາດ. ການຕ່າງປະເທດກໍຄວນເສີມຂະຫຍາຍບົດບາດຂອງກຳລັງທີ່ສຳຄັນອັນດັບໜຶ່ງໃນການປະຕິບັດແຜນນະໂຍບາຍເຊື່ອມໂຍງເຂົ້າກັບສາກົນຢ່າງຮອບດ້ານ, ພະຍາຍາມສະແຫວງຫາທຸກແຫຼ່ງກຳລັງຈາກພາຍນອກ ເພື່ອຮັບໃຊ້ການສ້າງໂຄງປະກອບພື້ນຖານເສດຖະກິດຄືນໃໝ່, ຫັນເປັນປະເທດອຸດສາຫະກຳ ແລະ ທັນສະໄໝ, ຍົກສູງທີ່ຕັ້ງຫວຽດນາມ ໃນເວທີສາກົນ”.