(vovworld) – ເນື່ອງໃນໂອກາດບຸນໄຫວ້ພະຈັນ ປີ 2013, ວັນທີ 19/9, ທ່ານປະທານປະເທດ ເຈືອງເຕີນຊາງ ໄດ້ຝາກຈົດໝາຍເຖິງເຍົາວະຊົນ, ອະນຸຊົນໃນທົ່ວປະເທດ. ຈົດໝາຍມີຕອນຂຽນວ່າ: ເນື່ອງໃນໂອກາດບຸນໄຫວ້ພະຈັນ, ລຸງຝາກເຖິງເຍົາວະຊົນ, ອະນຸຊົນ ໃນທົ່ວປະເທດ, ພວກຫຼານຊາວ ຫວຽດນາມ ອາໄສຢູ່ຕ່າງປະເທດ ແລະ ພວກຫຼານຊາວຕ່າງປະເທດ ຢູ່ ຫວຽດນາມ ນ້ຳໃຈຮັກແພງທີ່ສຸດ. ພັກ, ລັດ ຫວຽດນາມ, ໂຮງຮຽນ, ຄອບຄົວ ແລະ ສັງຄົມ ຍາມໃດກໍ່ສະຫງວນໃຫ້ພວກຫຼານຄວາມເອົາໃຈໃສ່, ການເບິ່ງແຍງດູແລດີທີ່ສຸດ. ທ່ານປະທານປະເທດ ເຈືອງເຕີນຊາງ ສະເໜີໃຫ້ຄະນະພັກ, ອຳນາດການປົກຄອງອົງການຈັດຕັ້ງມະຫາຊົນທຸກຂັ້ນ, ພໍ່ແມ່ນັກຮຽນ ສືບຕໍ່ເອົາໃຈໃສ່ຮັກສາ ແລະ ເສີມຂະຫຍາຍຈຸດດີງາມຂອງວັດທະນະທຳທີ່ເປັນມູນເຊື້ອຂອງບຸນໄຫວ້ພະຈັນ, ປະຕິບັດວຽກງານສຶກສາ, ເບິ່ງແຍງດູແລ ແລະ ປົກປ້ອງເດັກນ້ອຍ, ປະຕິບັດບັນດາສິດຂອງເດັກໃຫ້ນັບມື້ນັບຄົບຖ້ວຍກ່ວາ.
ຕອນຄຳ່ວັນທີ 19/9, ກົງກັບວັນບຸນໄຫວ້ພະຈັນ 15/8 ຕາມຈັນທະປະຕິທິນ, ບັນດາແຂວງ, ນະຄອນໃນທົ່ວປະເທດໄດ້ຈັດຕັ້ງການເຄື່ອນໄຫວຕ່າງໆຕ້ອນຮັບບຸນໄຫວ້ພະຈັນ ໃຫ້ເດັກ. ພະແນກແຮງງານ - ທະຫານເສຍອົງຄະ ແລະ ສັງຄົມ ແຂວງລາຍເຈົາ ໄດ້ຈັດຕັ້ງ “ບຸນໄຫວ້ພະຈັນ” ໃຫ້ເດັກກຳພ້າ, ເດັກພິການ. ຢູ່ແຂວງ ດັກນົງ, ບັນດາເມືອງ ໃນແຂວງໄດ້ຈັດຕັ້ງການເຄື່ອນໄຫວຕ່າງໆໃນວັນບຸນໄຫວ້ພະຈັນໃຫ້ອະນຸຊົນທຸກຍາກນັບພົນຫຼານ, ພິເສດແມ່ນບັນດາຫຼານຢູ່ເຂດຫ່າງໄກຊອກຫຼີກ.
ປະຊາຄົມຊາວ ຫວຽດນາມ ຢູ່ນະຄອນຫຼວງ ວຽງຈັນ, ໄດ້ຈັດຕັ້ງ “ຄຳ່ຄືນບຸນໄຫວ້ພະຈັນ” ດ້ວຍການເຂົ້າຮ່ວມຂອງຜູ້ຕາງໜ້າສະຖານທູດ ຫວຽດນາມ ປະຈຳ ລາວ, ບັນດາອົງການຕາງໜ້າຫວຽດນາມ ແລະ ເຍົາວະຊົນ, ອະນຸຊົນ ເຊິ່ງແມ່ນລູກຫຼານປະຊາຄົມຊາວ ຫວຽດນາມ ຢູ່ ລາວ ນັບພັນຄົນ.
ຢູ່ ລັດເຊຍ, ສະຖານທູດ ຫວຽດນາມ ສົມທົບກັບປະຊາຄົມຊາວ ຫວຽດນາມ ປະຈຳລັດເຊຍ ຈັດຕັ້ງພິທີມອບໃບຍ້ອງຍໍໃຫ້ນັກຮຽນດີເດັ່ນສົກຮຽນ 2012 – 2013 ແລະ ຕ້ອນຮັບບຸນໄຫວ້ພະເຈັນ 2013.