(vovworld) - ຕອນເຊົ້າວັນທີ 25/11, ທ່ານປະທານປະເທດຫວຽດນາມ ເຈືອງເຕີນຊາງ ແລະ ຄະນະສະມາຊິກສະພາແຫ່ງຊາດເຂດເລືອກຕັ້ງທີ 1, ນະຄອນໂຮ່ຈິມິນ, ໄດ້ລົງການພົບປະກັບຜູ້ມີສິດເລືອກຕັ້ງເມືອງ 4, ພາຍຫຼັງກອງປະຊຸມສະໄໝສາມັນເທື່ອທີ 4 ສະພາແຫ່ງຊາດຫວຽດນາມ ຊຸດທີ 13. ທີ່ການພົບປະ, ບັນດາສະມາຊິກສາພາແຫ່ງຊາດນະຄອນໂຮ່ຈິມິນ ໄດ້ລາຍງານກັບຜູ້ມີສິດເລືອກຕັ້ງກ່ຽວກັບການເຄື່ອນໄຫວຕິດຕາມກວດກາຂອງຄະນະສະມາຊິກສະພາແຫ່ງຊາດນະຄອນປີ 2012 ແລະ ບັນດາໝາກຜົນຂອງປະຊຸມສະໄໝສາມັນເທື່ອທີ 4 ສະພາແຫ່ງຊາດຫວຽດນາມ ຊຸດທີ 13 ທີ່ຜ່ານມາ. ກອງປະຊຸມຄັ້ງນີ້ໄດ້ສຳເລັດບັນດາເນື້ອໃນວຽກງານທີ່ວາງອອກ, ສະພາແຫ່ງຊາດໄດ້ປຶກສາຫາລື ແລະ ຕົກລົງບັນດາບັນຫາສຳຄັນຂອງປະເທດຊາດຄື ສະພາບການເສດຖະກິດສັງຄົມປີ 2012 ແລະ ຈຸດໝາຍຂອງປີ 2013. ຮັບເອົາຄຳເຫັນຂອງຜູ້ມີສິດເລືອກຕັ້ງ, ທ່ານ ເຈື່ນຢູຫຼິກ ສະມາຊິກສະພາແຫ່ງຊາດໂຮ່ຈິມິນ ໄດ້ຕີລາຄາສູງບັນດາການປະກອບສ່ວນຂອງຜູ້ມີສິດເລືອກຕັ້ງກ່ຽວກັບຂໍ້ຍັງຄົງຄ້າງທີ່ຍັງບໍ່ທັນໄດ້ຮັບການແກ້ໄຂ, ພິເສດແມ່ນໜ້າທີ່ຮັບຜິດຊອບຂອງຜູ້ນຳໜ້າໃນການແກ້ໄຂການສໍ້ລາດບັງຫຼວງ; ການລົງມະຕິ ແລະ ປ່ອນບັດໄວ້ວາງໃຈທີ່ມີຕໍ່ບັນດາຜູ້ຮັກສາຕຳແໜ່ງເຊິ່ງສະພາແຫ່ງຊາດ, ສະພາປະຊາຊົນໄດ້ເລືອກຕັ້ງ ຫຼື ໃຫ້ສັດຕະຍາບັນ, ບັນຫາຊົດເຊີຍທີ່ດິນ… ບັນດາບັນຫາດັ່ງກ່າວຈະໄດ້ຍື່ນສະເໜີຕໍ່ສະພາແຫ່ງຊາດ ແລະ ບັນດາອົງການທີ່ມີໜ້າທີ່, ໃນຂອບເຂດຮັບຜິດຊອບຂອງຕົນ ແລະ ຈະເຮັດຈົນສຸດຄວາມສາມາດຂອງຕົນເພື່ອຕອບສະໜອງຄວາມໄວ້ເນື້ອເຊື່ອໃຈຂອງຜູ້ມີສິດເລືອກຕັ້ງ. ຕອນບ່າຍວັນດຽວກັນ, ທ່ານປະທານປະເທດ ເຈືອງເຕີນຊາງ ແລະ ບັນດາຜູ້ມີສິດເລືອກຕັ້ງນະຄອນໂຮ່ຈິມິນ, ໄດ້ລົງພົບປະກັບຜູ້ມີສິດເລືອກຕັ້ງເມືອງ 3.