(vovworld) - ຕອນເຊົ້າວັນທີ 15/3, ຢູ່ເຂດປູຊະນີຍະສະຖານຄ້າຍຄຸ້ມຂັງນັກໂທດກອມມູນິດ ຫວຽດນາມ ຢູ່ ຟູ໋ກວກ, ແຂວງ ກຽນຢາງ ພ້ອມກັບຄະນະຕິດຕໍ່ພົວພັນນັກໂທດການເມືອງ ຫວຽດນາມ ໄດ້ຈັດຕັ້ງງານພົບປະສັງສັນສະເຫຼີມສະຫຼອງ 40 ປີແຫ່ງວັນໄຊຊະນະ ແລະ ພິທີອາໄລຫາບັນດານັກຮົບເສຍສະຫຼະຊີວິດເພື່ອຊາດຢູ່ ຟູ໋ກວກ. ມີຜູ້ແທນກ່ວາ 1.500 ທ່ານແມ່ນນັກໂທດກອມມູນິດ ຫວຽດນາມ ຢູ່ ຄຸກ ຟູ໋ກວກ ໄດ້ເຂົ້າຮ່ວມງານພົບປະສັງສັນ. ແຕ່ປີ 1967 ຮອດປີ 1973, ມີນັກຮົບກ່ວາ 4000 ຄົນ ໄດ້ເສຍສະຫຼະຊີວິດຢ່າງອົງອາດກ້າຫານຢູ່ ຄຸກ ຟູ໋ກວກ. ກ່າວຄຳເຫັນທີ່ງານພົບປະສັງສັນ, ທ່ານປະທານປະເທດ ເຈືອງເຕີນຊາງ, ກໍ່ແມ່ນໜຶ່ງໃນບັນດາອະດີດນັກຮົບກອມມູນິດຢູ່ ຟູ໋ກວກ ໄດ້ເວົ້າດ້ວຍຄວາມສະເທືອນໃຈວ່າ:
“ເມື່ອຮັບຄຳເຊື້ອເຊີນເຂົ້າຮ່ວມງານພົບປະສັງສັນຄັ້ງນີ້, ຂ້າພະເຈົ້າຮູ້ສຶກສະເທືອນໃຈ ແລະ ຕື້ນຕັນໃຈຫຼາຍ, ຫວນຄືນກ່ວາ 40 ປີກ່ອນຢູ່ທີ່ນີ້, ອ້າຍນ້ອງເຮົາຕ້ອງດຳລົງຊີວິດໃນຄວາມລຳບາກກາກກຳ. ຍາມໃດທຳມະໂລງ ສາລະວັດຄວບຄຸມຄຸກ ກໍ່ພ້ອມແລ້ວທີ່ທໍລະມານ, ປາບປາມນັກໂທດ. ຄາວນັ້ນ, ອາຍຸຂອງພວກເຮົາຍັງໜຸ່ມແໜ້ນຫຼາຍ ແຕ່ພາຍໃຕ້ການນຳພາຢ່າງສະຫຼາດສະຫຼຽວຂອງຄະນະພັກ, ໜ່ວຍພັກໃນຄຸກ, ອ້າຍນ້ອງໄດ້ສາມັກຄີເປັນກຸ່ມກ້ອນທີ່ໝັ້ນຄົງ, ຕໍ່ສູ້ຢ່າງອົງອາດກ້າແກ່ນ, ພ້ອມແລ້ວທີ່ຈະເສຍສະຫຼະຊີວິດເພື່ອຊາດ.”
ທ່ານປະທານປະເທດ ຮຽກຮ້ອງໃຫ້ບັນດາທ້ອງຖິ່ນຕ້ອງເບິ່ງແຍງດູແລໃຫ້ອະດີດນັກໂທດກອມມູນິດ. ແລະກໍ່ໃນຕອນເຊົ້າວັນດຽວກັນ, ທ່ານປະທານປະເທດ ໄດ້ຕັດແຖບຜ້າສະຫຼອງໄລຍະ 1 ເຂດປູຊະນີຍະສະຖານປະຫວັດສາດ ຄ້າຍຄຸ້ມຂັງນັກກອມມູນິດ ຫວຽດນາມ ຢູ່ ຟູ໋ກວກ.