(vovworld) - ຕອນເຊົ້າວັນທີ 21/01, ທ່ານປະທານປະເທດ ເຈືອງເຕີນຊາງ ຢ້ຽມຢາມ ແລະ ອວຍພອນປີໃໝ່ພະນັກງານ, ນັກຮົບຕຳຫຼວດນະຄອນຮ່າໂນ້ຍ, ທ່ານປະທານປະເທດ ສະເໜີໃຫ້ຕຳຫຼວດນະຄອນຫຼວງ ຍູ້ແຮງຂະບວນການທົ່ວປວງຊົນປົກປັກຮັກສາຄວາມສະຫງົບແຫ່ງຊາດ; ສືບຕໍ່ປ່ຽນໃໝ່ບັນດາຂົງເຂດວຽກງານຢ່າງຮອບດ້ານ, ປ່ຽນໃໝ່ສະຕິຮັບຮູ້ ແລະ ຈິນຕະນາການດ້ານກົດໝາຍ, ວິຊາການ, ກຳໄດ້ສະພາບການເຄື່ອນໄຫວຂອງອາດຊະຍາກຳ, ເປັນເຈົ້າການປ້ອງກັນຕ້ານ, ຕັ້ງໜ້າບຸກໂຈມຕີ ແລະ ບຸກໂຈມຕີຢ່າງລຽນຕິດ ເພື່ອເຮັດໃຫ້ທຸກກົນອຸບາຍມ້າງທຳລາຍຂອງບັນດາອິດທິກຳລັງທີ່ເປັນປໍລະປັກປະລາໄຊ; ສ້າງກຳລັງຕຳຫຼວດນະຄອນຫຼວງໃຫ້ປອດໄສ, ໝັ້ນຄົງເຂັ້ມແຂງຢ່າງແທດຈິງ, ເປັນແບບຢ່າງກ່ຽວກັບຈິດໃຈຮັບຜິດຊອບໜ້າທີ່ຮັບໃຊ້ປະຊາຊົນ, ກ່ຽວກັບສະຕິຈັດຕັ້ງ, ປະຕິບັດກົດລະບຽບວິໄລ, ກ່ຽວກັບນ້ຳໃຈເພື່ອນສະຫາຍ, ຕອບສະໜອງຄວາມຮຽກຮ້ອງຕ້ອງການຂອງໜ້າທີໃນສະພາບການໃໝ່.
ເມື່ອຢ້ຽມຢາມກອງພັນໃຫຍ່ຕຳຫຼວດເຄື່ອນທີຕາເວັນອອກພາກເໜືອ, ທ່ານປະທານປະເທດ ເຈືອງເຕີນຊາງ ໄດ້ຮັບຮູ້ການອຸທິດສ່ວນ, ການເສຍສະຫຼະຊີວິດຂອງພະນັກງານ, ນັກຮົບໃນກຳລັງຕຳຫຼວດປະຊາຊົນເວົ້າລວມ ແລະ ກຳລັງຕຳຫຼວດເຄື່ອນທີເວົ້າສະເພາະ ໃນໜ້າທີ່ປົກປັກຮັກສາຊີວິດການເປັນຢູ່ຂອງປະຊາຊົນ. ທ່ານປະທານປະເທດ ໄດ້ອວຍພອນບັນດາພະນັກງານ, ນັກຮົບໃນກົມກອງສືບຕໍ່ສ້າງຜົນງານ ແລະ ວິລະກຳໃໝ່ຫຼາຍຢ່າງ, ພິເສດແມ່ນຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍໃນໂອກາດບຸນປີໃໝ່ ປີມະເມຍ ຈະມາເຖິງ.
ທີ່ການຢ້ຽມຢາມ ແລະ ເຮັດວຽກກັບສະພາກາແດງຫວຽດນາມ, ທ່ານປະທານປະເທດ ເຈືອງເຕີນຊາງ ສະເໜີໃຫ້ສະພາທຸກຂັ້ນສຸມໃສ່ 6 ເນື້ອໃນ. ເຊິ່ງຕາມນັ້ນແລ້ວ, ສະພາຕ້ອງປັບປຸງ, ພັດທະນາອົງການຈັດຕັ້ງ ແລະ ກຳລັງຂອງສະພາ, ໂດຍສະເພາະແມ່ນຢູ່ເຂດຫ່າງໄກຊອກຫຼີກ, ເຂດຊາຍແດນ, ໝູ່ເກາະ; ສະມາຊິກສະພາທຸກຂັ້ນ ສືບຕໍ່ຜັນຂະຫຍາຍບັນດາການເຄື່ອນໄຫວມະນຸດສະທຳຢູ່ປະຊາຄົມ, ເພີ່ມທະວີການສົມທົບກັນໃນວຽກງານຜັນຂະຫຍາຍບັນດາການເຄື່ອນໄຫວມະນຸດສະທຳກັບບັນດາອົງການ, ອົງການຈັດຕັ້ງ, ວິສາຫະກິດ; ຍູ້ແຮງການເຄື່ອນໄຫວພົວພັນຕ່າງປະເທດປະຊາຊົນ, ເຂົ້າຮ່ວມການປ້ອງກັນ, ຮັບມືກັນການປ່ຽນແປງຂອງດິນຟ້າອາກາດ ຕາມກຳນົດທິດເຊິ່ງຄະນະປະຈຳສູນກາງສະພາໄດ້ວາງອອກ.