(vovworld) – ຕອນເຊົ້າວັນທີ 09/10, ທ່ານປະທານປະເທດຫວຽດນາມ ເຈືອງເຕີນຊາງ ໄດ້ລົງຢ້ຽມຢາມກອງບັນຊາການກຳລັງນະຄອນຫຼວງຮ່າໂນ້ຍ, ກົມກອງກຳຫຼັງຫຼວງໃນການຕໍ່ສູ້ຮົບປົກປັກຮັກສານະຄອນຫຼວງ ແລະ ກັບເມືອຮັບການປົກຄອງນະຄອນຫຼວງຮ່າໂນ້ຍ ກ່ອນນີ້ 60 ປີ. ທ່ານປະທານປະເທດ ເຈືອງເຕີນຊາງ ສະເໜີວ່າ ພ້ອມກັບອົງຄະນະພັກ, ອຳນາດການປົກຄອງ ແລະ ປະຊາຊົນນະຄອນຫຼວງ, ພະນັກງານ, ນັກຮົບກອງບັນຊາການກຳລັງນະຄອນຫຼວງ ຕ້ອງຊາບຊຶມ ແລະ ຜັນຂະຫຍາຍມະຕິກອງປະຊຸມຄັ້ງທີ 8 ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ກ່ຽວກັບ “ຍຸດທະສາດປົກປັກຮັກສາປະເທດຊາດໃນສະພາບການໃໝ່” ຢ່າງມີປະສິດທິຜົນ. ທ່ານປະທານປະເທດ ເຈືອງເຕີນຊາງ ຊີ້ແຈ້ງວ່າ.
“ກອງບັນຊາການກຳລັງນະຄອນຫຼວງ ຕ້ອງເອົາໃຈໃສ່ເຖິງການກໍ່ສ້າງອົງຄະນະພັກເປັນປະຈຳ, ສືບຕໍ່ປະຕິບັດມະຕິສູນກາງພັກຄັ້ງທີ 4 ຊຸດທີ 11 “ບາງບັນຫາຮີບດ່ວນກ່ຽວກັບວຽກງານກໍ່ສ້າງພັກໃນປະຈຸບັນ” ຢ່າງມີປະສິດທິຜົນ ຕິດພັນກັບການປະຕິບັດຄຳສັ່ງເລກທີ 03 ຂອງກົມການເມືອງ “ສືບຕໍ່ຮໍ່າຮຽນ ແລະ ປະຕິບັດຕາມແບບຢ່າງຄຸນສົມບັດຂອງປະທານໂຮ່ຈິມິນ”. ສ້າງອົງການຈັດຕັ້ງພັກທຸກຂັ້ນໃຫ້ປອດໄສ, ເຂັ້ມແຂງ, ມີກຳລັງຄວາມສາມາດຊີ້ນຳນຳພາ ແລະ ກຳລັງຕໍ່ສູ້ສູງ, ສ້າງຖັນແຖວພະນັກງານ, ສະມາຊິກພັກໃຫ້ເຂັ້ມແຂງທາງດ້ານການເມືອງ, ນຳໜ້າກ່ຽວກັບທິດສະດີ ແລະ ຄວາມສາມາດເຄື່ອນໄຫວ, ເປັນແບບຢ່າງດ້ານຄຸນສົມບັດ, ແບບແຜນດຳລົງຊີວິດ, ຮັບໃຊ້ປະເທດຊາດ ແລະ ປະຊາຊົນຢ່າງສຸດຈິດສຸດໃຈ”.