(vovworld) - ວັນທີ 02/03, ເມື່ອແລກປ່ຽນໂດຍກົງກັບການນຳບັນດາກະຊວງ, ຂະແໜງການ ແລະ ການນຳທ້ອງຖິ່ນຢູ່ເຂດລົງສຳຫຼວດກວດກາລະບົບຄັນຄູສຳຄັນ, ທ່ານປະທານປະເທດ ເຈືອງເຕີນຊາງ ໄດ້ເນັ້ນໜັກເຖິງຄວາມສຳຄັນຂອງການຮັບມືກັບການປ່ຽນແປງຂອງດິນຟ້າອາກາດ ແລະ ຖືວ່າ ໃນສະພາບຕົວຈິງຄືປະຈຸບັນໄດ້ມີການຜັນແປຢ່າງວ່ອງໄວກວ່າການຄາດຄະເນ ສິ່ງດັ່ງກ່າວຮຽກຮ້ອງໃຫ້ຕ້ອງມີມາດຕະການຮັບມືຢ່າງທັນການ ເພື່ອຈຳກັດຜົນສະທ້ອນເຖິງຊີວິດການເປັນຢູ່ຂອງພໍ່ແມ່ປະຊາຊົນເຂດແຄມທະເລ. ທ່ານປະທານປະເທດ ຢືນຢັນວ່າ ການກໍ່ສ້າງໂຄງການຄັນຄູທະເລມີຄວາມໝາຍສຳຄັນ ບໍ່ພຽງແຕ່ຊ່ວຍກັນນ້ຳເຄັມ, ນ້ຳທະເລຂຶ້ນສູງ, ປົກປັກຮັກສາຊີວິດອີນຊີ ແລະ ຊັບສິນຂອງປະຊາຊົນເທົ່ານັ້ນ ຫາກຍັງຊ່ວຍສ້າງທາງຄົມມະນາຄົມຮັບໃຊ້ວຽກງານກູ້ໄພກູ້ຊີບຢູ່ເຂດແຄມທະເລ ແລະ ການປ້ອງກັນຊາດປ້ອງກັນຄວາມສະຫງົບອີກດ້ວຍ, ພ້ອມທັງສ້າງເງື່ອນໄຂພັດທະນາເສດຖະກິດສັງຄົມເຂດຊົນນະບົດແຄມທະເລ. ທ່ານປະທານປະເທດ ສະເໜີໃຫ້ແຂວງຊອກຈັງ ແລະ ຈ່າວິງ ຕ້ອງກວດກາການວາງແຜນກຳນົດ, ມີການຄັດເລືອກກິດຈະກຳສຳຄັນເພື່ອດຶງດູດບັນດາແຫຼ່ງກຳລັງລົງທຶນ, ຫຼີກລ້ຽງການລົງທຶນແບບກະແຈກກະຈາຍບໍ່ມີຈຸດສຸມເພື່ອນຳມາເຊິ່ງປະສິດທິຜົນສູງສຸດ.
ແລະກໍ່ໃນການຢ້ຽມຢາມແຂວງຈ້າວິງ ແລະ ຊອກຈັງ, ທ່ານປະທານປະເທດໄດ້ໄປກວດກາລະດັບຄວາມຄືບໜ້າແຫ່ງການຜັນຂະຫຍາຍໂຄງການສູນໄຟຟ້າ ຢຽນຫາຍ; ໂຄງການກໍ່ສ້າງທາງນ້ຳໃຫ້ກຳປັ່ນມີນ້ຳໜັກສູງເຂົ້າແມ່ນ້ຳ ເຮົ້າ. ເມື່ອລົງຢ້ຽມຢາມນັກຮົບປ້ອມປ້ອງກັນຊາຍແດນ 634, ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ, ພະນັກງານ, ນັກຮົບທະຫານປ້ອງກັນຊາຍແດນ ແລະ ປະຊາຊົນຢູ່ເຂດຊາຍແດນຕ້ອງເປັນເຈົ້າການກຳແໜ້ນກາລະໂອກາດ, ຜ່ານຜ່າສິ່ງທ້າທາຍ, ຄວາມຫຍຸ້ງຍາກ, ເສີມຂະຫຍາຍມູນເຊື້ອວິລະຊົນຂອງຊາດ, ຂອງກອງທັບ, ເອົາໃຈໃສ່ເຖິງວຽກງານຂົນຂວາຍປະຊາຊົນ, ຊ່ວຍພໍ່ແມ່ປະຊາຊົນຫຼຸດຜ່ອນຄວາມຫຍຸ້ງຍາກ, ໜູນຊ່ວຍ, ປ້ອງກັນຕ້ານໄພທຳມະຊາດ...