ລາຍການລະດູບານໃໝ່ແຫ່ງບ້ານເກີດເມືອງນອນປີ 2014
(ພາບ: hanoimoi.com.vn)
(vovworld) - ຕອນຄໍ່າວັນທີ 23/01, ຢູ່ເຂດປູຊະນີຍະສະຖານພະລາຊະວັງ ທັງລອງ ນະຄອນຫຼວງຮ່າໂນ້ຍ, ໄດ້ຈັດລາຍການລະດູບານໃໝ່ແຫ່ງບ້ານເກີດເມືອງນອນປີ 2014 ດ້ວຍຫົວຂໍ້ວ່າ “ເຊີດຊູ ລາກຮົ່ງ” (ເຊີດຊູຊາວຫວຽດນາມ). ທ່ານປະທານປະເທດ ເຈືອງເຕີນຊາງ ແລະ ພໍ່ແມ່ປະຊາຊົນ 2.000 ຄົນ ທີ່ຕາງໜ້າຊາວຫວຽດນາມ ອາໄສຢູ່ຕ່າງປະເທດກວ່າ 4,5 ລ້ານຄົນພວມດຳລົງຊີວິດຢູ່ 103 ປະເທດ ແລະ ເຂດແຄ້ວນໃນທົ່ວໂລກເຂົ້າຮ່ວມລາຍການ.
ກ່າວຄຳເຫັນທີ່ງານພົບປະແລກປ່ຽນສິລະປະ ລະດູບານໃໝ່ແຫ່ງບ້ານເກີດເມືອງນອນ, ທ່ານປະທານປະເທດ ເຈືອງເຕີນຊາງ ຖືວ່າ, ປີ 2013, ຍ້ອນເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ປະເທດໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ ແລະ ບັນລຸໄດ້ບັນດາຜົນງານທີ່ສຳຄັນ: ເສດຖະກິດສືບຕໍ່ມີບາດກ້າວພັດທະນາ; ຮັບປະກັນສະຖຽນລະພາບດ້ານການເມືອງ - ສັງຄົມ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ, ການປ້ອງກັນຊາດ ປ້ອງກັນຄວາມສະຫງົບໄດ້ຮັບການຮັກສາໄວ້ຢ່າງໝັ້ນຄົງ, ອິດທິພົນຊື່ສຽງ ແລະ ທີ່ຕັ້ງຂອງຫວຽດນາມ ບົນເວທີສາກົນໄດ້ຮັບການຍົກສູງຂຶ້ນ. ບັນດາໝາກຜົນດັ່ງກ່າວແມ່ນມີການປະກອບສ່ວນບໍ່ແມ່ນໜ້ອຍຂອງພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ.
“ໃນປີຜ່ານມາ, ຢູ່ຕ່າງປະເທດ, ພໍ່ແມ່ປະຊາຊົນຫວຽດນາມ ກໍ່ປະສົບກັບຄວາມຫຍຸ້ງຍາກຫຼາຍຢ່າງ, ຍ້ອນການເໜັງຕິງດ້ານເສດຖະກິດ - ສັງຄົມ ຢູ່ຫຼາຍປະເທດໃນໂລກ, ແຕ່ພວກເຮົາມີຄວາມເອກອ້າງຖະນົງໃຈທີ່ວ່າ, ພໍ່ແມ່ປະຊາຊົນພວກເຮົາໄດ້ມານະພະຍາຍາມຢ່າງບໍ່ຢຸດຢັ້ງ, ດູໝັ່ນຂະຫຍັນພຽນ, ສະຫຼາດສະຫຼຽວ, ມີຫົວຄິດປະດິດສ້າງໃນການອອກແຮງງງານ, ຮໍ່າຮຽນເພື່ອໃຫ້ຊີວິດນັບມື້ນັບເປັນປົກກະຕິ, ເຊື່ອມໂຍງເຂົ້າປະເທດປະຈຳຖິ່ນຢ່າງໝັ້ນຄົງ, ຮັກສາສີສັນວັດທະນະທຳຂອງຊາດ ແລະ ຍາມໃດກໍ່ອ່ວາຍເມືອຫາບ້ານເກີດເມືອງນອນ ແລະ ປະເທດຊາດ”.
ທ່ານປະທານປະເທດ ເຈືອງເຕີນຊາງ ຢືນຢັນນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດຫວຽດນາມ ທີ່ວ່າ ຍາມໃດກໍຖືຊາວຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ບໍ່ອາດສາມາດຕັດແຍກອອກຈາກປະຊາຄົມບັນດາເຜົ່າຫວຽດນາມ ໄດ້. ໃນໂອກາດປີໃໝ່, ປີມະເມຍ 2014, ທ່ານປະທານປະເທດ ໄດ້ອວຍພອນໃຫ້ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ໄດ້ຕ້ອນຮັບບຸນປີໃໝ່ຢ່າງມ່ວນຊື່ນ, ອົບອຸ່ນພ້ອມກັບຄອບຄົວ ແລະ ບ້ານເກີດເມືອງນອນ, ພ້ອມທັງອວຍພອນໃຫ້ຊາວຫວຽດນາມ ອາໄສຢູ່ຕ່າງປະເທດ ປີໃໝ່ຈົ່ງມີອະນາໄມສົມບູນ, ມີຄວາມຜາສຸກ ແລະ ປະສົບຜົນສະເລັດ.