( ພາບ: truongtansang.net/ )
|
( vovworld ) – ວັນທີ 13/3, ໃນມື້ເຮັດວຽກທີ 2, ກອງປະຊຸມໃຫ່ຍແມ່ຍິງທົ່ວປະເທດຄັ້ງທີ 11, ບັນດາຜູ້ແທນສືບຕໍ່ປຶກສາຫາລືກ່ຽວກັບເນື້ອໃນ, ວິທີການເຄື່ອນໄຫວຂອງສະຫະພັນແມ່ຍິງຫວຽດນາມ ໃນອາຍຸການທີ່ຈະມາເຖິງ. ກ່ອນໜ້ານັ້ນ, ໃນຕອນຄ່ຳຂອງວັນທີ 12/3, ທີ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບແມ່ຍິງຜູ້ດີເດັ່ນເກືອບ 100 ທ່ານນາງ ເນື່ອງໃນໂອກາດເຂົ້າຮ່ວມກອງປະຊຸມໃຫ່ຍແມ່ຍິງທົ່ວປະເທດຄັ້ງທີ 11. ທີ່ການຕ້ອນຮັບ, ທ່ານປະທານປະເທດ ເຈືອງເຕີນຊາງ ໄດ້ຕີລາຄາສູງບົດບາດຂອງແມ່ຍິງໃນພາລະກິດສ້າງສາ ແລະ ປົກປັກຮັກສາປະເທດຊາດ, ທ່ານເນັ້ນໜັກວ່າ, ປະຫວັດສາດຫວຽດນາມ ໄດ້ພິສູດໃຫ້ເຫັນວ່າ ໃນບໍ່ວ່າຍຸກສະໄໝໃດກໍມີບັນດາແບບຢ່າງວິລະຊົນ, ພິລະອາດຫານຂອງແມ່ຍິງ, ນັ້ນແມ່ນຄວາມເອກອ້າງທະນົງໃຈລວມຂອງທົ່ວທັງຊາດ. ທ່ານປະທານປະເທດ ເຈືອງເຕີນຊາງ ສະເໜີວ່າ, ໃນໄລຍະນີ້, ສະຫະພັນແມ່ຍິງຕ້ອງເສີມຂະຫຍາຍບົດບາດຂອງຕົນໃນໄລຍະຫຍຸ້ງຍາກ, ສ້າງນ້ຳໃຈສາມັກຄີໃນທົ່ວສັງຄົມ, ປະກອບສ່ວນເຂົ້າໃນພາລະກິດຫັນປະເທດຊາດເປັນອຸດສາຫະກຳ ແລະ ທັນສະໄໝ. ທ່ານປະທານປະເທດ ເຈືອງເຕີນຊາງ ກໍປາດຖະໜາວ່າ ພະນັກງານຍິງຈະເຂົ້າຮ່ວມການຜັນຂະຫຍາຍມະຕິເລກທີ 4 ຂອງສູນກາງພັກກ່ຽວກັບການກໍ່ສ້າງ ແລະ ປັບປຸງ ພັກຢ່າງຕັ້ງໜ້າ, ພ້ອມກັນນັ້ນ, ຄະນະບໍລິຫານງານຊຸດໃໝ່ຂອງສະຫະພັນແມ່ຍິງທີ່ໄດ້ຮັບການເລືອກຕັ້ງໃນຄັງນີ້ ຈະສືບຕໍ່ຊຸກຍູ້ວຽກງານປົກປ້ອງສິດສະເໝີພາບລະຫວ່າງຍິງ-ຊາຍ, ເປີດກ້ວາງເງື່ອນໄຂເຂົ້າຮ່ວມການຮ່ຳຮຽນ, ຍົກສູງລະດັບ ແລະ ວຽກເຮັດງານທຳຂອງແມ່ຍິງຢູ່ເຂດປະສົບກັບຄວາມຫຍຸ້ງຍາກ, ສະເໜີບັນດາມາດຕະການທີ່ມີປະສິດທິຜົນໃນການສະກັດກັ້ນບັນດາການກະທຳລະເມີດທີ່ກ່ຽວຂ້ອງເຖິງຄຸນນະທາດຂອງແມ່ຍິງ.
ຜູ້ແທນເຂົ້າຮ່ວມກອງປະຊຸມໃຫ່ຍ
(ພາບ:thaibinhtv.vn)
|
ກອງປະຊຸມໃຫ່ຍຜູ້ແທນແມ່ຍິງທົ່ວປະເທດຄັ້ງທີ 11 ພວມດຳເນີນໄປຢູ່ນະຄອນຫຼວງຮ່າໂນ້ຍ ໄດ້ດຶງດູດຄວາມສົນໃຈຂອງແມ່ຍິງທົ່ວປະເທດ. ດ້ວຍຫົວຂໍ້ວ່າ: “ສາມັກຄີ-ມີຫົວຄິດປະດິດສ້າງ-ເຊື່ອມໂຍງ-ພັດທະນາ“, ກອງປະຊຸມໃຫ່ຍຄັ້ງນີ້ ສືບຕໍ່ຕິດພັນກັບພາລະໜ້າທີ່; ຮັບຟັງຄວາມມຸ້ງມາດປາດຖະໜາຂອງສະມາຊິກ, ປະກອບສ່ວນເພີ່ມທະວີບົດບາດ, ທີ່ຕັ້ງຂອງແມ່ຍິງໃນໄລຍະໃໝ່. ເອື້ອຍ ເລທິແຮ້ງ, ຢູ່ຕາແສງ ຮ່ວາບັກ, ເມືອງ ຮ່າວວາງ, ນະຄອນ ດ່ານັງ ເວົ້າວ່າ: “ໂດຍແມ່ນສະມາຊິກຂອງສະຫະພັນແມ່ຍິງ, ຂ້າພະເຈົ້າປາດຖະໜາວ່າ ກອງປະຊຸມ ໃຫ່ຍຜູ້ແທນແມ່ຍິງທົ່ວປະເທດຄັ້ງທີ 11 ຈະປະສົບຜົນສຳເລັດຢ່າງຈົບງາມ. ບົດພື້ນຖານບັນດາເນື້ອໃນການເຄື່ອນໄຫວ, ພວກເຮົາຈະປ່ຽນແປງບັນດາຮູບການໃຫ້ໃກ້ຊິດ ແລະ ມີປະສິດທິຜົນກ່ວາ, ຊ່ວຍໃຫ້ເອື້ອຍນ້ອງຍົກສູງຊີວິດການເປັນຢູ່ໃນທຸກດ້ານ, ໂດຍສະເພາະແມ່ນດ້ານຈິດໃຈ ແລະ ຄຸນນະພາບຊີວິດ“
ເອື້ອຍ ວັນທິກີມຍູງ, ປະທານສະຫະພັນແມ່ຍິງເມືອງ ໄຕເຊີນ, ແຂວງບິງດີ້ງ ປາດຖະໜາວ່າ ກອງປະຊຸມໃຫ່ຍຈະເລືອກຕັ້ງບັນດາພະນັກງານຂອງສະຫະພັນ ຜູ້ທີ່ສຸດຈິດສຸດໃຈ, ມີລະດັບຄວາມຮູ້ ແລະ ຄວາມຮັບຜິດຊອບ ເພື່ອນຳຂະບວນການແມ່ຍິງນັບມື້ນັບກ້າວຂຶ້ນ: “ໃນຖານະແມ່ນພະນັກງານສະຫະພັນແມ່ຍິງ, ຂ້າພະເຈົ້າປາດຖະໜາວ່າ ກອງປະຊຸມໃຫ່ຍຈະຄົ້ນຄ້ວາ ແລະ ຍົກອອກບັນດາແຜນນະໂຍບາຍ, ມີລະບອບອຸດໜູນລະອຽດ ໃຫ້ຖັນແຖວພະນັກງານສະຫະພັນແມ່ຍິງຂັ້ນຮາກຖານ, ພ້ອມກັນນັ້ນກໍຈັດບັນດາຊຸດຝຶກອົບຮົມ ບຳລຸງສ້າງເພື່ອຍົກສູງຄວາມສາມາດຂອງຖັນແຖວພະນັກງານຍິງ“
ສ່ວນບັນດາແມ່ຍິງຊົນເຜົ່າສ່ວນໜ້ອຍກໍປາດຖະໜາວ່າ ກອງປະຊຸມໃຫ່ຍຄັ້ງນີ້ ຈະວາງອອກບັນດານະໂຍບາຍເໝາະສົມກັບແມ່ຍິງເຂດພູດອຍ. ເອື້ອຍ ເກສືວ, ຫົວໜ້າພະແນກຊົນເຜົ່າ ແຂວງເທື່ອທຽນເຫ້ວ ໃຫ້ຮູ້ວ່າ:
“ໂດຍແມ່ນແມ່ຍິງຊາວຊົນເຜົ່າສ່ວນໜ້ອຍ, ຂ້າພະເຈົ້າຫວັງວ່າ, ກອງປະຊຸມໃຫ່ຍຄັ້ງນີ້ ຈະສະຫງວນຄວາມເອົາໃຈໃສ່ເຖິງແມ່ຍິງເຂດຫ່າງໄກສອກຫຼີກ, ເຂດຊາຍແດນ, ໝູ່ເກາະທະເລ…ກ່ວາອີກ. ຂ້າພະເຈົ້າປາດຖະໜາວ່າ ແມ່ຍິງຊາວຊົນເຜົ່າສ່ວນໜ້ອຍຈະມີກາລະໂອກາດເພື່ອເຊື່ອມໂຍງ ແລະ ອຸທິດສ່ວນໃຫ້ແກ່ສັງຄົມຫຼາຍກ່ວາອີກ“.
ໂດຍສືບຕໍ່ການເຮັດວຽກ, ວັນທີ 13/3, ກອງປະຊຸມໃຫຍ່ຜູ້ແທນແມ່ຍິງທົ່ວປະເທດຄັ້ງທີ XI ໄດ້ດຳເນີນການເລືອກຕັ້ງຄະນະບໍລິຫານງານສູນກາງສະຫະພັນແມ່ຍິງຫວຽດນາມຊຸດທີ XI (ອາຍຸການ 2007-2012) ກອງປະຊຸມໃຫຍ່ໄດ້ເຫັນດີເປັນເອກະພາບຈຳນວນກຳມະການຄະນະບໍລິຫານງານສູນກາງສະຫະພັນແມ່ຍິງຫວຽດນາມຊຸດທີ XI ແມ່ນ 169 ທ່ານນາງ, ເພີ່ມຂຶ້ນ 10 ທ່ານນາງເມື່ອທຽບໃສ່ຊຸດທີ X. ນີ້ແມ່ນບັນດາຜູ້ຍິງທີ່ມີຄູນສົມບັດ, ພູມປັນຍາ, ມີຄວາມຂະຫຍັນຂັນເຂ່ືອນ, ມີຫົວຄິດປະດິດສ້າງ, ມີຄວາມສາມັກຄີ, ສຸດຈິດສຸດໃຈ ແລະ ສະໝັກໃຈເຄື່ອນໄຫວວຽກງານສະຫະພັນ, ເປັນຕົວແທນໃຫ້ແກ່ແມ່ຍິງທຸກຊັ້ນວັນນະຢູ່ຫວຽດນາມ, ສະແດງໃຫ້ເຫັນລັກສະນະສະຫະພັນຢ່າງກວ້າງຂວາງ, ກໍ່ຄືເຈດຈຳນົງ, ຄວາມມຸ້ງມາດປາຖະໜາຂອງແມ່ຍິງຫວຽດນາມ. ຕອນບ່າຍວັນດຽວກັນ, ຄະນະບໍລິຫານງານສູນກາງສະຫະພັນແມ່ຍິງຫວຽດນາມຊຸດທີ XI ໄດ້ດຳເນີນກອງປະຊຸມຄັ້ງທຳອິດ.