ທ່ານປະທານປະເທດຫວຽດນາມ Truong Tan Sang ກ່າວຄຳເຫັນທີ່ພິທີ |
Vovworld- ຕອນເຊົ້າວັນທີ 19/10, ຢູ່ຮ່າໂນ້ຍ, ຄະນະໂຄສະນາສຶກສາສູນກາງ ພັກໄດ້ສົມທົບກັບສຳນັກພິມການເມືອງແຫ່ງຊາດ - ຄວາມຈິງ ຈັດຕັ້ງພິທີສະຫຼຸບວຽກງານບັນນາທິການ, ພິມຈຳໜ່າຍ ແລະ ປະກາດບັນດາຜະລິດ ຕະພັນໂຄງການຮຽບຮຽງປະຫວັດສາດແຫ່ງການພົວພັນແບບພິເສດຫວຽດນາມ-ລາວ; ລາວ-ຫວຽດນາມ ໄລຍະ 1930-2007. ກ່າວຄຳເຫັນທີ່ພິທີສະຫຼຸບ, ທ່ານປະທານປະເທດຫວຽດນາມ Truong Tan Sang ເນັ້ນໜັກວ່າ ໃນບັນຍາກາດທີ່ທົ່ວພັກ ແລະ ທົ່ວປວງຊົນ 2 ປະເທດຫວຽນາມ ແລະ ລາວພວມຟົດຟື້ນມ່ວນຊື່ນຈັດຕັ້ງບັນດາເຫດການສຳຄັນຍິ່ງຂອງ 2 ປະເທດ ນັ້ນ, ເລື່ອງປະກາດບັນດາຜະລິດຕະພັນໂຄງການຮຽບຮຽງປະຫວັດສາດແຫ່ງການພົວພັນແບບພິເສດຫວຽດນາມ-ລາວ; ລາວ-ຫວຽດນາມ ໄລຍະ 1930-2007 ໄປສູ່ບັນດາສຳນັກງານສຳເນົາເອກະສານ, ຫໍສະໝຸດ, ໂຮງຮຽນ ແລະ ຜູ້ອ່ານຊາວຫວຽດນາມ ແລະ ຊາວລາວແມ່ນຍິ່ງມີຄວາມໝາຍຢ່າງເລິກເຊິ່ງ. ທ່ານປະທານປະເທດຫວຽດນາມ Truong Tan Sang ກ່າວວ່າ :
“ ປະຫວັດສາດແຫ່ງການຕໍ່ສູ້ເພື່ອສ້າງສາ ແລະ ປົກປັກຮັກສາປະເທດຊາດຂອງ 2 ຊາດຫວຽດນາມ ແລະ ລາວ ແມ່ນສະຫງ່າລາສີທີ່ສຸດ. ໃນຕະຫຼອດໄລຍະປະຫວັດສາດດັ່ງກ່າວ, 2 ຊາດຫວຽດນາມ-ລາວໄດ້ເພີ່ມພູນຄຸນສ້າງສາຍພົວພັນທີ່ເປັນມູນເຊື້ອອັນດີງາມ ແລະ ພິເສດ ນັບແຕ່ເວລາພັກກອມມູນິດອີນດູຈິນໄດ້ຮັບການສ້າງຕັ້ງມາຮອດປະຈຸບັນ, ການພົວພັນລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດຫວຽດນາມ-ລາວ ແມ່ນສາຍພົວພັນທີ່ສັດຊື່ບໍລິສຸດ, ໂປ່ງໃສ, ເປັນແບບຢ່າງ ແລະ ຫາຍາກໃນໂລກນີ້. ກ່ວາ 80 ປີທີ່ຜ່ານມາ, ສາຍພົວພັນແບບພິເສດນີ້ແມ່ນແຫຼ່ງກຳລັງແຮງມະຫາສານ ອັນໄດ້ນຳການປະຕິວັດຫວຽດນາມ, ການປະຕິວັດລາວຍາດໄດ້ບັນດາວິລະກຳມະຫັດສະຈັນໃນປະຫວັດສາດ. ນີ້ແມ່ນຊັບສົມບັດອັນລ້ຳຄ່າຂອງ 2 ຊາດ, ຕ້ອງໄດ້ຮັບການຮັກສາ ແລະ ເສີມຂະຫຍາຍໃນເງື່ອນໄຂໃໝ່ ”
ທ່ານປະທານປະເທດຫວຽດນາມ Truong Tan Sang ສະເໜີບັນດາອົງການທີ່ມີໜ້າທີ່ຮັບຜິດຊອບຈົ່ງເຮັດສຳເລັດວຽກງານໂຄສະນາຢ່າງເລິກເຊິ່ງກ້ວາງຂວາງ, ນຳເນື້ອໃນຂອງໂຄງການເຂົ້າໃນໂຮງຮຽນຂອງ 2 ປະເທດ, ພ້ອມທັງແນະນຳໃຫ້ເພື່ອນມິດສາກົນຮັບຊາບກ່ຽວກັບປະຫວັດສາດແຫ່ງການພົວພັນແບບພິເສດຫວຽດນາມ-ລາວອີກດ້ວຍ.
ທ່ານປະທານປະເທດຫວຽດນາມ Truong Tan Sang ຕ້ອນຮັບ ທ່ານປະທານສູນກາງແນວລາວສ້າງຊາດ ພັນດວງຈິດວົງສາ
|
ໃນຕອນບ່າຍຂອງວັນດຽວກັນ, ທ່ານປະທານປະເທດຫວຽດນາມ Truong Tan Sang ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງສູນກາງແນວລາວສ້າງຊາດໂດຍທ່ານປະທານສູນກາງແນວລາວສ້າງຊາດ ພັນດວງຈິດວົງສານຳໜ້າ. ທີ່ການຕ້ອນຮັບ, ທ່ານປະທານປະເທດຫວຽດນາມ Truong Tan Sang ໄດ້ຕີລາຄາສູງເລື່ອງ 2 ຝ່າຍໄດ້ຈັດຕັ້ງບັນດາການເຄື່ອນໄຫວ, ດຳເນີນຊີວິດການເມືອງ-ເສດຖະກິດ - ວັດທະນະທຳທີ່ມີຄວາມໝາຍແນໃສ່ສະເຫຼີມສະຫຼອງ 50 ປີແຫ່ງວັນສ້າງການພົວພັນທາງການທູດ ແລະ 35 ປີແຫ່ງວັນເຊັນສົນທິສັນຍາມິດຕະພາບ ແລະ ຮ່ວມມືຮອບດ້ານ ແລະ ອື່ນໆ. ສ່ວນທ່ານພັນດວງຈິດວົງສາໄດ້ຢືນຢັນວ່າ ສູນກາງແນວລາວສ້າງຊາດ ຈະພະຍາຍາມຈົນສຸດຄວາມສາມາດຂອງຕົນເພື່ອເພີ່ມພູນຄຸນສ້າງນ້ຳໃຈສາມັກຄີ, ໄມຕີຈິດມິດຕະພາບພິເສດ ແລະ ການຮ່ວມມືຮອບດ້ານລະຫວ່າງ 2 ປະເທດ.