ທ່ານ ເຈິ່ນດ້າຍກວາງ ໄດ້ໄປວາງດວງມາລາ ໄວ້ອາໄລ
ພະບາດສົມເດັດ ພະເຈົ້າມະຫາຊີວິດ ໄທ ຢູ່ສະຖານທູດ ລາຊະອານາຈັກໄທ
(vovworld) - ຕອນເຊົ້າວັນທີ 17/10, ທ່ານປະທານປະເທດ ຫວຽດນາມ ເຈິ່ນດ້າຍກວາງ ໄດ້ໄປວາງດວງມາລາ ໄວ້ອາໄລ ພະບາດສົມເດັດ ພະເຈົ້າມະຫາຊີວິດ ໄທ ພູມີພົນ ອະດູນຢາເດດ ຢູ່ສະຖານທູດ ລາຊະອານາຈັກໄທ, ທີ່ ຮ່າໂນ້ຍ. ແບ່ງເບົາຄວາມທຸກເສົ້າ ແລະ ສະແດງຄວາມເສົ້າສະຫຼົດໃຈຕໍ່ພະລາຊີນີ, ລາຊະອານາຈັກ, ລັດຖະບານ, ສະພານິຕິບັນຍັດ ແລະ ປະຊາຊົນ ໄທ ທຸກຖ້ວນໜ້າ, ທ່ານປະທານປະເທດ ເຈິ່ນດ້າຍກວາງ ໄດ້ຂຽນໃສ່ປຶ້ມໄວ້ອາໄລ, ສະແດງ “ຄວາມເສົ້າສະຫຼົດໃຈອັນໃຫຍ່ຫຼວງຕໍ່ການສະຫວັນນະຄົດຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດູນຢາເດດ, ເຊິ່ງແມ່ນ ພະເຈົ້າມະຫາຊີວິດ ຜູ້ປີຊາສາມາດ ແລະ ແສນເຄົາລົບຮັກຂອງປະຊາຊົນ ໄທ. ການນຳ ແລະ ປະຊາຊົນ ຫວຽດນາມ ຍາມໃດກໍ່ນັບຖືບັນດາອາລົມຈິດອັນດີງາມ ເຊິ່ງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດູນຢາເດດ ໄດ້ສະຫງວນໃຫ້ແກ່ປະຊາຊົນ ຫວຽດນາມ, ກໍ່ຄືການປະກອບສ່ວນອັນລ້ຳຄ່າຕ່າງໆຂອງພະອົງໃຫ້ແກ່ສາຍພົວພັນມິດຕະພາບ, ຄູ່ຮ່ວມມືຍຸດທະສາດລະຫວ່າງສອງປະເທດ ຫວຽດນາມ - ໄທ. ໃນນາມລັດ ແລະ ປະຊາຊົນ ຫວຽດນາມ, ພວກຂ້າພະເຈົ້າຂໍແບ່ງເບົາຄວາມເສົ້າສະຫຼົບໃຈຕໍ່ການສູນເສຍອັນໃຫຍ່ຫຼວງນີ້ເຖິງພະລາຊີນີ, ລາຊະອານາຈັກ, ລັດຖະບານ, ສະພານິຕິບັນຍັດ ແລະ ປະຊາຊົນ ໄທ ທຸກຖ້ວນໜ້າ “.
ໃນວັນດຽວກັນ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ, ໄດ້ນຳໜ້າຄະນະຜູ້ແທນກະຊວງການຕ່າງປະເທດຫວຽດນາມ, ພ້ອມກັບຄະນະຜູ້ແທນບາງກະຊວງ, ຂະແໜງການຕ່າງໆກໍ່ໄດ້ໄປໄວ້ອາໄລ ແລະ ຂຽນໃສ່ປື້ມໄວ້ອາໄລ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດູນຢາເດດ ຢູ່ສະຖານທູດ ໄທ ປະຈຳຫວຽດນາມ.