ປະທານປະເທດເຈີ່ນດ້າຍກວາງຕ້ອນຮັບຄະນະຜູ້ແທນວິສາຫະກິດຕ່າງປະເທດ
(vovworld) – ຕອນບ່າຍວັນທີ 18/5, ຢູ່ສຳນັກງານປະທານປະເທດ, ທ່ານປະທານປະເທດ ເຈີ່ນດ້າຍກວາງ ໄດ້ຕ້ອນຮັບຄະນະຜູ້ແທນວິສາຫະກິດບັນດາປະເທດ: ແອັດສະປາຍ, ການາດາ, ສິງກະໂປ, ມາເລເຊຍ, ບຣູໄນ… ໂດຍເຈົ້າຊາຍ ບຣູໄນ Pengiran Muda Abdul Qawi ນຳໜ້າ, ພວມຢ້ຽມຢາມ ແລະ ຊອກຫາກາລະໂອກາດດຳເນີນທຸລະກິດຢູ່ແຂວງ ແທງຮ໋ວາ ເວົ້າສະເພາະ ແລະ ຢູ່ ຫວຽດນາມ ເວົ້າລວມ. ທ່ານປະທານປະເທດ ເຈີ່ນດ້າຍກວາງ ຢັ້ງຢືນວ່າ:ໃນທ່າອ່ຽງເຊື່ອມໂຍງ, ຫວຽດນາມ ປາດຖະໜາຢາກມີການຮ່ວມມືກັບທຸກໆປະເທດໃນໂລກ ແລະ ຈະສ້າງເງື່ອນໄຂສະດວກໃຫ້ບັນດາວິສາຫະກິດ ບຣູໄນ, ກໍ່ຄືບັນດານັກ ລົງທຶນສາກົນທີ່ເຂົ້າມາລົງທຶນຢູ່ ຫວຽດນາມ ໃນບັນດາຂົງເຂດຄືກໍ່ສ້າງພື້ນຖານໂຄງລ່າງເຂດເສດຖະກິດ ແລະ ບັນດາເຂດອຸດສາຫະກຳ, ໂຮງແຮມ ແລະ ການທ່ອງທ່ຽວ. ທ່ານປະທານປະເທດ ສະເໜີໃຫ້ບັນດານັກລົງທຶນສົມທົບກັນຢ່າງແໜ້ນແຟ້ນກັບບັນດາທ້ອງຖິ່ນ ແລະ ບັນດາກະຊວງ, ຂະແໜງການກ່ຽວຂ້ອງຂອງ ຫວຽດນາມ ກໍ່ຄືບັນດາອົງການຕາງໜ້າຂອງປະເທດຕ່າງໆທີ່ປະຈຳຢູ່ຫວຽດນາມ ເພື່ອແນໃສ່ແກ້ໄຂບັນດາຂໍ້ຂ້ອງໃຈ, ຄວາມຫຍຸ້ງຍາກໃນວິວັດການຊອກຮູ້ການລົງທຶນຢູ່ ຫວຽດນາມ ໄດ້ສະດວກກ່ວາ.