ປະທານປະເທດເຈິ່ນດ້າຍກວາງຖະຫວາຍທູບທຽນ
ຢູ່ພະລາຊະວັງທັງລອງ-ຮ່າໂນ້ຍ
(vovworld) - ຕອນເຊົ້າວັນທີ 5/2, ຢູ່ເຂດປູຊະນີຍະສະຖານພະລາຊະວັງ ທັງລອງ, ສູນອະນຸລັກຮັກສາມໍລະດົກ ທັງລອງ - ຮ່າໂນ້ຍ ໄດ້ສົມທົບກັບສະມາຄົມອະນຸລັກຮັກສາມໍລະດົກວັດທະນະທຳ ທັງລອງ ຈັດຕັ້ງພິທີຖະຫວາຍທູບທຽນອາໄລຫາບັນພະບຸລຸດ, ບັນດາຜູ້ທີ່ມີຄຸນງາມຄວາມດີຕໍ່ປະເທດຊາດ. ທ່ານປະທານປະເທດ ເຈິ່ນດ້າຍກວາງ ໄດ້ເຂົ້າຮ່ວມພິທີຖະຫວາຍທູບທຽນ. ພິທີຖະຫວາຍທູບທຽນຖືກຈັດຕັ້ງຢ່າງສົມກຽດ, ສະແດງໃຫ້ເຫັນຄວາມເຄົາລົບນັບຖື, ຄວາມຮູ້ບຸນຄຸນຕໍ່ບັນພະບຸລຸດ, ຜູ້ທີ່ມີຄຸນງາມຄວາມດີໃນການສ້າງພື້ນຖານອະລິຍະທຳ ທັງລອງ, ຄວາມສີວິໄລໃຫ້ປະເທດ ດ້າຍຫວຽດ. ໃນບໍລິເວນທີ່ເຕັມໄປດ້ວຍຄວາມສັກສິດຂອງພະລາຊະວັງ ທັງລອງໃນຊຸມວັນຕົ້ນປີໃໝ່ນີ້, ພິທີຖະຫວາຍທູບທຽນຕົ້ນລະດູບານໃໝ່ແມ່ນການເຄື່ອນໄຫວທີ່ສະແດງໃຫ້ເຫັນຄວາມເຄົາລົບນັບຖື, ມຸ່ງຫາກົກເຄົ້າເຫງົ້າກໍ, ບັນພະບຸລຸດ, ເຊີດຊູບັນດາຄຸນຄ່າທີ່ເປັນມູນເຊື້ອຂອງ ທັງລອງ - ຮ່າໂນ້ຍ. ພິທີຖະຫວາຍທູບທຽນ ແມ່ນການເຄື່ອນໄຫວຕົ້ນຕໍໃນບັນດາເຫດການຕ້ອນຮັບບຸນເຕັດຢູ່ເຂດປູຊະນີຍະສະຖານພະລາຊະວັງ ທັງລອງ - ຮ່າໂນ້ຍ. ກ່ອນນັ້ນ, ບາງພິທີການທີ່ເປັນມູນເຊື້ອກໍ່ໄດ້ຮັບການວາດພາບຄືນໃໝ່ຢູ່ທີ່ນີ້, ອັນໄດ້ສ້າງບັນຍາການຟົດຟື້ນມ່ວນຊື່ນໃຫ້ຊາວນະຄອນຫຼວງ ແລະ ແຂກທ່ອງທ່ຽວໃນໂອກາດປີໃໝ່.