(vovworld) - ວັນທີ 26/04, ທີ່ການພົບປະຢູ່ສຳນັກງານປະທານປະເທດ, ທ່ານປະທານປະເທດ ເຈີນດ້າຍກວາງ ຢືນຢັນວ່າ, ຍາມໃດຫວຽດນາມ ກໍຖືເປັນສຳຄັນການພົວພັນຮ່ວມມືລະຫວ່າງ 2 ພັກ, 2 ລັດ ຫວຽດນາມ ລາວ ແມ່ນຊັບສົມບັດອັນລ້ຳຄ່າ, ມີຄວາມໝາຍເປັນຕາຍສຳລັບພາລະກິດປະຕິວັດຂອງຫວຽດນາມ ກໍຄືລາວ. ທ່ານປະທານປະເທດ ເຈີນດ້າຍກວາງ ໄດ້ຕີລາຄາສູງການສົມທົບກັນຢ່າງແໜ້ນແຟ້ນ, ມີປະສິດທິຜົນລະຫວ່າງ 2 ປະເທດ ທີ່ບັນດາເວທີປາໄສຫຼາຍຝ່າຍໃນໄລຍະຜ່ານມາ; ພ້ອມທັງຢືນຢັນວ່າ, ຫວຽດນາມ ພວມ ແລະ ຈະສະໜັບສະໜູນ ແລະ ສົມທົບກັບລາວຢ່າງແໜ້ນແຟ້ນ ເພື່ອໃຫ້ລາວ ຮັບດຳລົງຕຳແໜ່ງເປັນປະທານອາຊຽນ 2016 ສຳເລັດຜົນ. ທ່ານປະທານປະເທດ ກໍແລກປ່ຽນກັບທ່ານເລຂາທິການໃຫຍ່, ປະທານປະເທດລາວ ກ່ຽວກັບບັນຫາທະເລຕາເວັນອອກ ແລະ ສະເໜີໃຫ້ລາວ ສົມທົບກັບຫວຽດນາມ ໃນບັນຫານີ້ຢ່າງແໜ້ນແຟ້ນ, ກໍຄື 2 ຝ່າຍສືບຕໍ່ເພີ່ມທະວີການສົມທົບເຊິ່ງກັນ ແລະ ກັນ ແລະ ກັບບັນດາປະເທດ, ອົງການຈັດຕັ້ງໃນບັນຫາຄຸ້ມຄອງ, ນຳໃຊ້ແຫຼ່ງນຳ້ແມ່ນ້ຳຂອງຢ່າງໝັ້ນຄົງ ແລະ ມີປະສິດທິຜົນ.
ສ່ວນທ່ານເລຂາທິການໃຫຍ່,ປະທານປະເທດລາວ ບຸນຍັງວໍລະຈິດ ຢືນຢັນວ່າ, ພັກ, ລັດ ແລະ ປະຊາຊົນລາວ ຈະເຮັດຈົນສຸດຄວາມສາມາດຂອງຕົນເພື່ອພ້ອມກັບພັກ, ລັດ ແລະ ປະຊາຊົນຫວຽດນາມ, ເພີ່ມພູນຄຸນສ້າງ, ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດລາວ - ຫວຽດນາມ ໃຫ້ພັດທະນາເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ.