(vovworld) - ໂດຍໄດ້ຮັບຄຳເຊີນຂອງທ່ານປະທານາທິບໍດີສ.ອີຕາລີ Sergio Mattarella, ທ່ານປະທານປະເທດຫວຽດນາມ ເຈີນດ້າຍກວາງ ແລະ ພັນລະຍາໄດ້ເດີນທາງໄປເຖິງນະຄອນຫຼວງໂຣມ, ເລີ່ມຕົ້ນການຢ້ຽມຢາມທາງລັດຖະກິດສ.ອີຕາລີ ໃນລະຫວ່າງວັນທີ 21 – 24/11. ຕອນບ່າຍວັນທີ 22/11 (ຕາມເວລາຫວຽດນາມ), ພາຍຫຼັງພິທີຕ້ອນຮັບ, ທ່ານປະທານປະເທດ ເຈີນດ້າຍກວາງ ແລະ ທ່ານປະທານາທິບໍດີ Sergio Mattarella ໄດ້ດຳເນີນການເຈລະຈາ. ທີ່ການເຈລະຈາ, 2 ຝ່າຍໄດ້ເປັນເອກະພາບເພີ່ມທະວີການແລກປ່ຽນຄະນະຜູ້ແທນ ແລະ ການພົບປະທຸກຂັ້ນ, ໂດຍສະເພາະແມ່ນຂັ້ນສູງ; ຜັນຂະຫຍາຍບັນດາເນື້ອໃນກວມລວມຂອງແຜນການເຄື່ອນໄຫວຜັນຂະຫຍາຍການພົວພັນຄູ່ຮ່ວມມືຍຸດທະສາດໄລຍະ 2017 – 2018, ຊຸກຍູ້ການພົບປະແລກປ່ຽນປະຊາຊົນ, ຖືນີ້ແມ່ນພື້ນຖານການເມືອງສຳຄັນເພື່ອນຳການພົວພັນລະຫວ່າງ 2 ປະເທດເຂົ້າສູ່ເນື້ອແທ້. 2 ຝ່າຍກໍເຫັນດີສ້າງການກຳນົດທິດໃໝ່ກ່ຽວກັບການຮ່ວມມືພັດທະນາ ໃຫ້ເໝາະສົມກັບການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດ, ສຸມໃສ່ເຂົ້າໃນບັນດາຂົງເຂດ ບຳລຸງສ້າງວິຊາຊີບ, ສິ່ງແວດລ້ອມ, ເຫັນດີເປັນເອກະພາບຮັກສາການຊຸກຍູ້ການຮ່ວມມືດ້ານວັດທະນະທຳ, ການສຶກສາ, ບຳລຸງສ້າງ, ການທ່ອງທ່ຽວ, ການປ້ອງກັນຊາດປ້ອງກັນຄວາມສະຫງົບ… ການນຳ 2 ທ່ານຊີ້ແຈ້ງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມປອດໄພໃນການເດີນທະເລ, ການບິນ; ເຫັນດີນຳກັນໂດຍຖືວ່າ ບັນດາການຂັດແຍ່ງກັນຢູ່ທະເລຕາເວັນອອກ ຕ້ອງໄດ້ຮັບການແກ້ໄຂດ້ວຍບັນດາມາດຕະການໂດຍສັນຕິວິທີ; ບົນພື້ນຖານເຄົາລົບກົດໝາຍສາກົນ, ສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ, ຮັບປະກັນຄວາມເສລີໃນການເດີນທະເລ, ການບິນຕາມເສັ້ນທາງແລກປ່ຽນການຄ້າສຳຄັນນີ້ຂອງໂລກ.
ພາຍຫຼັງການເຈລະຈາ, ທ່ານປະທານາທິບໍດີສ.ອີຕາລີ Sergio Mattarella ແລະ ທ່ານປະທານປະເທດຫວຽດນາມ ເຈີນດ້າຍກວາງ ໄດ້ກ່າວຄຳເຫັນຕໍ່ສື່ສວນຊົນກ່ຽວກັບໝາກຜົນການແລກປ່ຽນ ກໍຄືທິດທາງຮ່ວມມືລະຫວ່າງ 2 ປະເທດໃນໄລຍະຈະມາເຖິງ. ທ່ານປະທານາທິບໍດີ Sergio Mattarella ຢືນຢັນວ່າ, ການຢ້ຽມຢາມຄັ້ງນີ້ໄດ້ຮັບຮອງເອົາອີກເທື່ອໜຶ່ງວ່າ ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ອີຕາລີ ທີ່ພວມນັບມື້ນັບເຂົ້າສູ່ລວງເລິກ, ມີປະສິດທິຜົນ ແລະ ແທດຈິງ. ສ່ວນທ່ານປະທານປະເທດ ເຈີນດ້າຍກວາງ ຢືນຢັນວ່າ.
“ຂ້າພະເຈົ້າຢືນຢັນວ່າ, ຍາມໃດຫວຽດນາມ ກໍຖືເປັນສຳຄັນການພັດທະນາ, ນຳການພົວພັນຄູ່ຮ່ວມມືຍຸດທະສາດກັບອີຕາລີ ເຂົ້າສູ່ລວງເລິກ ແລະ ມີປະສິດທິຜົນ. 2 ຝ່າຍປາດຖະໜາຢາກສືບຕໍ່ຜັນຂະຫຍາຍບັນດາກົນໄກຮ່ວມມືທີ່ມີຢູ່ແລ້ວຄື: ການເຈລະຈາຍຸດທະສາດຂັ້ນຮອງລັດຖະມົນຕີການຕ່າງປະເທດ, ການເຈລະຈານະໂຍບາຍປ້ອງກັນຊາດຂັ້ນຮອງລັດຖະມົນຕີກະຊວງປ້ອງກັນປະເທດ ແລະ ຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດຂັ້ນຮອງລັດຖະມົນຕີກະຊວງເສດຖະກິດ; ຜັນຂະຫຍາຍບັນດາໂຄງການເຄື່ອນໄຫວກະທຳກ່ຽວກັບການຮ່ວມມືດ້ານວັດທະນະທຳ, ການສຶກສາ, ບຳລຸງສ້າງ, ວິທະຍາສາດເຕັກໂນໂລຊີ… ທີ່ໄດ້ລົງນາມໃນໂອກາດນີ້ຢ່າງມີປະສິດທິຜົນ”.
ທ່ານປະທານປະເທດ ໃຫ້ຮູ້ວ່າ, 2 ຝ່າຍເຫັນດີຍູ້ວົງເງິນການຄ້າ 2 ສົ້ນໃຫ້ບັນລຸ 6 ຕື້ USD ໃນໄລຍະ 2017 – 2018.
ແລະກໍໃນວັນດຽວກັນ, ທ່ານປະທານປະເທດ ເຈີນດ້າຍກວາງ ໄດ້ມີການພົບປະເຈລະຈາກັບທ່ານປະທານສະພາຕ່ຳ ແລະ ສະພາສູງອີຕາລີ.