(vovworld) – ໃນຕອນບ່າຍວັນທີ 23/4, ທ່ານປະທານປະເທດ ເຈືອງເຕີນຊາງ ສືບຕໍ່ເຂົ້າຮ່ວມວາລະປະຊຸມຄົບຄະນະຄັ້ງທີ 6 ແລະ ວາລະອັດກອງປະຊຸມຂັ້ນສູງ ອາຊີ - ອາຟະລິກາ, ດຳເນີນໄປຢູ່ ອິນໂດເນເຊຍ. ຢູ່ນອກກອງປະຊຸມ, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ມີການແລກປ່ຽນ, ພົບປະກັບບັນດາການນຳ, ຜູ້ຕາງໜ້າປະເທດຕ່າງໆເຂົ້າຮ່ວມກອງປະຊຸມ ອາຊີ - ອາຟະລິກາ.
ທີ່ການພົບປະກັບທ່ານນາຍົກລັດຖະມົນຕີ ຍີ່ປຸ່ນ Shinzo Abe, ທ່ານປະທານປະເທດ ເຈືອງເຕີນຊາງ ໄດ້ແລກປ່ຽນກ່ຽວກັບບັນດາມາດຕະການເພື່ອແນໃສ່ເຮັດໃຫ້ການພົວພັນຄູ່ຮ່ວມມືຍຸດທະສາດ ຫວຽດນາມ - ຍີ່ປຸ່ນ ເລິກເຊິ່ງ, ກ້ວາງຂວາງກ່ວາອີກ, ໃນນັ້ນເນັ້ນໜັກເຖິງຄວາມສຳຄັນຂອງການຮັກສາບັນດາການຢ້ຽມຢາມ, ການພົບປະຂັ້ນສູງ. ທ່ານນາຍົກລັດຖະມົນຕີ Abe ຢັ້ງຢືນວ່າ: ຍີ່ປຸ່ນ ສືບຕໍ່ຮັກສາການຊ່ວຍເຫຼືອທຶນ ODA ໃຫ້ແກ່ ຫວຽດນາມ ຢູ່ໃນລະດັບສູງສຸດ, ໜູນຊ່ວຍ ຫວຽດນາມ ພັດທະນາແບບຍືນຍົງ…
ທີ່ການພົບປະກັບທ່ານປະທານາທິບໍດີ ອິນໂດເນເຊຍ Joko Widodo, ທ່ານປະທານປະເທດ ເຈືອງເຕີນຊາງ ຖືວ່າ: 2 ຝ່າຍຄວນພ້ອມກັນແກ້ໄຂສິ່ງຄົງຄ້າງ, ຊຸກຍູ້ເພື່ອນຳວົງເງິນການຄ້າຂຶ້ນເຖິງ 18 ຕື້ USD ໃນປີ 2018. ກ່ຽວກັບບັນຫາທະເລຕາເວັນອອກ, ການນຳ 2 ທ່ານຢັ້ງຢືນຄວາມສຳຄັນຂອງການຮັບປະກັນສັນຕິພາບ, ສະຖຽນລະພາບ, ຄວາມສະຫງົບ, ປອດໄພ ແລະ ຄວາມເສລີໃນການເດີນເຮືອຢູ່ທະເລຕາເວັນອອກ, ແກ້ໄຂບັນດາຄວາມຂັດແຍ້ງກັນໂດຍສັນຕິວິທີບົນພື້ນຖານກົດໝາຍສາກົນ, ໃນນັ້ນມີສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ບໍ່ນຳໃຊ້ອາວຸດ ຫຼື ນາບຂູ່ນຳໃຊ້ອາວຸດ, ບໍ່ເຮັດໃຫ້ສະພາບການປ່ຽນແປງໄປ, ສ້າງສຳເລັດປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ.
ໃນການຕ້ອນຮັບນາຍົກລັດຖະມົນຕີ ອີຢິບ Ibrahim Mahlab, ທ່ານປະທານປະເທດ ເຈືອງເຕີນຊາງ ຢັ້ງຢືນວ່າ: ອີຢິບ ແມ່ນຄູ່ຮ່ວມມືສຳຄັນຂອງ ຫວຽດນາມ ຢູ່ ອາຟະລິກາ ແລະ ຫວຽດນາມ ປາດຖະໜາຢາກຊຸກຍູ້ການພົວພັນຮ່ວມມືກັບ ອີຢິບ ໃນຂົງເຂດການຄ້າ, ສົ່ງເສີມການລົງທຶນ, ໂທລະຄົມ, ນ້ຳມັນອາຍແກັດ… ສູ້ຊົນຍົກວົງເງິນການຄ້າ 2 ຝ່າຍຂຶ້ນເຖິງ 1 ຕື້USD.
ເມື່ອແລກປ່ຽນກັບທ່ານຮອງນາຍົກລັດຖະມົນຕີ ສ. ເກົາຫຼີ Hwang Woo Yea, ທ່ານປະທານປະເທດ ເຈືອງເຕີນຊາງ ຖືວ່າ: 2 ຝ່າຍຄວນສ້າງສຳເລັດບັນດາລະບຽບການທີ່ຈຳເປັນເພື່ອເຊັນສັນຍາການຄ້າ ເສລີ ຫວຽດນາມ - ສ. ເກົາຫຼີ ໂດຍໄວ, ຫຼັງຈາກນັ້ນໄດ້ຕັ້ງໜ້າຜັນຂະຫຍາຍຢ່າງມີປະສິດທິຜົນເພື່ອໃຫ້ 2 ປະເທດກາຍເປັນບັນດາຄູ່ຮ່ວມມືການຄ້າອັນດັບໜຶ່ງຂອງກັນ.
ແລະກໍ່ໃນວັນດຽວກັນ, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ມີການພົບປະກັບທ່ານລັດຖະມົນຕີການຕ່າງປະເທດ ມາຣົກ, ທ່ານນາຍົກລັດຖະມົນຕີ ສິງກະໂປ, ປາແລດສະຕີນ, ກຳປູເຈຍ ແລະ ທ່ານຮອງນາຍົກລັດຖະມົນຕີ - ລັດຖະມົນຕີການຕ່າງປະເທດ ສປປ ລາວ ທອງລຸນ ສີສຸລິດ.
ທີ່ການພົບປະຄັ້ງຕ່າງໆ, ທ່ານປະທານປະເທດ ເຈືອງເຕີນຊາງ ສະເໜີໃຫ້ບັນດາປະເທດສະໜັບສະໜູນ ຫວຽດນາມ ສະໝັກຮັບເລືອກຕັ້ງເຂົ້າສະພາບໍລິຫານງານ UNESCO (2015 – 2019), ສະພາເສດຖະກິດສັງຄົມ ສປຊ (2016-2018) ແລະ ກຳມະການບໍ່ປະຈຳຂອງສະພາຄວາມໝັ້ນຄົງ ສປຊ (2020 – 2021).