ປະທານປະເທດເຈືອງເຕີນຊາງມອບນາມມະຍົດວິລະຊົນແຮງງານໃຫ້ໂຮງຮຽນມັດທະຍົມຕອນປາຍລົງເລິກວິຊາຟ້ານໂບ້ຍເຈົາ
ທ່ານປະທານປະເທດ ເຈືອງເຕີນຊາງ ໄດ້ມອບນາມມະຍົດວິລະຊົນແຮງງານໃຫ້ແກ່ໂຮງຮຽນ
(vovworld) – ວັນທີ 23/3, ຢູ່ນະຄອນ ວີງ, ແຂວງ ເງ້ອານ, ທ່ານປະທານປະເທດ ເຈືອງເຕີນຊາງ ໄດ້ເຂົ້າຮ່ວມພິທີສະເຫຼີມສະຫຼອງ 50 ປີແຫ່ງວັນສ້າງລະບົບລົງເລິກວິຊາ, 40 ປີແຫ່ງວັນສ້າງຕັ້ງ ໂຮງຮຽນມັດທະຍົມຕອນປາຍລົງເລິກວິຊາ ຟ້ານໂບ້ຍເຈົາ ແລະ ມອບນາມມະຍົດວິລະຊົນແຮງງານໃຫ້ແກ່ໂຮງຮຽນ. ທ່ານປະທານປະເທດ ເຈືອງເຕີນຊາງ ໄດ້ຍ້ອງຍໍຊົມເຊີຍບັນດາຄວາມມານະພະຍາຍາມ ແລະ ຜົນງານຂອງຖັນແຖວພະນັກງານໂຮງຮຽນມັດທະຍົມຕອນປາຍລົງເລິກວິຊາ ຟ້ານໂບ້ຍເຈົາ, ພ້ອມທັງປາດຖະໜາວ່າ ໂຮງຮຽນມັດທະຍົມຕອນປາຍລົງເລິກວິຊາ ຟ້ານໂບ້ຍເຈົາ ເສີມຂະຫຍາຍມູນເຊື້ອ, ບົດຮຽນ ແລະ ຜົນງານທີ່ບັນລຸໄດ້ໃນ 40 ປີຜ່ານມາ, ສືບຕໍມານະພະຍາຍາມສຸ້ຊົນແຂ່ງຂັນສອນດີ, ຮຽນເກັ່ງ, ຍົກສູງຄຸນນະພາບການສຶກສາຢ່າງຮອບດ້ານ, ນຳໜ້າໃນການປະຕິບັດການປ່ຽນໃໝ່ການສຶກສາບຳລຸງສ້າງໂດຍພື້ນຖານ, ຮອບດ້ານ, ຍາມໃດກໍ່ຮັກສາ ແລະ ເສີມຂະຫຍາຍບົດບາດເປັນຄັນທຸງນຳໜ້າໃນຂະແໜງສຶກສາແຂວງ ເງ້ອານ ແລະ ທົ່ວປະເທດ. ທ່ານປະທານປະເທດ ເຈືອງເຕີນຊາງ ສະເໜີໃຫ້ແຂວງ ເງ້ອານ ສືບຕໍ່ຊີ້ນຳ ແລະ ໜູນຊ່ວຍເພື່ອໃຫ້ໂຮງຮຽນປະຕິບັດສຳເລັດໜ້າທີ່ໄດ້ຮັບມອບໝາຍ, ປະກອບສ່ວນບຳລຸງສ້າງແຫຼ່ງຊັບພະຍາກອນມະນຸດມີຄຸນນະພາບສູງ, ບຳລຸງສ້າງຜູ້ມີຄວາມເກັ່ງກ້າສາມາດໃຫ້ແກ່ແຂວງ ແລະ ປະເທດຊາດ. ທ່ານປະທານປະເທດ ເຈືອງເຕີນຊາງ ເຊື່ອໝັ້ນວ່າ: ໂຮງຮຽນມັດທະຍົມຕອນປາຍລົງເລິກວິຊາ ຟ້ານໂບ້ຍເຈົາ ຈະສົມເປັນໂຮງຮຽນລົງເລິກວິຊາໃນບ້ານເກີດເມືອງນອນຂອງປະທານ ໂຮ່ຈີມິນ, ແມ່ນແຫ່ງບຳລຸງສ້າງທີ່ມີຄຸນນະພາບສູງຂອງຂະແໜງສຶກສາ - ບຳລຸງສ້າງ ເງ້ອານ ແລະ ທົ່ວປະເທດ.