(ທ່ານປະທານປະເທດ ຫວຽດນາມ ເຈືອງເຕີ໋ນຊາງ
ພົບປະກັບຜູ້ວ່າການລັດ Hessen ທ່ານ Volker Bouffier)
(vovworld) – ໂດຍສືບຕໍ່ການຢ້ຽມຢາມທາງລັດຖະກິດເຖິງ ເຢຍລະມັນ, ໃນຕອນທ່ຽງວັນທີ 26/11, ທ່ານປະທານປະເທດ ຫວຽດນາມ ເຈືອງເຕີ໋ນຊາງ ແລະ ພັນລະຍາ ໄດ້ອອກຈາກ Berlin ເດີນທາງໄປຢ້ຽມຢາມລັດ Hessen. ທີ່ການພົບປະກັບຜູ້ວ່າການລັດ Hessen ທ່ານ Volker Bouffier, ທ່ານປະທານປະເທດ ເຈືອງເຕີ໋ນຊາງ ຢືນຢັນວ່າ: ຫວຽດນາມ ຍາມໃດກໍຖືເປັນສຳຄັນການພົວພັນຮ່ວມມືກັບລັດ Hessen ແລະ ມີຄວາມປິຕິຊົມຊື່ນເມື່ອເຫັນວ່າ: ການພົວພັນຮ່ວມມືລະຫວ່າງ ຫວຽດນາມ ແລະ ລັດ Hessen ໄດ້ພັດທະນາຢ່າງຕັ້ງໜ້າໃນໄລຍະຜ່ານມາ, ພິເສດແມ່ນໃນຂົງເຂດເສດຖະກິດ - ການຄ້າ - ການລົງທຶນ, ການສຶກສາ - ບຳລຸງສ້າງ, ການຮ່ວມມືດ້ານຕຸລາການ - ກົດໝາຍ ແລະ ພົວພັນແລກປ່ຽນວັດທະນະທຳ. ທ່ານປະທານປະເທດສະເໜີອຳນາດການປົກຄອງລັດ Hessen ສືບຕໍ່ໜູນຊ່ວຍ, ສົ່ງເສີມບັນດາວິສາຫະກິດຂອງລັດ Hessen ລົງທຶນດຳເນີນທຸລະກິດຢູ່ ຫວຽດນາມ, ພ້ອມກັນນັ້ນ ສະໜັບສະໜູນ ແລະ ສ້າງເງື່ອນໄຂໃຫ້ແກ່ບັນດາວິສາຫະກິດ ຫວຽດນາມ ເຄື່ອນໄຫວຢູ່ລັດ Hessen ຢ່າງມີປະສິດທິຜົນ, ປະກອບສ່ວນເພີ່ມທະວີການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດ. ທ່ານປະທານປະເທດ ເຈືອງເຕີ໋ນຊາງ ຢືນຢັນວ່າ: ລັດ ແລະ ລັດຖະບານ ຫວຽດນາມ ຍາມໃດກໍສະໜັບສະໜູນ, ສ້າງສະພາບແວດລ້ອມສະດວກ ເພື່ອໃຫ້ບັນດາວິສາຫະກິດ ເຢຍລະມັນ ເວົ້າລວມ ແລະ ລັດ Hessen ເວົ້າສະເພາະ ມາລົງທຶນ, ດຳເນີນທຸລະກິດອັນຍາວນານຢ່າງມີປະສິດທິຜົນ ແລະ ເປັນປົກກະຕິຢູ່ ຫວຽດນາມ, ກໍຄືສະໜັບສະໜູນບັນດາທ້ອງຖິ່ນ 2 ປະເທດແບ່ງປັນບົດຮຽນໃນບັນດາຂົງເຂດ ຊຶ່ງ 2 ຝ່າຍມີທ່າແຮງ. ກ່ຽວກັບການຮ່ວມມືດ້ານສຶກສາ - ບຳລຸງສ້າງ, ທ່ານປະທານປະເທດ ເຈືອງເຕີ໋ນຊາງ ຕີລາຄາສູງການໜູນຊ່ວຍຂອງລັດ Hessen ໃຫ້ ຫວຽດນາມ ໂດຍຜ່ານໂຄງການ ເປັນແບບຢ່າງນັ້ນ ແມ່ນມະຫາວິທະຍາໄລ ຫວຽດນາມ - ເຢຍລະມັນ.
ເຫັນດີເຫັນພ້ອມກັບບັນດາຄຳເຫັນຂອງທ່ານປະທານປະເທດ ເຈືອງເຕີ໋ນຊາງ, ຜູ້ວ່າການລັດ Hessen ທ່ານ Volker Bouffier ເນັ້ນໜັກວ່າ: ມະຫາວິທະຍາໄລ ຫວຽດນາມ - ເຢຍລະມັນ ແມ່ນໂຄງການມີຄວາມສຳຄັນພິເສດ, ໂຄງການເປັນແບບຢ່າງໃຫ້ການພົວພັນຄູ່ຮ່ວມມືຍຸດທະສາດອັນດີງາມທີ່ສຸດ ແລະ ເລິກເຊິ່ງ ກ້ວາງຂວາງໃນຫລາຍຂົງເຂດລະຫວ່າງ ຫວຽດນາມ - ເຢຍລະມັນ.
ແລະຕອນບ່າຍໃນວັນດຽວກັນ, ທ່ານປະທານປະເທດ ເຈືອງເຕີ໋ນຊາງ ມີການພົບປະກັບທ່ານ Norbert Kartmann ປະທານສະພາແຫ່ງຊາດລັດ Hessen, ທ່ານປະທານປະເທດ ເຈືອງເຕີ໋ນຊາງ ປາດຖະໜາວ່າ: ການນຳ ແລະ ບັນດາສະມາຊິກລັດຖະສະພາລັດ Hessen ສະໜັບສະໜູນເພີ່ມທະວີການຮ່ວມມືລະຫວ່າງລັດຖະສະພາລັດ Hessen ແລະ ສະພາແຫ່ງຊາດ ຫວຽດນາມ.