ປະທານປະເທດເຈືອງເຕີນຊາງຢ້ຽມຢາມແລະອວຍພອນປີໃໝ່ປະຊາຊົນນະຄອນໂຮ່ຈີມິນ
ທ່ານປະທານປະເທດ ເຈືອງເຕີນຊາງ ໄດ້ອວຍພອນປີໃໝ່ຄູນພໍ່ ຫງວຽນກົງແຢງ
(ພາບ: Việt Dũng)
(vovworld) – ເມື່ອລົງຢ້ຽມຢາມ ແລະ ອວຍພອນປີໃໝ່ພະມະຫາອາຈານ ທິກຈີ໋ກວາງ, ຮອງປະທານສະພາບໍລິຫານງານສູນກາງສະມາຄົມພຸດທະສາສະໜາ ຫວຽດນາມ, ຫົວໜ້າຄະນະບໍລິຫານງານສາມາຄົມພຸດທະສາສະໜາ ຫວຽດນາມ ນະຄອນ ໂຮ່ຈີມິນ ໃນຕອນເຊົ້າວັນທີ 30/1, ທ່ານປະທານປະເທດ ເຈືອງເຕີນຊາງ ໄດ້ອວຍພອນໃຫ້ພະມະຫາອາຈານ ແລະ ບັນດາພຸດທະສາສະນິກກະຊົນ ຊຶ່ງໄດ້ພ້ອມກັບສາສະໜາອື່ນໆ ແລະ ທົ່ວປະເທດປະກອບກຳລັງເຫື່ອແຮງ, ສະຕິປັນຍາໃຫ້ແກ່ການພັດທະນາຂອງນະຄອນ ແລະ ຂອງປະເທດຊາດ.
ເມື່ອຢ້ຽມຢາມ ແລະ ອວຍພອນປີໃໝ່ ຄູນພໍ່ ຫງວຽນກົງແຢງ, ປະທານຄະນະກຳມະການສາມັກຄີຊາວຄຼິດ ຫວຽດນາມ, ປະທານຄະນະກຳມະການສາມັກຄີຊາວຄຼິດນະຄອນ ໂຮ່ຈີມິນ ແລະ ບັນດາຄູນພໍ່ໃນຄະນະກຳມະການສາມັກຄີຊາວຄຼິດ, ທ່ານປະທານປະເທດ ເຈືອງເຕີນຊາງ ໄດ້ສະແດງຄວາມເບີກບານມ່ວນຊື່ນເມື່ອຊີວິດການເປັນຢູ່ຂອງຊາວຄຼິດນັບມື້ນັບໄດ້ຮັບການຍົກສູງ ແລະ ຄະນະກຳມະການສາມັກຄີຊາວຄຼິດນະຄອນໄດ້ນຳພາຊາວຄຼິດຕັ້ງໜ້າກໍ່ສ້າງຊີວິດວັດທະນະທຳຢູ່ເຂດຊຸມຊົນ, ຕິດພັນກັບການຢູ່ໃນສິນກິນໃນທຳສ້າງສາສະໜາໃຫ້ດີງາມ. ທ່ານປະທານປະເທດ ເຈືອງເຕີນຊາງ ເວົ້າວ່າ:
“ໃນພາລະກິດສ້າງສາປະເທດຊາດ, ມະຫາສາມັກຄີແມ່ນກຳລັງແຮງແຫ່ງກົກເຄົ້າເຫງົາກໍ່ຂອງປະເທດຊາດ. ພໍ່ແມ່ປະຊາຊົນທຸກຄົນຕ້ອງສາມັກຄີເປັນຈິດໜຶ່ງໃຈດຽວເພື່ອສ້າງສາປະເທດຊາດ”
ກໍ່ໃນຕອນເຊົ້າວັນດຽວກັນ, ທ່ານປະທານປະເທດ ໄດ້ລົງຢ້ຽມຢາມ, ອວຍພອນປີໃໝ່ນັກປະພັນ, ນັກສິລະປິນປະຊາຊົນ ຫວຽນເຈົາ, ນັກສິລະປິນປະຊາຊົນ ຈ່າຢາງ ແລະ ສະແດງຄວາມສົນໃຈເຖິງສິລະປະເດີນກາຕາຍຕື໋, ສິລະປະຂັບກ໋າຍເລືອງ ແລະ ຮູບເງົາ.