(ທ່ານປະທານປະເທດ ຫວຽດນາມ ເຈືອງເຕີ໋ນຊາງ
ກ່າວຄຳເຫັນຊີ້ນຳກອງປະຊຸມໃຫຍ່)
(vovworld) – ຕອນເຊົ້າວັນທີ 26/10, ຢູ່ນະຄອນ ບິ່ງເຢືອງ, ກອງປະຊຸມໃຫຍ່ອົງຄະນະພັກແຂວງ ບິ່ງເຢືອງ ຄັ້ງທີ 10 ອາຍຸການ 2015 – 2020 ຖືກໄຂຂຶ້ນຢ່າງເປັນທາງການ. ທ່ານປະທານປະເທດ ຫວຽດນາມ ເຈືອງເຕີ໋ນຊາງ ໄດ້ເຂົ້າຮ່ວມ ແລະ ຊີ້ນຳກອງປະຊຸມໃຫຍ່. ເຂົ້າຮ່ວມກອງປະຊຸມໃຫຍ່ ຍັງມີອະດີດປະທານປະເທດ ຫວຽດນາມ ຫງວຽນມິງຈ໋ຽດ, ທ່ານນາງຮ່າທິຄ໋ຽດ ເລຂາສູນກາງພັກ ຫົວໜ້າຄະນະຂົນຂວາຍປະຊາຊົນສູນກາງ.
ກ່າວຄຳເຫັນຊີ້ນຳກອງປະຊຸມໃຫຍ່, ທ່ານປະທານປະເທດ ເຈືອງເຕີ໋ນຊາງ ຕັກເຕືອນແຂວງ ບິ່ງເຢືອງ ສຸມໃສ່ປະຕິບັດບັນດາບາດກ້າວບຸກທະລຸຍຸດທະສາດຢ່າງມີປະສິດທິຜົນ, ສ້າງໂຄງປະກອບເສດຖະກິດຄືນໃໝ່ ເພື່ອປ່ຽນໃໝ່ຮູບແບບເຕີບໂຕ ໂດຍພື້ນຖານ ຕາມທິດຍົກສູງສະມັດຕະພາບ, ຄຸນນະພາບ, ມີປະສິດທິຜົນ ແລະ ກຳລັງແກ່ງແຍ້ງ. ທ່ານປະທານປະເທດ ເຈືອງເຕີ໋ນຊາງ ຊີ້ແຈ້ງວ່າ:
“ທາງແຂວງຄວນສືບຕໍ່ກວດກາ, ສ້າງແຜນກຳນົດພັດທະນາບັນດາຂະແໜງການ, ຂົງເຂດຕ່າງໆ, ລະບົບພື້ນຖານໂຄງລ່າງ, ຕົວເມືອງໃຫ້ສົມບູນແບບ. ແຜນກຳນົດພັດທະນາຂອງ ບິ່ງເຢືອງ ຕ້ອງຕິດພັນຢ່າງແໜ້ນແຟ້ນກັບການພັດທະນາລວມຂອງເຂດ, ສ້າງການຮ່ວມສຳພັນລະຫວ່າງຕໍ່ເຂດ, ພິເສດແມ່ນໃນການພັດທະນາລະບົບໂຄງປະກອບໂຄງລ່າງ, ພັດທະນາບັນດາຂະແໜງການ, ຂົງເຂດຕ່າງໆ, ຮັກສາສິ່ງແວດລ້ອມ, ບຳລຸງສ້າງແຫຼ່ງຊັບພະຍາກອນມະນຸດ ແລະ ຍົກສູງຄວາມສາມາດບົ່ມຊ້ອນດ້ານວິທະຍາສາດ - ເຕັກໂນໂລຢີ. ອົງຄະນະພັກແຂວງ ບິ່ງເຢືອງ ຄວນມານະພະຍາຍາມສູ້ຊົນ ດ້ວຍຄວາມຕັດສິນໃຈສູງສຸດ ເພື່ອພັດທະນາຢ່າງວ່ອງໄວ ແລະ ຍືນຍົງ, ກໍ່ສ້າງ ບິ່ງເຢືອງ ກາຍເປັນຕົວເມືອງ ສີວິໄລ ແລະ ທັນສະໄໝ”.
ທ່ານປະທານປະເທດ ເຈືອງເຕີ໋ນຊາງ ກໍ່ຮຽກຮ້ອງອົງຄະນະພັກແຂວງ ບິ່ງເຢືອງ ປະຕິບັດວຽກງານກໍ່ສ້າງພັກໃຫ້ດີກ່ວາອີກ, ຍົກສູງຄວາມສາມາດຊີ້ນຳນຳພາ ແລະ ກຳລັງຕໍ່ສູ້ຂອງທົ່ວອົງຄະນະພັກ. ກອງປະຊຸມໃຫຍ່ອົງຄະນະພັກແຂວງ ບິ່ງເຢືອງ ຈະດຳເນີນຮອດວັນທີ 27/10/2015 ຈຶ່ງອັດລົງ.