(vovworld) - ຕອນເຊົ້າວັນທີ 1/8, ຢູ່ສຳນັກງານປະທານປະເທດ, ທ່ານປະທານປະເທດເຈືອງເຕິ໋ນຊາງ, ຫົວໜ້າຄະນະຊີ້ນຳປະຕິຮູບດ້ານຕຸລາການສູນກາງໄດ້ ເຮັດວຽກກັບສະຫະພັນທະນາຍຄວາມຫວຽດນາມ ກ່ຽວກັບຜົນແຫ່ງການປະຕິບັດງານໃນອາຍຸການທີໜຶ່ງ ແລະ 6 ເດືອນຕົ້ນປີ.
ກ່າວຄວາມເຫັນທີ່ການເຮັດວຽກ, ທ່ານ ປະທານປະເທດເຈືອງເຕິ໋ນຊາງເນັ້ນໜັກເຖິງທີ່ຕັ້ງ, ບົດບາດຂອງທະນາຍຄວາມໃນການປົກປ້ອງຄວາມຍຸຕິທຳ, ມະນຸດ, ລະບອບກົດໝາຍສັງຄົມນິຍົມ ແລະ ຢືນຢັນວ່າ, ພັກ, ລັດເອົາໃຈໃສ່ທີ່ສຸດເຖິງການສ້າງຖັນແຖວທະນາຍຄວາມຕາມຍຸດທະສາດປະຕິຮູບດ້ານຕຸລາການເຖິງປີ 2020. ທ່ານປະທານກໍ່ໄດ້ຊົມເຊີຍການເຄື່ອນໄຫວຂອງທະນາຍຄວາມໃນໄລຍະຜ່ານມາ ເຊິ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການຈຳກັດຄວາມຜິດພາດໃນການຕັດສິນລົງໂທດ, ປົກປ້ອງຄວາມຍຸຕິທຳ.
“ໄລຍະຜ່ານມາ, ທະນາຍຄວາມໄດ້ມີຜົນງານຫຼາຍຢ່າງໃນການຄົ້ນພົບກໍລະນີ ຖືກຕັດສິນລົງໂທດຢ່າງຜິດພາດ, ຫຼືລອດອາດສະຍາກອນ, ໝາຍຄວາມວ່າປົກປ້ອງຄວາມຍຸຕິທຳ. ນີ້ແມ່ນໝາກຜົນແຫ່ງການສົມທົບລະຫວ່າງການສືບສວນຄະດີ ແລະ ການຟ້ອງຄະດີຢູ່ໃນສານ, ຕາມແຜນນະໂຍບາຍຂອງພັກ ແລະ ລັດ. ນີ້ແມ່ນພື້ນຖານເພື່ອປົກປ້ອງຄວາມຍຸຕິທຳ, ປົກປ້ອງສິດທິມະນຸດ“.
ທ່ານປະທານຖືວ່າໄລຍະຈະມາເຖິງ, ສະຫະພັນທະນາຍຄວາມຄວນມີການສົມທົບຢ່າງແໜ້ນແຟ້ນກັບບັນດາອົງການ, ຂະແໜງການ ກໍ່ຄືທ້ອງຖີ່ນຕ່າງໆ, ຕັ້ງໜ້າເຂົ້າຮ່ວມການປັບປຸງລະບົບກົດໝາຍ, ເປີດກວ້າງການຮ່ວມມືກັບສາກົນ ເພື່ອສາມາດເຂົ້າຮ່ວມການແກ້ໄຂຄວາມຂັດແຍ້ງກັນຢູ່ໂລກໃນສະພາບປະເທດນັບມື້ນັບເຊື່ອມໂຍງຢ່າງເລິກເຊິ່ງກັບໂລກ.