ປະທານປະເທດເຈືອງເຕິ໋ນຊາງໄປຢ້ຽມຢາມ ແລະ ເຮັດວຽກຢູ່ແຂວງຮ່າຢາງ
ທ່ານ ປະທານປະເທດເຈືອງເຕິ໋ນຊາງ ຢ້ຽມຢາມປ້ອມປ້ອງກັນຊາຍແດນ ດົ່ງວັນ
(ພາບ:tienphong.vn)
(vovworld) - ໂດຍສືບຕໍ່ການໄປປະຕິບັດງານຢູ່ບັນດາແຂວງທາງພາກເໜືອ, ວັນທີ 12 ແລະ 13/1, ທ່ານ ປະທານປະເທດເຈືອງເຕິ໋ນຊາງໄດ້ລົງກວດກາເຂດຊາຍແດນ, ຢ້ຽມຢາມ ແລະ ອວຍພອນປີໃໝ່ບັນດາຄອບຄົວນະໂຍບາຍ, ຄອບຄົວທີ່ທຸກຍາກ ແລະ ບັນດານັກຮົບປ້ອງກັນຊາຍແດນໃນເຂດຊາຍແດນແຂວງຮ່າຢາງ. ໃນການເຮັດວຽກຢູ່ຕາແສງ ນຽມຕ່ອງ, ເມືອງແມ່ວຫວາກ, ແຂວງຮ່າຢາງ. ທ່ານປະທານເນັ້ນໜັກວ່າ ທາງທ້ອງຖີ່ນຕ້ອງເສີມຂະຫຍາຍທ່າແຮງຂອງຕົນ ເພື່ອຫັນຈາກການຜະລິດແບບກຸ້ມຕົນເອງໄປສູ່ການຜະລິດເປັນສິນຄ້າ, ໃນນັ້ນເອົາໃຈໃສ່ເຖິງການຮຳ່ຮຽນເອົາບົດຮຽນຈາກທ້ອງຖີ່ນຕ່າງໆ.
“ທ່າແຮງຂອງແມ່ວຫວາກ ແມ່ນປູກສາລີ ແລະ ລ້ຽງສັດອີກ. ດັ່ງນັ້ນຕ້ອງກວດຄືນທ່າແຮງຂອງຕົນເພື່ອພະຍາຍາມເສີມຂະຫຍາຍ. ຝ່າຍຈີນປູກສາລີແນວໃຫ້ສະມັດຕະພາບສູງ, ພວກເຮົາຄວນພະຍາຍາມຮຳ່ຮຽນເອົາບົດຮຽນຂອງເຂົາເຈົ້າ, ນຳແນວພັນໃໝ່ເຂົ້າໃນການປູກຝັງ, ເຮັດຄືແນວນັ້ນ, ຊີວິດຂອງປະຊາຊົນຈຶ່ງໄດ້ຮັບການປັບປຸງໃຫ້ດີຂຶ້ນ“.
ຢູ່ຕາແສງຫວຽດເລີມ, ເມືອງວິຊວຽນ ໃນເຂດຊາຍແດນ, ທ່ານປະທານກໍ່ຍ້ອງຍໍສັນລະເສີນຄວາມສາມັກຄີ, ເປັນຈິດໜຶ່ງໃຈດຽວຂອງອຳນາດການປົກຄອງ ແລະ ປະຊາຊົນໃນການຮ່ວມແຮງຮ່ວມໃຈກໍ່ສ້າງຊົນນະບົດໃໝ່.
ໃນໂອກາດບຸນປີໃໝ່, ປີມະເມຍ 2014, ທ່ານປະທານປະເທດເຈືອງເຕິ໋ນຊາງ ໄດ້ມອບຂອງຂວົນໃຫ້ບັນດາຄອບຄົວທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດ ແລະ ມອບຂອງຂວັນ 300 ພູດ, ຜ້າຫົ່ມ 200 ຄັນ ໃຫ້ບັນດາຄອບຄົວທຸກຍາກ ແລະ ຄອບຄົວນະໂຍບາຍຂອງແຂວງຮ່າຢາງ ແລະ ອວຍພອນໃຫ້ພໍ່ແມ່ປະຊາຊົນຢູ່ທີ່ນີ້ ໄດ້ຕ້ອນຮັບບຸນປີໃໝ່ປະຈຳຊາດດ້ວຍຄວາມເບີກບານມ່ວນຊື່ນ ແລະ ມີຄວາມ ສຸກ.