(vovworld) – ວັນທີ 17/12, ຄະນະຜູ້ແທນຂັ້ນສູງສະພາສູງລາຊະອານາຈັກ ກຳປູເຈຍ ໂດຍທ່ານປະທານສະພາສູງ Samdech Say Chhum ນຳໜ້າ, ໄດ້ເດີນທາງອອກຈາກ ຮ່າໂນ້ຍ ສິ້ນສຸດການຢ້ຽມຢາມ ຫວຽດນາມ ຢ່າງເປັນທາງການ ຕາມຄຳເຊີນຂອງທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ. ໃນການຢ້ຽມຢາມ ຫວຽດນາມ ເປັນເວລາ 3 ວັນ, ທ່ານປະທານສະພາສູງ ລາຊະອານາຈັກ ກຳປູເຈຍ Samdech Say Chhum ໄດ້ພົບປະເຈລະຈາກັບທ່ານປະທານສະພາແຫ່ງຊາດ ຫງວຽນຊິງຮຸ່ງ, ເຂົ້າຢ້ຽມຂ່ຳນັບທ່ານເລຂາທິການໃຫຍ່ ຫງວຽນຟູຈ້ອງ, ທ່ານປະທານປະເທດ ເຈືອງເຕີ໋ນຊາງ ຕາມພິທີການທູດ, ພົບປະກັບທ່ານນາຍົກລັດຖະມົນຕີ ຫງວຽນເຕີ໋ນຢຸງ, ພົບປະກັບທ່ານຮອງປະທານສະພາແຫ່ງຊາດ, ປະທານກຸ່ມສະມາຊິກລັດຖະສະພາມິດຕະພາບ ຫວຽດນາມ - ກຳປູເຈຍ ຮູນງ້ອກເຊີນ. ທີ່ບັນດາການພົບປະ, ເຈລະຈາ, 2 ຝ່າຍເຫັນດີເປັນເອກະພາບຕໍ່ເນື້ອໃນສຳຄັນຫລາຍຢ່າງກ່ຽວກັບການຮ່ວມມືຮອບດ້ານລະຫວ່າງສະພາແຫ່ງຊາດ 2 ປະເທດ. 2 ຝ່າຍປິຕິຊົມຊື່ມຕໍ່ບັນດາບາດກ້າວພັດທະນາອັນດີງາມລະຫວ່າງອົງການນິຕິບັດຍັດ 2 ປະເທດໃນໄລຍະຜ່ານມາ. 2 ຝ່າຍເຫັນດີເປັນເອກະສັນແລກປ່ຽນຄະນະຜູ້ແທນທຸກຂັ້ນ, ການຮ່ວມມືບຳລຸງສ້າງຊັບພະຍາກອນມະນຸດ, ແບ່ງປັນບົດຮຽນນິຕິບັນຍັດ ແລະ ຕິດຕາມກວດກາ, ສະໜັບສະໜູນ ແລະ ໜູນຊ່ວຍເຊິ່ງກັນ ແລະ ກັນໃນເວທີສາກົນ ແລະ ພາກພື້ນຢ່າງຕັ້ງໜ້າຄື: ສະມັດຊາລັດຖະສະພາລະຫວ່າງຊາດ ອາຊຽນ, ສະຫະພັນລັດຖະສະພາສາກົນ ເປັນປະຈຳ. 2 ຝ່າຍກໍເຫັນດີເພີ່ມທະວີການຮ່ວມມືແບ່ງປັນທັດສະນະ, ທາບທາມຄຳເຫັນເຊິ່ງກັນ ແລະ ກັນກ່ຽວກັບບັນດາບັນຫາສາກົນເຊິ່ງຕ່າງຝ່າຍຕ່າງມີຄວາມສົນໃຈ.