(vovworld) - ຕອນເຊົ້າວັນທີ 25/06, ຢູ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ໃຫ້ການຕ້ອນຮັບບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງຫວຽດນາມ ປະຈຳຕາງປະເທດ ອາຍຸການ 2013 – 2016. ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ອວຍພອນບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງຫວຽດນາມ ປະຈຳຕ່າງປະເທດ ທີ່ໄດ້ຮັບການແຕ່ງຕັ້ງໃນຄັ້ງນີ້ ແລະ ເນັ້ນໜັກວ່າ ນີ້ແມ່ນໜ້າທີ່ອັນສະຫງ່າເຊິ່ງພັກ, ລັດ ແລະ ປະຊາຊົນໄດ້ມອບໝາຍໃຫ້ບັນດາເອກອັກຄະລັດຖະທູດ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະເໜີໃຫ້ບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງຫວຽດນາມ ຍາດແຍ່ງເວລາ ແລະ ຂົນຂວາຍການສະໜັບສະໜູນຂອງບັນດາປະເທດ ແລະ ປະຊາຄົມສາກົນທ່ມີຕໍ່ ຫວຽດນາມ ຢ່າງຕັ້ງໜ້າ ນັບທັງດ້ານການເມືອງ ແລະ ເສດຖະກິດ, ປະກອບສ່ວນເຂົ້າໃນວິວັດການເຊື່ອມໂຍງ, ສ້າງສາ ແລະ ພັດທະນາປະເທດຊາດ; ພ້ອມທັງຕັ້ງໜ້າໜູນຊ່ວຍຊາວຫວຽດນາມ ອາໄສຢູ່ຕ່າງປະເທດ ແລະ ປົກປ້ອງພົນລະເມືອງ, ເປັນບ່ອນອິງທັງດ້ານຈິດໃຈ, ຂໍ້ມູນ, ນິຕິກຳ ໃຫ້ແກ່ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ແລະ ວິສາຫະກິດຫວຽດນາມ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ເອົາໃຈໃສ່ວ່າ, ບັນດາເອກອັກຄະລັດຖະທູດ, ຫົວໜ້າອົງການຕາງໜ້າຂອງຫວຽດນາມ ປະຈຳຕ່າງປະເທດ ສົມທົບກັນກັບກຳມາທິການການຕ່າງປະເທດ ແລະ ຫ້ອງວ່າການສະພາແຫ່ງຊາດຢ່າງແໜ້ນແຟ້ນ ເພື່ອເພີ່ມທະວີການພົວພັນລະຫວ່າງສະພາແຫ່ງຊາດຫວຽດນາມ ກັບບັນດາອົງການນິຕິບັນຍັດຢູ່ປະເທດເຫຼົ່ານັ້ນ; ສ້າງຕັ້ງການພົວພັນອັນດີງາມກັບບັນດາສະມາຊິກສະພາແຫ່ງຊາດ, ກຸ່ມສະມາຊິກສະພາແຫ່ງຊາດມິດຕະພາບຂອງບັນດາປະເທດ, ເພື່ອປະກອບສ່ວນນຳການຮ່ວມມືລັດຖະສະພາ ເຂົ້າສູ່ລວງເລິກ, ແທດຈິງ ແລະ ໝັ້ນຄົງ.