(vovworld) – ຕອນເຊົ້າວັນທີ 24/2 ເມື່ອເຮັດວຽກກັບການນຳແຂວງ ຮ່າຕີ້ງ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ ໄດ້ຍ້ອງຍໍຊົມເຊີຍ ແລະ ຕີລາຄາສູງແຂວງບັນລຸໄດ້ຜົນງານຫຼາຍຢ່າງກ່ຽວກັບດ້ານເສດຖະກິດ, ສັງຄົມທີ່ສຳຄັນໃນສະພາບການພື້ນຖານເສດຖະກິດທົ່ວປະເທດພວມປະສົບກັບຄວາມຫຍຸ້ງຍາກ ຍ້ອນຜົນສະທ້ອນຈາກການຊຸດຊົມເສດຖະກິດໃນທົ່ວໂລກ. ທ່ານປະທານສະພາແຫ່ງຊາດ ຫງວຽນຊິງຮູ່ງ ສະເໜີໃຫ້ແຂວງ ຮ່າຕີ້ງ ໃນປີ 2013 ຄວນປະຕິບັດ 3 ບັນຫາເປັນຢ່າງດີ ເຊິ່ງລວມມີ: ຈັດຕັ້ງການຮັບເອົາຄຳເຫັນຂອງປະຊາຊົນ ກ່ຽວກັບຮ່າງລັດຖະທຳມະນູນປີ 1992 ສະບັບປັບປຸງ, ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ), ຊຸກຍູ້ການພັດທະນາເສດຖະກິດ - ສັງຄົມ ແລະ ສືບຕໍ່ຜັນຂະຫຍາຍມະຕິສູນກາງພັກຄັ້ງທີ 4 ກ່ຽວກັບວຽກງານກໍ່ສ້າງພັກ ຢ່າງມີປະສິດທິຜົນ.
ແລະກໍ່ໃນຕອນເຊົ້າວັນດຽວກັນ, ທ່ານປະທານສະພາແຫ່ງຊາດ ຫງວຽນຊິງຮູ່ງ ໄດ້ລົງກວດກາຄວາມຄືບໜ້າໃນການປະຕິບັດໂຄງການຍົກລະດັບເປີດກ້ວາງທາງຫຼວງ 1A ຕອນທິດໃຕ້ຂົວ ເບ໋ນຖູຍ (Ben Thuy).
ກ່ອນໜ້ານັ້ນ, ໃນຕອນຄຳ່ວັນທີ 23/2, ທ່ານປະທານສະພາແຫ່ງຊາດ ຫງວຽນຊິງຮູ່ງ ໄດ້ເຂົ້າຮ່ວມພິທີສະເຫຼີມສະຫຼອງ 1.300 ປີແຫ່ງວັນລຸກຮືຂຶ້ນ ຮວານເຈົາ (Hoan Chau) ແລະ ງານບຸນ ວິຫານ ເຈົ້າຊີວິດ ມາຍຮັກເດ໋ (Mai Hac De) (ຫຼືມາຍທຸກລວານ (Mai Thuc Loan) ຢູ່ເມືອງນາມດ່ານ, ແຂວງ ເງ້ອານ. ກ່າວຄຳເຫັນນະພິທີ, ທ່ານປະທານສະພາແຫ່ງຊາດ ຫງວຽນຊິງຮູ່ງ ເນັ້ນໜັກວ່າ:
“ການລຸກຮືຂຶ້ນ ຮວານເຈົາ ພ້ອມກັບຄວາມອົງອາດກະແກ່ນຂອງ ມາຍທຸກລວານ (Mai Thuc Loan) ໄດ້ສ້າງໜ້າປະຫວັດສາດສືບທອດມູນເຊື້ອອົງອາດກ້າຫານໃນປະຫວັດສາດແຫ່ງການຕ້ານສັດຕູຜູ້ຮຸກຮານ, ຍາດເອົາເອກະລາດຂອງຊາດ, ສ້າງຂີດໝາຍຢ່າງເລິກເຊິ່ງໃຫ້ແກ່ປະຊາຊົນແຂວງເງ້ອານແຕ່ລະຄົນ ແລະ ຊາດ ຫວຽດນາມ. ພັນປີທີ່ຜ່ານມາ, ມູນເຊື້ອນັ້ນໄດ້ກ່າຍເປັນກຳລັງແຮງທີ່ໃຫຍ່ຫຼວງ, ອັນໄດ້ເຮັດໃຫ້ປະຊາຊົນແຂວງເງ້ອານ ແລະ ທົ່ວຊາດ ຫວຽດນາມ ສືບທອດ, ເສີມຂະຫຍາຍໃນພາລະກິດຕໍ່ສູ້ປົກປັກຮັກສາ, ກໍ່ສ້າງ ແລະ ພັດທະນາບ້ານເກີດເມືອງນອນ ”