(vovworld) - ໂດຍສືບຕໍ່ການຢ້ຽມຢາມ ແລະ ເຮັດວຽກຢູ້ແຂວງບັກກ້ານ, ຕອນເຊົ້າວັນທີ 30/12, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ລົງຢ້ຽມຢາມ ແລະ ພົບປະກັບຜູ້ມີສິດເລືອກຕັ້ງຕາແສງ ກວາງທ້ວນ (Quang Thuan), ເມືອງ ແບກທົງ (Bach Thong). ທ່ານປະທານສະພາແຫ່ງຊາດຫງວຽນຊິງຮຸ່ງ ໄດ້ຮັບຟັງຄຳຄິດຄຳເຫັນຂອງບັນດາຜູ້ມີສິດເລືອກຕັ້ງ ເຊິ່ງແມ່ນປະຊາຊົນເຜົ່າສ່ວນນ້ອຍ ກ່ຽວກັບການຜະລິດ, ຊີວິດການເປັນຢູ່ ແລະ ສະແດງຄວາມພາກພູມໃຈເມື່ອເຫັນວ່າ ໃນຫຼາຍປີມານີ້ ຕາແສງ ກວາງທ້ວນ ແມ່ນໜຶ່ງໃນບັນດາຕາແສງນຳໜ້າໃນການກໍ່ສ້າງຊົນນະບົດໃໝ່ຂອງແຂວງ ບັກກ້ານ. ທ່ານປະທານສະພາແຫ່ງຊາດ ສະເໜີໃຫ້ພໍ່ແມ່ປະຊາຊົນຕາແສງກວາງທ້ວນ ສືບຕໍ່ເສີມຂະຫຍາຍມູນເຊື້ອປະຕິວັດ, ກໍ່ສ້າງທ້ອງຖິ່ນໃຫ້ນັບມື້ນັບຮັ່ງມີເຂັ້ມແຂງ.
ກ່ອນໜ້ານັ້ນ, ຕອນຄໍ່າວັນທີ 29/12, ຢູ່ເທດສະບານ ບັກກ້ານ, ແຂວງ ບັກກ້ານ ໄດ້ຈັດພິທີຕ້ອນຮັບໃບຮັບຮອງເຂດປູຊະນີຍະສະຖານລະດັບຊາດພິເສດໃຫ້ໜອງ ບາເບ (Ba Be) ແລະ ຂໍ້ຕົກລົງຮັບຮອງເອົາຕາແສງ ບັກກ້ານ ແມ່ນເຂດຕົວເມືອງລະດັບ 3 ສັງກັດແຂວງບັກກ້ານ. ກ່າວຄຳເຫັນທີ່ພິທີ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ເນັ້ນໜັກວ່າ.
“ເຫດການໜອງ ບາເບ ໄດ້ຮັບຮອງເປັນປູຊະນີຍະສະຖານລະດັບຊາດພິເສດ ຈະເປີດກາລະໂອກາດໃຫຍ່ເພື່ອໃຫ້ແຂວງບັກກ້ານ ເສີມຂະຫຍາຍ, ອະນຸລັກຮັກສາ ແລະ ຂຸດຄົ້ນຄວາມສາມາດບົມຊ້ອນປູຊະນີຍະສະຖານທຳມະຊາດ, ຊຸກຍູ້ການພັດທະນາເສດຖະກິດສັງຄົມ. ຂ້າພະເຈົ້າເຊື່ອໝັ້ນວ່າ, ອົງຄະນະພັກ ແລະ ປະຊາຊົນບັນດາເຜົ່າແຂວງບັກກ້ານ ຈະສືບຕໍ່ເສີມຂະຫຍາຍມູນເຊື້ອຂອງບ້ານເກີດເມືອງນອນປະຕິວັດ, ສືບຕໍ່ຍູ້ແຮງກິດຈະການປ່ຽນໃໝ່ຢ່າງຮອບດ້ານ, ປະຕິບັດໜ້າທີ່ພັດທະນາເສດຖະກິດສັງຄົມ, ປ້ອງກັນຊາດ ປ້ອງກັນຄວາມສະຫງົບຢ່າງມີປະສິດທິຜົນ, ຍູ້ແຮງວຽກງານລົບລ້າງຄວາມອຶດຫິວ ຫຼຸດຜ່ອນຄວາມທຸກຍາກ, ຍົກສູງຊີວິດການເປັນຢູ່ຂອງປະຊາຊົນ, ນຳແຂວງບັກກ້ານ ໃຫ້ຫຼຸດພົ້ນອອກຈາກແຂວງທຸກຍາກ ແລະ ທຸກຍາກເປັນພິເສດຢ່າງໄວ”.