(vovworld) - ຕອນເຊົ້າວັນທີ 5/12, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ແລະ ບັນດາສະມາຊິກໃນຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ເລີ່ມຕົ້ນການຢ້ຽມຢາມຍີ່ປຸ່ນ ຢ່າງເປັນທາງການ ແຕ່ວັນທີ 5 – 8/12, ຕາມຄຳເຊີນຂອງທ່ານປະທານສະພາສູງຍີ່ປຸ່ນ Hirata Kenji. ຫວຽດນາມ ແລະ ຍີ່ປຸ່ນ ໄດ້ສ້າງຕັ້ງສາຍພົວພັນທາງການທູດໃນເດືອນ 9/1973, ແຕ່ປີ 1992 ມາຮອດປະຈຸບັນ, ການພົວພັນຮ່ວມມື, ມິດຕະພາບລະຫວ່າງສອງປະເທດໄດ້ຮັບການປັບປຸງ, ພັດທະນາຢ່າງບໍ່ຢຸດຢັ້ງ ໃນທຸກຂົງເຂດຄື ການເມືອງ, ເສດຖະກິດ, ວັດທະນະທຳ, ການສຶກສາ… ຍີ່ປຸ່ນ ແມ່ນຄູ່ຮ່ວມມືເສດຖະກິດສຳຄັນອັນດັບໜຶ່ງຂອງຫວຽດນາມ ແລະ ແມ່ນປະເທດ G7 ທຳອິດທີ່ໄດ້ຮັບຮູ້ກົນໄກເສດຖະກິດການຕະຫຼາດຂອງຫວຽດນາມ (10/2011). ມາຮອດປະຈຸບັນ, ຍີ່ປຸ່ນແມ່ນປະເທດອຸປະຖຳ ODA ໃຫຍ່ອັນດັບໜຶ່ງຂອງຫວຽດນາມ ແລະ ແມ່ນນັກລົງທຶນອັນໜຶ່ງຢູ່ຫວຽດນາມ, ແມ່ນຄູ່ຮ່ວມມືດ້ານການຄ້າໃຫຍ່ອັນດັບທີ່ 3 ຂອງຫວຽດນາມ.
ຕອນບ່າຍວັນທີ 5/12, ຢູ່ສຳນັກງານສະພາສູງຍີ່ປຸ່ນ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ມີການເຈລະຈາກັບທ່ານປະທານສະພາສູງຍີ່ປຸ່ນ Hirata Kenji. ກ່າວຄຳເຫັນທີ່ການເຈລະຈາ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ ການຢ້ຽມຢາມຄັ້ງນີ້ຂອງຄະນະຜູ້ແທນແມ່ນເພື່ອແນໃສ່ເພີ່ມທະວີການພົວພັນຄູ່ຮ່ວມມືຍຸດທະສາດລະຫວ່າງສອງປະເທດທີ່ນັ້ບມື້ນັບໄດ້ຮັບການພັດທະນາຢ່າງຮອບດ້ານໃນທຸກຂົງເຂດ; ພ້ອມທັງຍູ້ແຮງສາຍພົວພັນມິດຕະພາບ, ການຮ່ວມມືລະຫວ່າງສະພາແຫ່ງຊາດຫວຽດນາມ ແລະ ສະພາສູງຍີ່ປຸ່ນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ເນັ້ນໜັກວ່າ, ສອງປະເທດຄວນສົມທົບກັນເພື່ອຈັດຕັ້ງປີມິດຕະພາບຫວຽດນາມ - ຍີ່ປຸ່ນ ໃຫ້ສຳເລັດຜົນ ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດໃນປີ 2013. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຊີ້ແຈ້ງວ່າ, ລັດຖະບານ ແລະ ປະຊາຊົນຫວຽດນາມ ໄດ້ຖືເປັນສຳຄັນ ແລະ ປາດຖະນາຢາກເຮັດໃຫ້ສາຍພົວພັນມິດຕະພາບ ແລະ ການຮ່ວມມືຮອບດ້ານກັບ ຍີ່ປຸ່ນ ນັບມື້ນັບເລິກເຊິ່ງກວ່າອີກ, ແລະຖືວ່ານີ້ແມ່ນບຸລິມະສິດອັນດັບໜຶ່ງໃນນະໂຍບາຍການຕ່າງປະເທດຂອງຫວຽດນາມ. ສະເໜີບັນດາເນື້ອໃນເພື່ອແນໃສ່ຍົກສູງປະສິດທິຜົນຂອງການພົວພັນຄູ່ຮ່ວມມືຍຸດທະສາດ, ທ່ານປະທານສະພາແຫ່ງຊາດ ສະເໜີໃຫ້ສອງປະເທດ ຄວນເພີ່ມທະວີການຢ້ຽມຢາມ, ການພົບປະຕ່າງໆ ລະຫວ່າງສອງຝ່າຍ, ໂດຍສະເພາະແມ່ນລະຫວ່າງບັນດາກຸ່ມສະມາຊິກສະພາມິດຕະພາບ; ບັນດາຄະນະກຳມາທິການສະພາແຫ່ງຊາດ ເພື່ອແລກປ່ຽນ ແລະ ແບ່ງປັນບົດຮຽນດ້ານນິຕິບັນຍັດ… ທ່ານປະທານສະພາແຫ່ງຊາດ ຫງວຽນຊິງຮຸ່ງ ຂອບອົກຂອບໃຈລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ສືບຕໍ່ສະຫງວນທຶນ ODA ໃນລະດັບສູງໃຫ້ແກ່ຫວຽດນາມ ແລະ ຊີ້ແຈ້ງວ່າ ຍາມໃດຫວຽດນາມ ກໍຖືເປັນສຳຄັນການຄຸ້ມຄອງ ແລະ ນຳໃຊ້ແຫຼ່ງທຶນດັ່ງກ່າວຢ່າງມີປະສິດທິຜົນ ແລະ ຖືກຕາມເປົ້າໝາຍ.
ສ່ວນທ່ານປະທານສະພາສູງ Hirata Kenji ກໍ່ເນັ້ນໜັກວ່າ, ເລື່ອງເພີ່ມທະວີການພົວພັນຮ່ວມມືກັບຫວຽດນາມ ແມ່ນປະກອບສ່ວນເປີດກວ້າງ ແລະ ພັດທະນາການພົວພັນກັບຍີ່ປຸ່ນ ໃນເຂດອາຊີຕາເວັນອອກສ່ຽງໃຕ້ ເພື່ອສັນຕິພາບ, ມິດຕະພາບ ແລະ ການພັດທະນາ. ຍີ່ປຸ່ນຈະສືບຕໍ່ເພີ່ມທະວີແຫຼ່ງທຶນ ODA ໃຫ້ແກ່ຫວຽດນາມ, ພ້ອມທັງສະແດງຄວາມຫວັງວ່າຫວຽດນາມ ຈະຈັດຕັ້ງ ແລະ ນຳໃຊ້, ຄຸ້ມຄອງແຫຼ່ງທຶນນີ້ຢ່າງມີປະສິດທິຜົນທີ່ສຸດ. ທ່ານກໍ່ໄດ້ສະເໜີໃຫ້ສະພາແຫ່ງຊາດ, ລັດຖະບານຫວຽດນາມສືບຕໍ່ປັບປຸງສະພາບແວດລ້ອມແຫ່ງການລົງທຶນ, ສ້າງເງື່ອນໄຂສະດວກໃຫ້ບັນດາວິສາຫະກິດສອງປະເທດຊຸກຍູ້ບັນດາໂຄງການຮ່ວມມື.
ກ່ອນໜ້ານັ້ນ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ຄະນະໄດ້ໄປຢ້ຽມຢາມພະນັກງານ, ພາລະກອນສະຖານທູດຫວຽດນາມ ປະຈຳຍີ່ປຸ່ນ ແລະ ຜູ້ຕາງໜ້າຊາວຫວຽດນາມ ອາໄສຢູ່ໂຕກຽວ. ທ່ານປະທານສະພາແຫ່ງຊາດຢືນຢັນວ່າ ແຜນນະໂຍບາຍຂອງພັກ, ລັດ ແມ່ນຍາມໃດກໍ່ສ້າງເງື່ອນໄຂສະດວກ ເພື່ອໃຫ້ປະຊາຄົມຊາວຫວຽດນາມ ຢູ່ຕ່າງປະເທດມີຊີວິດເປັນປົກກະຕິ, ເຊື່ອມໂຍງເຂົ້າສັງຄົມຂອງປະເທດທີ່ເຂົາເຈົ້າອາໄສຢູ່, ຊ່ວຍປະຊາຄົມຮັກສາ ແລະ ເສີມຂະຫຍາຍສີສັນວັດທະນະທຳຂອງຊາດ, ອ່ວາຍເມືອຫາປະເທດຊາດ.