ການປະຊຸມຂ່າວພາຍຫຼັງການເຈລະຈາລະຫວ່າງ ການນຳສະພາແຫ່ງຊາດ 2 ປະເທດ
|
(vovworld) - ວັນທີ 12/4, ຢູ່ນະຄອນຫຼວງ ປຣາຮາ, ໄດ້ດຳເນີນພິທີຕ້ອນຮັບທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ໄປຢ້ຽມຢາມສຳນັກງານສະພາແຫ່ງຊາດ ສ. ເຊັກໂກ ຢ່າງເປັນທາງການ. ທີ່ການເຈລະຈາກັບທ່ານປະທານສະພາສູງ ເຊັກໂກ Milan Stech ໄດ້ເຫັນດີກ່ຽວກັບການຮ່ວມມືລະຫວ່າງສະພາແຫ່ງຊາດ 2 ປະເທດ, ອົງການນິຕິບັນຍັດ 2 ປະເທດຄວນສືບຕໍ່ປັບປຸງ ແລະ ເພີ່ມທະວີການພົວພັນໃນບັນດາເວທີປາໄສລັດຖະສະພາຫຼາຍຝ່າຍເຊິ່ງສະພາແຫ່ງຊາດ 2 ປະເທດເປັນສະມາຊິກຄື IPU, ASEP, ພ້ອມກັນນັ້ນ, ສືບຕໍ່ຮັກສາການແລກປ່ຽນຄະນະຜູ້ແທນຂັ້ນສູງ ແລະ ບັນດາອົງການຂອງສະພາແຫ່ງຊາດ. ພາຍຫຼັງການເຈລະຈາ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະ ທ່ານປະທານສະພາສູງ Milan Stech ເປັນປະທານການປະຊຸມຂ່າວ, ໃນນັ້ນຢັ້ງຢືນ 2 ຝ່າຍລ້ວນແຕ່ບັນລຸໄດ້ຄວາມເຫັນດີເຫັນພ້ອມສູງກ່ຽວກັບຫຼາຍຂົງເຂດທີ່ໄດ້ປຶກສາຫາລື ແລະ ຄວາມສາມາດບົ່ມຊ້ອນໃນການຮ່ວມມືຂອງ 2 ຝ່າຍແມ່ນໃຫຍ່ຫຼວງທີ່ສຸດ. ທ່ານນາງປະທານສະພາແຫ່ງຊາດ ຫງວຽນທິກິມເງິນ ຢັ້ງຢືນວ່າ:
“ຂ້າພະເຈົ້າ ແລະ ປະທານສະພາສູງ ສ. ເຊັກໂກ ມີການເຈລະຈາຢ່າງກົງໄປກົງມາ, ແລກປ່ຽນບັນດາບັນຫາເຊິ່ງສະພາແຫ່ງຊາດ 2 ປະເທດເອົາໃຈໃສ່. ມີບັນຫາໜຶ່ງເຊິ່ງພວກຂ້າພະເຈົ້າເຫັນດີເປັນເອກະພາບຢັ້ງຢືນການພົວພັນລະຫວ່າງ ຫວຽດນາມ ແລະ ສ. ເຊັກໂກ ແມ່ນການພົວພັນທີ່ເປັນມູນເຊື້ອ, ເປັນເພື່ອນມິດມາແຕ່ດົນນານ ແລະ ດີງາມທີ່ສຸດ. ພວກຂ້າພະເຈົ້າປາດຖະໜາຢາກເປັນເພື່ອນມິດທີ່ດີກັບປະຊາຊົນ ເຊັກໂກ ແລະ ຢາກໃຫ້ການຮ່ວມມືລະຫວ່າງສະພາແຫ່ງຊາດ 2 ປະເທດ ກາຍເປັນການຮ່ວມມືມີປະສິດທິຜົນ, ຊຸກຍູ້ການຮ່ວມມືຮອບດ້ານລະຫວ່າງ 2 ປະເທດ”
ສ່ວນທ່ານປະທານສະພາສູງ ເຊັກໂກ Milan Stech ປາດຖະໜາຢາກໃຫ້ ຫວຽດນາມ ສ້າງເງື່ອນໄຂໃຫ້ແກ່ບັນດາວິສາຫະກິດ ເຊັກໂກລົງທຶນເຂົ້າ ຫວຽດນາມ, ນຳມາເຊິ່ງຜົນປະໂຫຍດໃຫ້ແກ່ 2 ຝ່າຍ.
ກ່ອນໜ້ານັ້ນ, ໃນວັນທີ 12/4, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ພົບປະກັບທ່ານປະທານາທິບໍດີ Milos Zeman ແລະ ທ່ານນາຍົກລັດຖະມົນຕີ Bohyslav Sobotka.