(vovworld) – ຕອນບ່າຍວັນທີ 5/3, ຢູ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດ Azerbaijan ປະຈຳ ຫວຽດນາມ Anar Imanov ແລະ ທ່ານເອກອັກຄະລັດຖະທູດ ຍີ່ປຸ່ນ ປະຈຳ ຫວຽດນາມ Hiroshi Fukada ເຂົ້າຢ້ຽມຂຳ່ນັບເນື່ອງໃນໂອກາດມາປະຕິບັດໜ້າທີ່ການທູດຢູ່ ຫວຽດນາມ. ໃນການພົບປະກັບເອກອັກຄະລັດຖະທູດ Azerbaijan , ທ່ານປະທານສະພາແຫ່ງຊາດ ຫງວຽນຊິງຮູ່ງ ຊົມເຊີຍ ທ່ານເອກອັກຄະລັດຖະທູດ Anar Imanov ມາປະຕິບັດໜ້າທີ່ການທູດຢູ່ ຫວຽດນາມ ແລະ Azerbaijan ເປີດສະຖານທູດ ຢູ່ ຫວຽດນາມ, ເຊື່ອໝັ້ນວ່ານີ້ຈະແມ່ນປະຖົມປັດໄຈສຳຄັນ, ຊຸກຍູ້ການພົວພັນຮ່ວມມືລະຫວ່າງ 2 ປະເທດຢ່າງແຮງ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຖືວ່າ: ຫວຽດນາມ ແລະ Azerbaijan ມີການພົວພັນມິດຕະພາບທີ່ເປັນມູນເຊື້ອ, ແມ່ນເງື່ອນໄຂສຳຄັນເພື່ອຍົກລະດັບການພົວພັນໃນທຸກຂົງເຂດຄື: ປ້ອງກັນຊາດ - ປ້ອງກັນຄວາມສະຫງົບ, ວັດທະນະທຳ, ການສຶກສາ ແລະ ພິເສດແມ່ນການຮ່ວມມືການຄ້າ 2 ຝ່າຍ.
ສ່ວນທ່ານເອກອັກຄະລັດຖະທູດ Anar Imanov ຢືນຢັນຈະມານະພະຍາຍາມຈົນສຸດຄວາມສາມາດຂອງຕົນ, ຕັ້ງໜ້າຊຸກຍູ້ການພົວພັນຮ່ວມມືລະຫວ່າງ 2 ປະເທດໃນທຸກຂົງເຂດ.
ໃນການພົບປະກັບເອກອັກຄະລັດຖະທູດ ຍີ່ປຸ່ນປະຈຳ ຫວຽດນາມ, ທ່ານປະທານສະພາແຫ່ງຊາດ ຫງວຽນຊິງຮູ່ງ ເນັ້ນໜັກວ່າ: ການພົວພັນລະຫວ່າງ ຫວຽດນາມ ແລະ ຍີ່ປຸ່ນ ພວມພັດທະນາຢ່າງແຮງໃນລະດັບການພົວພັນຄູ່ຮ່ວມມືຍຸດທະສາດໃນທຸກໆຂົງເຂດທັງລວງກ້ວາງ ແລະ ລວງເລິກ, ນຳມາເຊິ່ງປະສິດທິຜົນແທດຈິງໃຫ້ແກ່ການພັດທະນາລວມຂອງທັງ 2 ປະເທດ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຂໍຂອບອົກຂອບໃຈບັນດາໂຄງການອຸປະຖຳຂອງ ຍີ່ປຸ່ນສະຫງວນໃຫ້ແກ່ຫວຽດນາມ.
ທ່ານເອກອັກຄະລັດຖະທູດ ຍີ່ປຸ່ນ Hiroshi Fukada ຢືນຢັນ ລັດຖະບານ ຍີ່ປຸ່ນ ຍາມໃດກໍ່ຖືການພົວພັນກັບ ຫວຽດນາມ ເປັນສຳຄັນ. ທ່ານເອກອັກຄະລັດຖະທູດ Hiroshi Fukada ປາດຖາໜາຢາກໃຫ້ ສະພາແຫ່ງຊາດ ຫວຽດນາມ ສືບຕໍ່ເອົາໃຈໃສ່, ສະໜັບສະໜູນ ແລະ ຊຸກຍູ້ພັດທະນາການພົວພັນຮ່ວມມືອັນດີງາມນີ້.