ປະທານສະພາແຫ່ງຊາດຫວຽດນາມຢ້ຽມຢາມສະຖານທູດຫວຽດນາມປະຈຳມຽນມາ
(ພາບປະກອບ)
(vovworld) - ໃນຂອບເຂດການຢ້ຽມຢາມ ສາທາລະນະລັດສະຫະພາບມຽນມາຢ່າງເປັນທາງການ, ຕອນເຊົ້າວັນທີ 1/10, ທ່ານນາງ ປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ມີການພົບປະກັບບັນດາພະນັກງານ, ລັດຖະກອນ ສະຖານທູດ ຫວຽດນາມ ແລະ ຊາວຫວຽດນາມອາໄສຢູ່ ມຽນມາ. ທີ່ການພົບປະ, ທ່ານນາງ ປະທານສະພາແຫ່ງຊາດ ຫງວຽນທິກິມເງິນ ຢືນຢັນວ່າ, ພັກ, ລັດ ແລະ ສະພາແຫ່ງຊາດຍາມໃດກໍ່ມີຄວາມເອົາໃຈໃສ່, ສະໜັບສະໜູນ, ສ້າງເງື່ອນໄຂເພື່ອໃຫ້ບັນດາອົງການຕາງໜ້າ ຫວຽດນາມ ຢູ່ຕ່າງປະເທດເຄື່ອນໄຫວຢ່າງມີປະສິດທິຜົນທີ່ສຸດ, ປະກອບສ່ວນຮັບໃຊ້ພາລະກິດປົກປັກຮັກສາ ແລະ ສ້າງສາ, ພັດທະນາປະເທດ. ທ່ານນາງປະທານສະພາແຫ່ງຊາດ ຫງວຽນທິກິມເງິນ ກໍ່ຕີລາຄາສູງປະຊາຄົມຊາວ ຫວຽດນາມຢູ່ ມຽນມາ ມີມູນເຊື້ອຮັກຊາດ, ຍາມໃດກໍ່ມຸ່ງຫາປະເທດ, ອອກແຮງງານຢ່າງດຸໝັ່ນ, ມີຫົວຄິດປະດິດສ້າງ, ມີການປະກອບສ່ວນຫຼາຍຢ່າງເຂົ້າໃນພາລະກິດສ້າງສາ ແລະ ພັດທະນາປະເທດມຽນມາ ກໍ່ຄືປະກອບສ່ວນສຳຄັນເຂົ້າໃນການເພີ່ມພູນຄູນສ້າງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ - ມຽນມາ.