ທ່ານປະທານາທິບໍດີ ຕວກກີ Recep Tayyip Erdogan
(ພາບ: EPA/TTXVN)
(vovworld) – ວັນທີ 13/01 ທ່ານປະທານາທິບໍດີ ຕວກກີ Recep Tayyip Erdogan ຢືນຢັນວ່າ ອາດຈະຄິດໄລ່ເຖິງຄວາມສາມາດດຳເນີນການເລືອກຕັ້ງກ່ອນກຳນົດເວລາ ຖ້າຫາກສະພາແຫ່ງຊາດປະເທດນີ້ ບໍ່ສາມາດສຳເລັດວຽກງານຂອງຕົນ, ໃນສະພາວະບັນດາສະມາຊິກລັດຖະສະພາພວມປຶກສາຫາລືກ່ຽວກັບບັນດາເນື້ອໃນປັບປຸງລັດຖະທຳມະນູນ ທີ່ຈະນຳມາເຊິ່ງລະບອບປະທານາທິບໍດີຮອບດ້ານ ຊ່ວຍໃຫ້ເພີ່ມສິດອຳນາດຕື່ມອີກໃຫ້ທ່ານ Tayyip Erdogan. ກ່າວຄຳເຫັນຕໍ່ວົງການນັກຂ່າວ, ທ່ານປະທານາທິບໍດີ Tayyip Erdogan ເວົ້າວ່າ: ຍາມໃດທ່ານກໍ່ຄັດຄ້ານການເລືອກຕັ້ງກ່ອນກຳນົດເວລາ ແຕ່ບາງເທື່ອຈະຕ້ອງດຳເນີນກ່ອນກຳນົດເວລາ ພ້ອມທັງສະແດງຄວາມຫວັງວ່າ ວິວັດການປຶກສາຫາລືກ່ຽວກັບການປະຕິຮູບລັດຖະທຳມະນູນຈະສຳເລັດໃນອາທິດນີ້.
ກ່ອນໜ້ານັ້ນ ສະພາແຫ່ງຊາດ ຕວກກີ ໄດ້ຮັບຮອງເອົາເພີ່ມເຕີ່ມບັນດາມາດຕາຕົ້ນຕໍຂອງການປະຕິຮູບລັດຖະທຳມະນູນຕື່ມອີກ, ຕາມນັ້ນຈະອະນຸຍາດໃຫ້ ປະທານາທິບໍດີ ເປັນສະມາຊິກຂອງພັກການເມືອງໜຶ່ງ ແລະ ມີສິດອອກບັນດາລັດຖະດຳລັດ.