ທ່ານປະທານປະເທດຫວຽດນາມ ເຈີນດ້າຍກວາງຕ້ອນຮັບທ່ານ
ປະທານາທິບໍດີ ຝລັ່ງ Francois Hollande
|
(vovworld)- ໂດຍໄດ້ຮັບຄຳເຊີນຂອງທ່ານປະທານປະເທດຫວຽດນາມ ເຈີນດ້າຍກວາງ, ປະທານາທິບໍດີ ຝລັ່ງ Francois Hollande ໄດ້ມາຮອດ ຮ່າໂນ້ຍ ເລີ່ມຕົ້ນການຢ້ຽມຢາມທາງລັດຖະກິດຫວຽດນາມ ແຕ່ວັນທີ 5 -7/9/2016. ຕອນເຊົ້າວັນທີ 6/9/2016 ຢູ່ ຮ່າໂນ້ຍ, ພາຍຫລັງພິທີຕ້ອນຮັບຢ່າງເປັນທາງການ, ທ່ານປະທານປະເທດ ເຈີນດ້າຍກວາງ ມີການພົບປະສະເພາະ ແລະ ພາຍຫລັງການເຈລະຈາກັບປະທານາທິບໍດີ Francois Hollande. ການນຳສອງທ່ານ ໄດ້ຢັ້ງຢືນຄວາມຕັດສິນໃຈລວມ ເຮັດໃຫ້ຄູ່ຮ່ວມມືຍຸດທະສາດ ຫວຽດນາມ - ຝລັ່ງ ມຸ່ງໄປເຖິງວິໄສທັດຮ່ວມມືຍາວນານ, ຕອບສະຫນອງຜົນປະໂຫຍດ ແລະ ຄວາມເອົາໃຈໃສ່ລວມຂອງສອງປະເທດ. ສອງຝ່າຍເຫັນດີເປັນເອກະພາບເພີ່ມທະວີການແລກປ່ຽນພົບປະໃນທຸກຂັ້ນ, ເປັນຕົ້ນແມ່ນຂັ້ນສູງ ພ້ອມທັງເສີມຂະຫຍາຍບົດບາດຂອງບັນດາກົນໄກປະສານງານ, ຊີ້ນຳການຮ່ວມມືສອງຝ່າຍ, ໃນບັນດາຂົງເຂດການເມືອງ, ເສດຖະກິດ, ການປ້ອງກັນຊາດ, ວິທະຍາສາດ - ເຕັກໂນໂລຊີ, ວັດທະນະທຳ, ການສຶກສາບຳລຸງສ້າງ. ສອງຝ່າຍເຫັນດີຊຸກຍູ້ການຮ່ວມມືປ້ອງກັນຊາດ. ສອງປະເທດຈະຮັດແຫນ້ນການຮ່ວມມືເພື່ອຮັບມືກັບສິ່ງທ້າທາຍທົ່ວໂລກ, ພິເສດ ແມ່ນຮັບມືກັບການປ່ຽນແປງຂອງດິນຟ້າອາກາດ.
ທ່ານ ປະທານາທິບໍດີ Francois Hollande ຢືນຢັນຄຳໝັ້ນສັນຍາຂອງ ຝລັ່ງ ແມ່ນຮັກສາ ODA ໃຫ້ແກ່ຫວຽດນາມ. ສອງຝ່າຍເນັ້ນຫນັກວ່າ ຈະສືບຕໍ່ສ້າງສະພາບແວດລ້ອມສະດວກໃຫ້ບັນດາວິສາຫະກິດສອງປະເທດ ຮ່ວມມືລົງທຶນ ແລະ ດຳເນີນທຸລະກິດ, ມຸ່ງໄປເຖິງການສ້າງບັນດາສາຍພົວພັນຄູ່ຮ່ວມມືບົນພື້ນຖານສອງຝ່າຍຕ່າງມີຜົນປະໂຫຍດ. ຫວຽດນາມ ແລະ ຝລັ່ງ ຈະເພີ່ມທະວີການສົມທົບກັນທີ່ບັນດາເວທີປາໄສຫລາຍຝ່າຍ, ສືບຕໍ່ສະຫນັບສະຫນູນເຊິ່ງກັນ ແລະກັນ ເພື່ອພັດທະນາການພົວພັນຂອງ ຝລັ່ງ ກັບອາຊີ - ປາຊີຟີກ ແລະ ເພີ່ມທະວີການຮ່ວມມືລະຫວ່າງຫວຽດນາມ ກັບສະຫະພາບເອີລົບ. ການນຳສອງທ່ານໄດ້ຊີ້ແຈ້ງ ຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຊຸກຍູ້ການຮ່ວມມືໃນພາກພື້ນ ແລະສາກົນ, ຢັ້ງຢືນຄືນຄຳໝັ້ນສັນຍາຮັກສາຄວາມເສລີການເດີນເຮືອບົນທະເລ, ການບິນ, ເນັ້ນຫນັກການແກ້ໄຂຄວາມຂັດແຍ້ງກັນຢູ່ ທະເລຕາເວັນອອກ ໂດຍສັນຕິວິທີ.
ພາຍຫລັງການເຈລະຈາ, ທ່ານປະທານປະເທດ ເຈີນດ້າຍກວາງ ແລະ ປະທານາທິບໍດີ Francois Hollande ໄດ້ເປັນສັກຂີພິຍານພິທີລົງນາມ, ແລກປ່ຽນບັນດາເອກະສານ, ຂໍ້ຕົກລົງຮ່ວມມືລະຫວ່າງສອງປະເທດ ໃນບັນດາຂົງເຂດຕຸລາການ, ກະສິກຳ, ການສິດສອນພາສາ ຝລັ່ງ, ຮັບມືກັບການປ່ຽນແປງຂອງດິນຟ້າອາກາດ, ສະຫນອງເຮືອບິນ Airbus, ໂທລະຄົມມະນາຄົມ, ດາວທຽມ, ພັດທະນາພື້ນຖານໂຄງລ່າງ…ທ່ານປະທານປະເທດ ເຈີນດ້າຍກວາງ ແລະ ທ່ານ ປະທານາທິບໍດີ ຝລັ່ງ Francois Hollande ພ້ອມກັນກ່າວຄຳເຫັນຕໍ່ສື່ມວນຊົນ ແລະ ຕອບຄຳຖາມຂອງບັນດານັກຂ່າວ.