(vovworld) - ໂດຍໄດ້ຮັບຄຳເຊີນຂອງທ່ານປະທານປະເທດຫວຽດນາມ Truong Tan Sang, ທ່ານປະທານາທິບໍດີ ສ. ປານາມາ Ricardo Martinelli Berrocal ແລະ ພັນລະຍາ ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການ ໃນລະຫວ່າງວັນທີ 24 – 27/10. ຕອນເຊົ້າວັນທີ 25/10, ພິທີຕ້ອນຮັບທ່ານປະທານາທິບໍດີ ສ. ປານາມາ Ricardo Martinelli Berrocal ພ້ອມກັບຄະນະຜູ້ແທນ ຖືກຈັດຂຶ້ນຢູ່ສຳນັກງານປະທານປະເທດຢ່າງສົມກຽດ. ພາຍຫຼັງພິທີຕ້ອນຮັບ, ການນຳສອງທ່ານໄດ້ນຳໜ້າຄະນະຜູ້ແທນຂັ້ນສູງສອງປະເທດດຳເນີນການເຈລະຈາ. ທ່ານປະທານປະເທດ Truong Tan Sang ໄດ້ຕີລາຄາສູງ ແລະ ເຊື່ອນໝັ້ນວ່າ ການຢ້ຽມຢາມຫວຽດນາມ ຄັ້ງນີ້ຂອງທ່ານປະທານາທິບໍດີ ສ. ປານາມາ ຈະແມ່ນຂີດໝາຍໃໝ່ທີ່ສຳຄັນ ປະກອບສ່ວນເຂົ້າໃນການຊຸກຍູ້ການພົວພັນຮ່ວມມື ລະຫວ່າງຫວຽດນາມ - ປານາມາ ໃຫ້ກ້າວເຂົ້າສູ່ລວງເລິກ ແລະ ມີປະສິດທິຜົນ. ທ່ານປະທານາທິບໍດີ ສ. ປານາມາ Ricardo Martinelli Berrocal ໄດ້ຕີລາຄາສູງບົດບາດຕັ້ງໜ້າຂອງຫວຽດນາມ ໃນບັນດາບັນຫາພາກພື້ນ ແລະ ສາກົນ. ທ່ານປະທານາທິບໍດີ ປານາມາ ໄດ້ຢືນຢັນວ່າ ປະຊາຊົນ ປານາມາ ແລະ ທ່ານເອງຍາມໃດກໍນັບຖື ແລະ ມີຄວາມໃກ້ຊິດສະໜິດສະໜົມກັບປະຊາຊົນຫວຽດນາມ ໃນການຕໍ່ສູ້ເພື່ອເອກະລາດ ແລະ ໂຮມປະເທດຊາດເປັນເອກະພາບ ແລະ ປາດຖະໜາວ່າ ຫວຽດນາມ ແລະ ປານາມາ ຈະຊຸກຍູ້ການພົວພັນຮ່ວມມືໃນທຸກຂົງເຂດກວ່າອີກ.
ພາຍຫຼັງການເຈລະຈາ, ທ່ານປະທານປະເທດ Truong Tan Sang ແລະ ທ່ານປະທານາທິບໍດີ ສ. ປານາມາ Ricardo Martinelli Berrocal ໄດ້ມີການພົບປະກັບວົງການນັກຂ່າວ ແລະ ໄດ້ເປັນສັກຂີພິຍານພິທີລົງນາມໃນສັນຍາວັດທະນະທຳລະຫວ່າງລະຫວ່າງລັດຖະບານຫວຽດນາມ ແລະ ລັດຖະບານ ສ. ປານາມາ; ບົດບັນທຶກຊ່ວຍຈຳກ່ຽວກັບການສ້າງກົນໄກທາບທາມສອງຝ່າຍລະຫວ່າງກະຊວງການຕ່າງປະເທດສອງປະເທດ. ທ່ານປະທານປະເທດ Truong Tan Sang ໄດ້ເນັ້ນໜັກອີກເທື່ອໜຶ່ງເຖິງການພົວພັນມິດຕະພາບທີ່ເຄີຍມີມາລະຫວ່າງສອງປະເທດ:
”ພວກຂ້າພະເຈົ້າຖືວ່າການພົວພັນລະຫວ່າງຫວຽດນາມ - ປານາມາ ພວມພັດທະນາດີທີ່ສຸດ. ໃນໄລຍະຜ່ານມາ, ສອງປະເທດໄດ້ມີຄວາມມານະພະຍາຍາມຫຼາຍຢ່າງໃນການແລກປ່ຽນຄະນະຜູ້ແທນທຸກຂັ້ນ ແລະ ເພີ່ມທະວີການພົບປະ, ສົມທົບກັນໃນເວທີສາກົນ. ການຮ່ວມມືທາງດ້ານເສດຖະກິດ, ການຄ້າເວົ້າລວມຍັງຢູ່ໃນລະດັບຕຳ່ ແຕ່ບັນລຸໄດ້ບາດກ້າວພັດທະນາຢ່າງແນ່ນອນ ເປັນພື້ນຖານໃຫ້ແກ່ການພົວພັນຮ່ວມມືອັນໃຫຍ່ຫຼວງໃນໄລຍະຈະມາເຖິງ. ແນ່ນອນວ່າທຸກສິ່ງທຸກຢ່າງທີ່ພວກເຮົາໄດ້ຕົກລົງນຳກັນທີ່ການເຈລະຈາຕອນເຊົ້າມື້ນີ້ຈະແມ່ນບາດກ້າວບຸກທະລຸໃໝ່ໃນການພົວພັນສອງຝ່າຍກ່ຽວກັບບັນຫານີ້”.
ຕອນບ່າຍວັນທີ 25/10, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ໄດ້ໃຫ້ການຕ້ອນຮັບປະທານາທິບໍດີ ສປານາມາ Ricardo Martinelli Berrocal , ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ຕີລາຄາສູງໝາກຜົນແຫ່ງການເຈລະຈາລະຫວ່າງທ່ານປະທານາທິບໍດີກັບທ່ານປະທານປະເທດ Truong Tan Sang ແລະ ຖືວ່າການຢ້ຽມຢາມແມ່ນຂີດໝາຍໃໝ່ທີ່ສຳຄັນໃນການພັດທະນາການພົວພັນຮ່ວມມືຫຼາຍດ້ານລະຫວ່າງຫວຽດນາມ - ປານາມາ. ການນຳທັງສອງທ່ານໄດ້ເຫັນດີເປັນເອກະພາບກ່ຽວກັບການຊຸກຍູ້ການເຄື່ອນໄຫວພົບປະ, ແລກປ່ຽນບົດຮຽນລະຫວ່າງສອງພັກກຳອຳນາດ, ສະພາແຫ່ງຊາດ ແລະ ປະຊາຊົນສອງປະເທດໃນໄລຍະຈະມາເຖິງ. ໃນວັນດຽວກັນ, ປະທານາທິບໍດີ ສປານາມາ Ricardo Martinelli Berrocal ກໍ່ໄດ້ເຂົ້າຢ້ຽມຄຳນັບທ່ານນາຍົກລັດຖະມົນຕີ Nguyen Tan Dung ແລະ ທ່ານປະທານສະພາແຫ່ງຊາດ Nguyen Sinh Hung.