(vovworld) - ວັນທີ 19/12, ທີ່ການພົບປະຢູ່ວັງ Kremlin, ເນື່ອງໃນໂອກາດວັນມູນເຊື້ອຂອງຂະແໜງປ້ອງກັນຄວາມສະຫງົບລັດເຊຍ, ທ່ານປະທານາທິບໍດີລັດເຊຍ Vladimir Putin ຊີ້ແຈ້ງວ່າ, ໃນປີ 2015, ຍ້ອນຄວາມມານະພະຍາຍາມຂອງບັນດາພາລະກອນປ້ອງກັນຄວາມສະຫງົບ, ມີກວ່າ 30 ກົນອຸບາຍກໍ່ການຮ້າຍໄດ້ຖືສະກັດກັ້ນ. ອົງການຕ້ານນັກສືບສອດແນມຂອງລັດເຊຍ ໄດ້ຄົ້ນພົບນັກສືບສອດແນມຊາວຕ່າງປະເທດກວ່າ 320 ຄົນໃນປີ 2015. ທ່ານປະທານາທິບໍດີ Vladimir Putin ເນັ້ນໜັກວ່າ ສະພາບໂລກພວມມີການຜັນແປຢ່າງສັບສົນ, ການເຄື່ອນໄຫວຂອງບັນດາພາກສ່ວນກໍ່ການຮ້າຍໄດ້ນາບຂູ່ລັດເຊຍ ໂດຍກົງ. ໃນຂະນະນັ້ນ, ມີຫຼາຍປະເທດພວມຊອກຫາວິທີເພີ່ມບັນດາການເຄື່ອນໄຫວສອດແນມຕ້ານລັດເຊຍ ອັນໄດ້ວາງອອກຄວາມຮຽກຮ້ອງຕ້ອງການ ແລະ ໜ້າທີ່ຮັບຜິດຊອບຢ່າງໃຫຍ່ຫຼວງໃຫ້ອົງການປ້ອງກັນຄວາມສະຫງົບສະຫະພັນ. ໃນບົດກ່າວປາໄສຂອງຕົນ, ທ່ານ Vladimir Putin ກໍເຕື້ອງເຖິງບາງບັນຫາຮ້ອນເຮັ່ງຂອງສາກົນ, ໃນນັ້ນມີການປະທະກັນຢູ່ຊີຣີ, ທ່ານ Vladimir Putin ຢືນຢັນວ່າ, ບັນດາກຳລັງທະຫານຂອງລັດເຊຍ ໄດ້ສົມທົບຢ່າງມີປະສິດທິຜົນ ແລະ ນຳໃຊ້ບັນດາພາຫະນະທີ່ທັນສະໄໝໃນບັ້ນການທະຫານຢູ່ຊີຣີ, ແຕ່ນີ້ບໍ່ແມ່ນກຳລັງຄວາມສາມາດທັງໝົດຂອງກອງທັບລັດເຊຍ. ທ່ານໃຫ້ຮູ້ວ່າ, ຖ້າຈຳເປັນ, ມົດສະກູ ອາດຈະຜັນຂະຫຍາຍບັນດາພາຫະນະການທະຫານຕື່ມອີກ ແລະ ສະໜອງບັນດາແຫຼ່ງທຶນເພີ່ມຕື່ມເພື່ອປັບປຸງຄວາມມານະພະຍາຍາມດ້ານການທະຫານຢູ່ຊີຣີ.