( vovworld ) - ວັນທີ 31/5, ທ່ານປະທານາທິບໍດີສ.ໂອຕລິດ Heinz Fischer ໄດ້ເດີນທາງອອກຈາກນະຄອນໂຮ່ຈິມິນ ສິ້ນສຸດການຢ້ຽມຢາມຫວຽດນາມ ເປັນທາງການຢ່າງຈົບງາມ ຕາມຄຳເຊື້ອເຊີນຂອງທ່ານປະທານປະເທດຫວຽດນາມ Truong Tan Sang. ໃນໄລຍະຢູ່ຢ້ຽມຢາມຫວຽດນາມ ຢ່າງເປັນທາງການ, ທ່ານປະທານາທິບໍດີ Heinz Fischer ໄດ້ມີການເຈລະຈາກັບທ່ານປະທານປະເທດ Truong Tan Sang, ເຂົ້າຢ້ຽມຄຳນັລທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong, ໂອ້ລົມກັບທ່ານນາຍົກລັດຖະມົນຕີ Nguyen Tan Dung ແລະ ທ່ານປະທານສະພາແຫ່ງຊາດ Nguyen Sinh Hung. ທ່ານປະທານາທິບໍດີ Heinz Fischer ພ້ອມກັບບັນດາສະມາຊິກໃນຄະນະໄດ້ໄປວາງພວງມາລາຢູ່ອານຸສາວະລີຜູ້ເສຍສະຫຼະຊີວິດເພື່ອຊາດ, ເຂົ້າຮ່ວມເວທີປາໄສວິສາຫະກິດຫວຽດນາມ - ໂອຕລິດ. ເນື່ອງໃນໂອກາດການຢ້ຽມຢາມຂອງທ່ານປະທານາທິບໍດີ Heinz Fischer, ຫວຽດນາມ ແລະ ໂອຕລິດ ໄດ້ລົງນາມໃນບັນດາເອກະສານຮ່ວມມືຄື: ບົດບັນທຶກຊ່ວຍຈຳກ່ຽວກັບການຮ່ວມມືໃນຂົງເຂດອຸດສາຫະກຳ, ການຄ້າ ແລະ ພະລັງງານ, ບົດບັນທຶກຊ່ວຍຈຳກ່ຽວກັບການຮ່ວມມືໃນຂົງເຂດການທ່ອງທ່ຽວ, ຂໍ້ຕົກລົງຮ່ວມມືລະຫວ່າງຫ້ອງການການຄ້າ ແລະ ອຸດສາຫະກຳຫວຽດນາມ ກັບ ຫ້ອງການເສດຖະກິດສ.ໂອຕລິດ, ພ້ອມກັບບາງເອກະສານຂອງໂຄງການ ODA ໂດຍໂອຕລິດ ອຸປະຖຳໃຫ້ແກ່ຂົງເຂດສາທາລະນະສຸກ, ປ້ອງກັນ ແລະຕ້ານອັກຄີໄພ ແລະ ບຳລຸງສ້າງວິຊາຊີບ. ທີ່ບັນດາການພົບປະ, ການນຳສອງປະເທດໄດ້ເຫັນດີເພີ່ມທະວີການຮ່ວມມືໃນບັນດາເວທີປາໄສຫຼາຍຝ່າຍ ແລະ ຢູ່ບັນດາອົງການຈັດຕັ້ງສາກົນໃຫຍ່, ໂດຍສະເພາະແມ່ນສະຫະປະຊາຊາດ. ສອງຝ່າຍໄດ້ຢືນຢັນເພີ່ມທະວີການແລກປ່ຽນຄະນະຜູ້ແທນ ແລະ ພົບປະຂັ້ນສູງ ເພື່ອແນໃສ່ຊີ້ກຳນົດທິດ ແລະ ສ້າງທ່ວງທ່າໃຫ້ການພົວພັນຮ່ວມມືຮ່ວມມືສອງຝ່າຍພັດທະນາ, ຈັດຕັ້ງບັນດາການເຄື່ອນໄຫວສະເຫຼີມສະຫຼອງ 40 ປີແຫ່ງວັນສ້າງສາຍພົວພັນທາງການທູດເປັນຢ່າງດີ ເຊິ່ງຈະດຳເນີນແຕ່ນີ້ຮອດທ້າຍປີ 2012 ຢູ່ຫວຽດນາມ ແລະ ໂອຕລິດ.