(vovworld) - ວັນທີ 29/06, ປະທານາທິບໍດີອາເມລິກາ Barack Obama ໄດ້ເຊັນກົດໝາຍຊຸກຍູ້ການຄ້າ (TPA) ຫຼືເອີ້ນວ່າສິດເຈລະຈາໄວ, ເຊິ່ງໄດ້ຮັບການຮັບຮອງເອົາຈາກສະພາສູງ ແລະ ສະພາຕໍ່າອາເມລິກາ ໃນອາທິດກ່ອນ. ກ່າວຄຳເຫັນຕໍ່ວົງການນັກຂ່າວ ພາຍຫຼັງເຊັນປະກາດໃຊ້ກົດໝາຍ, ທ່ານປະທານາທິບໍດີ Barack Obama ເວົ້າວ່າ TPA ຈະປະກອບສ່ວນຍູ້ໄວວິວັດທະນາການເຈລະຈາກ່ຽວກັບສັນຍາການຄ້າຂ້າມປາຊີຟິກ (TPP) ກັບ 11 ປະເທດຄູ່ຮ່ວມມື. ແຕ່ວ່າ, ຕາມການສັງເກດຂອງທ່ານ Obama ແລ້ວ, ເຖິງວ່າມີ TPA ແລ້ວກໍ່ຕາມ, ແຕ່ການເຈລະຈາກ່ຽວກັບ TPP ຍັງບໍ່ທັນສິ້ນສຸດໄວໄດ້ເທື່ອ ຍ້ອນໃນສະເພາະໜ້າພວກເຮົາຍັງມີການເຈລະຈາທີ່ຫຍຸ້ງຍາກຈຳນວນໜຶ່ງ.
TPA ຈະມີຜົນສັກສິດເຖິງປີ 2021, ອະນຸຍາດໃຫ້ປະທານາທິບໍດີ Obama ແລະ ບັນດາປະທານາທິບໍດີຄົນໃໝ່ ມີສິດເຈລະຈາບັນດາຂໍ້ຕົກລົງການຄ້າກັບ ຄູ່ຮ່ວມມືພາຍນອກຢ່າງຄົບຖ້ວນ.