(vovworld) – ຕອນບ່າຍວັນທີ 24/02, ຢູ່ສຳນັກງານລັດຖະບານ, ພາຍໃຕ້ການຊີ້ນຳຂອງທ່ານນາຍົກລັດຖະມົນຕີ ຫງວຽນເຕີນຢຸງ, ຄະນະປະຈຳລັດຖະບານໄດ້ຈັດກອງປະຊຸມກ່ຽວກັບສະພາບບຸນປີໃໝ່ ປີມະແມ 2015. ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຕີລາຄາບັນດາກະຊວງ, ຂະແໜງການ, ທ້ອງຖິ່ນ ໄດ້ຮັບປະກັນໃຫ້ປະຊາຊົນຕ້ອນຮັບບຸນເຕັດຢ່າງອົບອຸ່ນ, ມ່ວນຊື່ນ, ປອດໄພ, ສົດໄສ ແລະ ປະຢັດ. ບັນດາຜະລິດຕະພັນສິນຄ້າ, ການບໍລິການຈຳເປັນຮັບໃຊ້ປະຊາຊົນໄດ້ຮັບການຮັບປະກັນ; ລາຄາສິນຄ້າເປັນປົກກະຕິ ແລະ ຫຼາຍຮູບຫຼາຍແບບ, ສິນຄ້າຂອງຫວຽດນາມ ກວມອັນຕາສ່ວນຫຼາຍ. ບັນດາເປົ້າໝາຍນະໂຍບາຍ, ເປົ້າໝາຍປົກປ້ອງສັງຄົມໄດ້ຮັບຄວາມເອົາໃຈໃສ່. ຮັບປະກັນການໄປມາໃຫ້ປະຊາຊົນ; ປະຕິບັດວຽກງານເບິ່ງແຍງດູແລສຸຂະພາບໃຫ້ປະຊາຊົນໃນໂອກາດບຸນເຕັດປີມະແມເປັນຢ່າງດີ; ບັນດາການເຄື່ອນໄຫວວັດທະນະທຳ, ສິລະປະຖືກຈັດຂຶ້ນຢ່າງຟົດຟື້ນ; ຮັບປະກັນຄວາມສະຫງົບປອດໄພດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ປົກປັກຮັກສາອະທິປະໄຕແຫ່ງຊາດ…
ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງວ່າ, ບັນດາກະຊວງ, ຂະແໜງການ, ທ້ອງຖິ່ນ ຕ້ອງເລີ່ມປະຕິບັດວຽກງານຢ່າງທັນທີ, ຮີບເຮັ່ງ, ປະຕິບັດຢ່າງຄົບຊຸດບັນດາໜ້າທີ່ທີ່ໄດ້ວາງອອກໃຫ້ຖືກຕາມພາລະບົດບາດນັບແຕ່ຕົ້ນປີໃໝ່, ເພີ່ມທະວີລະດັບການຜະລິດ, ເພື່ອທົດແທນໃຫ້ຊຸມວັນພັກຕ້ອນຮັບບຸນເຕັດ.