(vovworld) - ຕອນເຊົ້າວັນທີ 08/03, ຢູ່ຮ່າໂນ້ຍ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມທົ່ວປະເທດກ່ຽວກັບການຜັນຂະຫຍາຍຍຸດທະສາດພັດທະນາ ວິທະຍາສາດເຕັກໂນໂລຊີ 2011 – 2020. ກອງປະຊຸມມີການເຂົ້າຮ່ວມຂອງທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ພ້ອມກັບຜູ້ແທນເກືອບ 400 ຄົນແມ່ນບັນດານັກວິທະຍາສາດ, ວິສາຫະກິດ ແລະ ບັນດາອົງການວິທະຍາສາດເຕັກໂນໂລຊີ. ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ຢືນຢັນຄວາມຕັດສິນໃຈຂອງລັດຖະບານໃນວຽກງານປ່ຽນໃໝ່ຄວາມຮັບຮູ້ ແລະ ການເຄື່ອນໄຫວກ່ຽວກັບວິທະຍາສາດ. ຕາມນັ້ນແລ້ວ, ໄລຍະ 2011 – 2020 ຈະແມ່ນໂອກາດເພື່ອໃຫ້ວິທະຍາສາດ ແກ້ໄຂຄວາມຫຍຸ້ງຍາກ ເພື່ອບຸກທະລຸໃນວິວັດການເຊື່ອມໂຍງເສດຖະກິດສາກົນ.
“ເມື່ອຕີລາຄາກ່ຽວກັບບົດບາດຕົວຈິ່ງ ມະຕິສູນກາງທີ 6 ກໍຫວນຄືນວ່າ ວິທະຍາສາດບໍ່ທັນໄດ້ຮັບຖືວ່າແມ່ນລັດຖະນະໂຍບາຍຢ່າງແທດຈິງ, ໃນນັ້ນສາຍເຫດຕົ້ນຕໍ່ແມ່ນຍັງບໍ່ທັນຮັບຮູ້ຢ່າງຄົບຖ້ວນກ່ຽວກັບຄວາມສຳຄັນຂອງມັນ. ນີ້ແມ່ນບັນຫາເຊິ່ງມະຕິສູນກາງທີ 6 ໄດ້ຍົກອອກມາ ແລະ ຍຸດທະສາດທີ່ໄດ້ວາງອອກແມ່ນຕ້ອງເຮັດແນວໃດແກ້ໄຂບັນຫານັ້ນ. ພວກເຮົາຕ້ອງສູ້ຊົນຮອດທ້າຍປີ 2013 ແກ້ໄຂເອກະສານທຸກຢ່າງທີ່ກ່ຽວຂ້ອງເຖິງກົນໄກປ່ຽນໃໝ່ວິທະຍາສາດໂດຍພື້ນຖານ.”
ສ່ວນທ່ານລັດຖະມົນຕີກະຊວງວິທະຍາສາດເຕັກໂນໂລຊີ ຫງວຽນກວນ ຢືນຢັນວ່າ; ຍຸດທະສາດພັດທະນາວິທະຍາສາດເຕັກໂນໂລຊີໄລຍະ 2011 – 2020 ກຳນົດຄາດໝາຍຢ່າງຈະແຈ້ງວ່າ ປ່ຽນໃໝ່ວິທະຍາສາດເຕັກໂນໂລຊີຂອງ ຫວຽດນາມ ຢ່າງແຮງ, ປະກອບສ່ວນຢ່າງຕັ້ງໜ້າເຂົ້າໃນພາລະກິດພັດທະນາເສດຖະກິດສັງຄົມຂອງປະເທດຊາດໃນໄລຍະຈະມາເຖິງ.