(vovworld) - ໃນ 30 ປີແຫ່ງການປ່ຽນໃໝ່, ໂຄງປະກອບເສດຖະກິດຫວຽດນາມ ໄດ້ຫັນປ່ຽນຢ່າງຕັ້ງໜ້າຕາມທິດ ອຸດສາຫະກຳ ແລະ ທັນສະໄໝ. ການເຊື່ອມໂຍງພື້ນຖານເສດຖະກິດຫວຽດນາມ ເຂົ້າກັບເສດຖະກິດໂລກນັບມື້ນັບເລິກເຊິ່ງ, ກວ້າງຂວາງ ແລະຮອບດ້ານ ໄດ້ສ້າງເງື່ອນໄຂອັນໃຫຍ່ຫຼວງ, ແຕ່ກໍ່ເປັນການທ້າທາຍບໍ່ແມ່ນໜ້ອຍໃຫ້ແກ່ພວກເຮົາ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນໜັກຄືດັ່ງກ່າວ ທີ່ກອງປະຊຸມສຳມະນາ ”ບາງບັນຫາທິດສະດີກ່ຽວກັບການຫັນເປັນອຸດສາຫະກຳ ແລະ ທັນສະໄໝໃນວິວັດການປ່ຽນໃໝ່ ແລະ ພັດທະນາຢູ່ຫວຽດນາມ”. ທ່ານຮອງນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ ບັນດາຜົນງານຂອງການຫັນເປັນອຸດສາຫະກຳ ແລະ ທັນສະໄໝ ໄດ້ປະກອບສ່ວນສຳຄັນ ເຂົ້າໃນການປັບປຸງຊີວິດຂອງປະຊາຊົນໃຫ້ດີຂຶ້ນ, ຫຼຸດຜ່ອນອັດຕາສ່ວນຄອບຄົວທີ່ທຸກຍາກອຶດຫີວ, ຮັກສາສະຖຽນລະພາບດ້ານການເມືອງ ແລະ ສັງຄົມ, ຍົກສູງທີ່ຕັ້ງຫວຽດນາມໃນເວທີສາກົນ…ທ່ານຮອງນາຍົກລັດຖະ ມົນຕີ ຫງວຽນຊວນຟຸກ ເນັ້ນໜັກວ່າ:
”ອາດເວົ້າໄດ້ວ່າພວກເຮົາໄດ້ຫັນປ່ຽນໂຄງປະກອບເສດຖະກິດສຳເລັດຜົນ. ພິເສດໃນວິວັດແຫ່ງການປະຕິບັດຍຸດທະສາດພັດທະນາ ໄດ້ສ້າງເປັນບັນດາເຂດເສດຖະກິດຈຸດສູມ ທີ່ມີບົດບາດເປັນກຳລັງໜູນຊຸກຍູ້ໃຫ້ແກ່ການເຕີບໂຕ. ມີເຂດອຸດສາຫະກຳ, ເຂດຜະລິດປຸງແຕ່ງ, ເຂດອຸດສາຫະກຳສູງຫຼາຍແຫ່ງໄດ້ຮັບການສ້າງຕັ້ງຂຶ້ນໃນທົ່ວປະເທດ, ອັນໄດ້ດຶງດູດການເຂົ້າຮ່ວມຢ່າງແຮງຂອງບັນດາພາກສ່ວນເສດຖະກິດ, ປະກອບ ສ່ວນຊຸກຍູ້ວິວັດການຫັນປ່ຽນໂຄງປະກອບແຮງງານ ແລະ ຍົກສູງກຳລັງແກ່ງແຍ້ງຂອງພື້ນຖານເສດຖະກິດ”