ນາຍົກລັດຖະມົນຕີຕອບຄຳຊັກຖາມຕໍ່ສະພາແຫ່ງຊາດ
(ພາບປະກອບ)
(vovworld) - ບັນດາວາລະຊັກຖາມ ແລະ ຕອບຄຳຊັກຖາມທີ່ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດຊຸດທີ 13 ໃນ 3 ວັນຜ່ານມາ ໄດ້ຮັບຄວາມເອົາໃຈໃສ່, ຕິດຕາມຈາກຜູ້ມີສິດເລືອກຕັ້ງຈຳນວນຫຼວງຫຼາຍ. ຜູ້ມີສິດເລືອກຕັ້ງຖືວ່າ: ການນຳຂະແໜງການກໍ່ຄືລັດຖະບານໄດ້ຕອບບັນດາຄຳຊັກຖາມຂອງສະມາຊິກສະພາແຫ່ງຊາດຢ່າງກົງໄປກົງມາ. ທ່ານກິມວິງຟຸກ, ຜູ້ມີສິດເລືອກຕັ້ງຢູ່ນະຄອນໂຮ່ຈິມິນ, ໃຫ້ຂໍ້ສັງເກດວ່າ:
“ຂ້າພະເຈົ້າເຫັນວ່າກອງປະຊຸມສະໄໝສາມັນຄັ້ງນີ້, ສະພາແຫ່ງຊາດໄດ້ຍົກອອກບັນດາບົດປະກອບຄວາມເຫັນ ແລະ ປະກອບຄຳເຫັນໃຫ້ການເຄື່ອນໄຫວທຸກຢ່າງຂອງສັງຄົມຢ່າງກົງໄປກົງມາ. ບັນດາລັດຖະມົນຕີວ່າການ ໄດ້ຕອບຄຳຊັກຖາມໄດ້ດີ ແລະ ຄົບຖ້ວນກ່ວາເມື່ອທຽບກັບກອງປະຊຸມສະໄໝສາມັນຄັ້ງກ່ອນນັ້ນ”.
ສ່ວນການຕອບຄຳຊັກຖາມຂອງທ່ານນາຍົກລັດຖະມົນຕີຫງວຽນເຕິນຢຸງ ຢູ່ກອງປະຊຸມສະໄໝສາມັນສະພາແຫ່ງຊາດຄັ້ງນີ້, ຜູ້ມີສິດເລືອກຕັ້ງ ທ່ານເຈືອງ ມິງຕຸງ, ແຂວງບິງທ້ວນ, ເວົ້າວ່າ:
“ຂ້າພະເຈົ້າເຫັນວ່າການຕອບຄຳຊັກຖາມຂອງທ່ານນາຍົກລັດຖະມັນຕີຫງວຽນເຕິນຢຸງ ຕໍ່ບັນດາຄຳຖາມຂອງຜູ້ມີສິດເລືອກຕັ້ງ ແລະ ສະມາຊິກສະພາແຫ່ງຊາດແຈ້ງທີ່ສຸດ, ຍົກອອກໄດ້ບັນດາບັນຫາຈຸດສຸມ, ເຮັດແຈ້ງການເຄື່ອນໄຫວຕ່າງໆຂອງລັດຖະບານ. ພິເສດ, ຂ້າພະເຈົ້າເອົາໃຈໃສ່ເຖິງການຕອບຄຳຖາມຂອງທ່ານນາຍົກລັດຖະມົນຕີກ່ຽວກັບບັນຫາທະເລຕາເວັນອອກ, ການພົວພັນກັບຈີນ, ໃນນັ້ນໄດ້ສະແດງໃຫ້ເຫັນຫຼັກໝັ້ນ, ແນວທາງການຕ່າງປະເທດຂອງປະເທດຊາດ, ສະແດງໃຫ້ເຫັນຢ່າງຈະແຈ້ງກ່ຽວກັບເລື່ອງຫວຽດນາມ ຖືບັນຫາອະທິປະໄຕແຫ່ງຊາດເປັນສຳຄັນ. ຂ້າພະເຈົ້າເຫັນວ່ານັ້ນແມ່ນສິ່ງທີ່ເໝາະສົມກັບແນວຄິດຈິດໃຈ ແລະ ຄວາມຄິດຂອງຊາວຫວຽດນາມ”.
ຜູ້ມີສິດເລືອກຕັ້ງຫວັງວ່າທ່ານນາຍົກລັດຖະມົນຕີ ແລະ ບັນດາສະມາຊິກລັດຖະບານຈະບໍລິຫານ, ຊີ້ນຳນຳພາໃຫ້ເໝາະສົມກັບຄວາມຈິງ ເພື່ອເຮັດໃຫ້ພື້ນຖານເສດຖະກິດຂອງປະເທດຊາດພັດທະນາ, ຜ່ານຜ່າການທ້າທາຍໃຫ້ໄດ້.