(ພາບປະກອບ: Reuters)
(vovworld) - ວັນທີ 10 ກັນຍາ, ມີປະຊາຊົນນັບພັນຄົນທີ່ສະໜັບສະໜູນປະທານາທິບໍດີຜູ້ຖືກໂຄ່ນລົ້ມ Mohamed Morsi, ໄດ້ເຂົ້າຮ່ວມບັນດາການແຫ່ຂະບວນປະທ້ວງຢູ່ໃຈກາງນະຄອນ ກາຍໂຣ ແລະ ບາງແຂວງ, ນະຄອນອື່ນອີກ. ດ້ວຍຄຳຂວັນທີ່ວ່າ “ສະໜັບສະໜູນກຽດສັກສີ ແລະ ຄວາມເສລີຂອງແມ່ຍິງອີຍີບ”, ການແຫ່ຂະບວນປະທ້ວງເພື່ອແນໃສ່ຟື້ນຟູຕຳແໜ່ງໃຫ້ທ່ານ Morsi, ກໍ່ຄືຄັດຄ້ານເລື່ອງ “ຈັບຕົວ ແລະ ລອບສັງຫານ” ບັນດາແມ່ຍິງທີ່ເຂົ້າຮ່ວມການແຫ່ຂະບວນປະທ້ວງເພື່ອສັນຕິພາບ. ນີ້ແມ່ນຄັ້ງທຳອິດນັບແຕ່ການປະທະກັນທີ່ນອງເລືອດໃນກາງເດືອນ ສິງຫາ ຜ່ານມາ, ຝ່າຍອິດສະລາມ ຈັດການແຫ່ຂະບວນປະທ້ວງ ຢູ່ໃຈກາງນະຄອນກາຍໂຣ ເຊິ່ງແມ່ນສະຖານທີ່ທີ່ຕຳຫຼວດ ແລະ ກອງທັບເວັ້ນຍາມຢ່າງເຄັ່ງຄັດ. ກ່ອນຈຸດເວລາທີ່ດຳເນີນການແຫ່ຂະບວນປະທ້ວງນີ້, ກອງທັບ ແລະ ຕຳຫຼວດໄດ້ຖືກຕັ້ງໃນສະພາວະສຸກເສີນ. ຕຳຫຼວດສະເພາະກິດ ແລະ ກຳລັງປ້ອງກັນຄວາມສະຫງົບສູນກາງ ໄດ້ຮັບການຜັນຂະຫຍາຍເປັນຈຳນວນຫຼາຍຢູ່ອ້ອມສະໜາມຫຼວງ Talaat Harb, ຫ່າງຈາກສະໜາມຫຼວງ Tahrir ຢູ່ນະຄອນຫຼວງ ກາຍໂຣ ປະມານ 1 ກມ. ໃນຂະນະນັ້ນ, ກຳລັງທະຫານ ແລະ ລົດຫຸ້ມເກາະສືບຕໍ່ຮັກສາບັນດາເສັ້ນທາງພາໄປເຖິງສະໜາມຫຼວງ Tahrir ເພື່ອແນໃສ່ສະກັດກັ້ນບັນດາຜູ້ສະໜັບສະໜູນທ່ານ Morsi ຢືດເອົາສະຖານທີ່ທີ່ມີລັກສະນະສັນຍາລັກນີ້.