(vovworld) - ຕອນຄໍ່າວັນທີ 19 ສິງຫາ, ພັກປະຊາຊົນກຳປູເຈຍ (CPP) ກຳອຳນາດຂອງທ່ານນາຍົກລັດຖະມົນຕີ Hun Sen ໄດ້ອອກຖະແຫຼງປະຕິເສດບັນດາຄຳກ່າວຫາຂອງພັກກູ້ຊາດກຳປູເຈຍ (CNRP) ຝ່າຍຄ້ານ ໂດຍຖືວ່າ CPP ໄດ້ຮ່ວມມືກັບຄະນະກຳມະການເລືອກຕັ້ງແຫ່ງຊາດ NEC ເພື່ອສໍ້ໂກງການເລືອກຕັ້ງ. ຖະແຫຼງການຊີ້ແຈ້ງວ່າ “ມີບາງຂໍ້ກ່າວຫາໂດຍຖືວ່າ CPP ໄດ້ຮ່ວມມືກັບ NEC ເພື່ອສໍ້ໂກງການເລືອກຕັ້ງແມ່ນບັນດາຂໍ້ກ່າວຫາບໍ່ມີຫຼັກຖານ ແລະ ຕັ້ງໃຈເຮັດໃຫ້ຫາງສຽງເຂົ້າໃຈຜິດກ່ຽວກັບວິວັດການເລືອກຕັ້ງຢູ່ກຳປູເຈຍ. CPP ຕັດສິນໃຈປະຕິເສດບັນດາຂໍ້ກ່າວຫາດັ່ງກ່າວ”. ຖະແຫຼງການດັ່ງກ່າວໄດ້ຍົກອອກມາພາຍຫຼັງ CNRP ຂອງຜູ້ນຳພັກຝ່າຍຄ້ານ Sam Rainsy ໄດ້ອອກຄຳກ່າວຫາຢ່າງລຽນຕິດວ່າ NEC ຖືກ CPP ຄວບຄຸມ ແລະ ສໍ້ໂກງບັດເລືອກຕັ້ງໃຫ້ແກ່ CPP ໃນການເລືອກຕັ້ງສະພາແຫ່ງຊາດກຳປູເຈຍ ຊຸດທີ 5 ໃນວັນທີ 28 ກໍລະກົດ ຜ່ານມາ. ຕາມໝາກຜົນເບືອງຕົ້ນແຫ່ງການເລືອກຕັ້ງ, CPP ຍາດໄດ້ 68 ໃນຈຳນວນ 123 ທີ່ນັ່ງໃນສະພາແຫ່ງຊາດ, ໃນຂະນະທີ່ CNRP ຍາດໄດ້ 55 ທີ່ນັ່ງ ທີ່ຍັງເຫຼືອ. ແຕ່ CNRP ບໍ່ຍອມຮັບໝາກຜົນການເລືອກຕັ້ງ ແລະຖືວ່າ ມີບັນດາການລະເມີດໃນວິວັດການເລືອກຕັ້ງ. CNRP ຍັງຖືວ່າ ພັກນີ້ຈະຍາດໄດ້ 63 ທີ່ນັ່ງ, ສ່ວນ CPP ຍາດໄດ້ພຽງ 60 ທີ່ນັ່ງ ຖ້າຫາກຄະນະກຳມະການສືບສວນເອກະລາດໄດ້ຮັບການສ້າງຕັ້ງ ເພື່ອກວດກາບັນດາຄຳກ່າວຫາລະເມີດໃນການເລືອກຕັ້ງ. ແຕ່ວ່າ, CPP ຄັດຄ້ານຄວາມຮຽກຮ້ອງຂອງ CNRP ແລະ ຊີ້ແຈ້ງວ່າ ບໍ່ສາມາດສ້າງຕັ້ງຄະນະສືບສວນການເລືອກຕັ້ງໃດໆ ຖ້າບໍ່ມີການເຂົ້າຮ່ວມຂອງ NEC ຍ້ອນລະເມີດກົດໝາຍຂອງກຳປູເຈຍ. ທ່ານນາຍົກລັດຖະມົນຕີ Hun Sen ຢືນຢັນວ່າ ສະພາແຫ່ງຊາດ ແລະ ລັດຖະບານໃໝ່ຍັງຄົງຈະໄດ້ຮັບການສ້າງຕັ້ງຂຶ້ນຕາມກົດໝາຍ ໂດຍບໍ່ຫົວຊາຕໍ່ການຄັດຄ້ານຂອງພັກຝ່າຍຄ້ານ.