ພາບປະກອບ
|
(vovworld) – ພັດທະນາການພົວພັນຮ່ວມມືມິດຕະພາບ ຫວຽດນາມ - ຈີນ ເພື່ອສັນຕິພາບ, ສະຖຽນລະພາບ ແລະ ຄວາມວັດທະນາຖາວອນ - ນັ້ນແມ່ນຫົວຂໍ້ບົດຂຽນຂອງທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຫວຽດນາມ ຟ້າມບິ່ງມີງ ເນື່ອງໃນໂອກາດສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ຈີນ. ພາຍຫຼັງທົບທວນຄືນບັນດາຂີດໝາຍປະທັບໃຈໃນການພົວພັນຮ່ວມມືມິດຕະພາບ ຫວຽດນາມ - ຈີນ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟ້າມບິ່ງມີງ ຢັ້ງຢືນວ່າ: ປີ 2015 - ເຊິ່ງແມ່ນປີສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ - ແມ່ນໂອກາດທີ່ດີເພື່ອໃຫ້ 2 ຝ່າຍພ້ອມກັນທົບທວນຄືນໄລຍະຜ່ານມາ ແລະ ພ້ອມກັນມຸ່ງໄປເຖິງໄລຍະໃໝ່ໃນການພົວພັນ 2 ປະເທດ. ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ຖືເປັນສຳຄັນການພົວພັນມິດຕະພາບ, ການຮ່ວມມືສະເໝີພາບທີ່ຕ່າງຝ່າຍຕ່າງມີຜົນປະໂຫຍດກັບ ຈີນ, ປາດຖະໜາວ່າການພົວພັນຄູ່ຮ່ວມມື, ຮ່ວມມືຍຸດທະສາດຮອບດ້ານ ຫວຽດນາມ - ຈີນ ນັບມື້ນັບພັດທະນາກ້າວເຂົ້າສູ່ລວງເລິກ, ສະຖຽນລະພາບ, ໝັ້ນຄົງ. ບັນດາກະຊວງ, ຂະແໜງການ ແລະ ທ້ອງຖີ່ນ 2 ປະເທດຄວນພ້ອມກັນມານະພະຍາຍາມປະຕິບັດໂຄງການເຄື່ອນໄຫວຜັນຂະຫຍາຍການພົວພັນຄູ່ຮ່ວມມື, ການຮ່ວມມືຍຸດທະສາດຮອບດ້ານ ຫວຽດນາມ - ຈີນ, ຕອບສະໜອງຄວາມມຸ່ງມາດປາດຖະໜາ ແລະ ນຳມາເຊິ່ງຜົນປະໂຫຍດໃຫ້ແກ່ປະຊາຊົນ 2 ຝ່າຍ. ເພື່ອປັບປຸງພື້ນຖານໝັ້ນຄົງໃຫ້ແກ່ການພົວພັນ 2 ປະເທດ, 2 ຝ່າຍຄວນຕັ້ງໜ້າມີການເຄື່ອນໄຫວແທດຈິງຫຼາຍຢ່າງເພື່ອແນໃສ່ເພີ່ມທະວີນ້ຳໃຈມິດຕະພາບທີ່ເປັນມູນເຊື້ອລະຫວ່າງ ປະຊາຊົນ 2 ປະເທດ, ພິເສດແມ່ນລຸ້ນໜຸ່ມ 2 ປະເທດ.
ຄຽງຄູ່ກັນນັ້ນ, 2 ຝ່າຍຄວນປະຕິບັດຄວາມຮັບຮູ້ລວມສຳຄັນຂອງການນຳຂັ້ນສູງ 2 ພັກ, 2 ລັດ ແລະ “ຂໍ້ຕົກລົງກ່ຽວກັບບັນດາຫຼັກການພື້ນຖານຊີ້ນຳແກ້ໄຂບັນຫາບົນທະເລ ຫວຽດນາມ - ຈີນ”, ຊຸກຍູ້ບັນດາກົນໄກເຈລະຈາກ່ຽວກັບບັນຫາບົນທະເລບົນພື້ນຖານກົດໝາຍສາກົນ. ມ້ວນທ້າຍບົດຂຽນ, ທ່ານຮອງນາຍົກລັດຖະມົນຕີ ຟ້າມບິ່ງມີງ ເນັ້ນໜັກວ່າ: ສັນຕິພາບ, ສະຖຽນລະພາບ ແລະ ການພັດທະນາແມ່ນຄວາມມຸ່ງມາດປາດຖະໜາ ແລະ ຜົນປະໂຫຍດລວມຂອງທັງ 2 ຊາດ.