(vovworld) - ວັນທີ 12 ຕຸລາ, ຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ ສສ ຫວຽດນາມ, ປະທານປະເທດ ສສ ຫວຽດນາມ, ລັດຖະບານ ສສ ຫວຽດນາມ ໄດ້ຈັດພິທີງານສົບພົນເອກຫວໍຫງວຽນຢາບຕາມ ພິທີສະການລະດັບຊາດ ຢູ່ຫໍສົບແຫ່ງຊາດ ເຈີນແທງຕົງ, ຮ່າໂນ້ຍ, ກ່າວຄຳເຫັນເລີ່ມພິທີຢ່າງເປັນທາງການ, ທ່ານຮອງນາຍົກລັດຖະມົນຕີ ຫງວຽນຊວນຟຸກ, ຫົວໜ້າຄະນະຈັດຕັ້ງພິທີງານສົບ ພົນເອກຫວໍງວຽນຢາບ ເນັ້ນໜັກວ່າ.
“ໃນຕະຫຼອດຊີວິດແຫ່ງການປະຕິວັດກວ່າ 80 ປີ, ພົນເອກໄດ້ມີການປະກອບສ່ວນຢ່າງໃຫຍ່ຫຼວງໃຫ້ແກ່ພາລະກິດປະຕິວັດຂອງພັກ ແລະ ຊາດ, ເປັນລູກສິດທີ່ດີເດັ່ນ ແລະ ໃກ້ຊິດຂອງປະທານໂຮ່ຈິມິນ, ແມ່ນພົນເອກຜູ້ທຳອິດ ແລະ ເປັນຜູ້ບັນຊາການສູງສຸດຂອງກອງທັບປະຊາຊົນຫວຽດນາມ. ພົນເອກໄດ້ຮັບການເຄົາລົບນັບຖືຈາກປະຊາຊົນ ແລະ ເພື່ອນມິດສາກົນ, ແມ່ນຄວາມເອກອ້າງຖະນົງໃຈຂອງພະນັກງານ, ນັກຮົບລຸ່ນຕ່າງໆໃນທົ່ວກອງທັບ. ພົນເອກໄດ້ຮັບຫຼຽນໄຊດາວຄຳ, ຫຼຽນໄຊ ໂຮ່ຈິມິນ, ຫຼຽນກາ 70 ປີທີ່ເປັນສະມາຊິກພັກ ແລະ ບັນດາຫຼຽນໄຊ, ຫຼຽນກາສູງສົ່ງອື່ນໆຈາກພັກ ແລະ ລັດ. ພົນເອກລ່ວງລັບໄປການສູນຄວາມເສຍຢ່າງໃຫຍ່ຫຼວງສຳລັບພັກ, ລັດ, ປະຊາຊົນ ແລະ ກອງທັບຫວຽດນາມ.”
(ທ່ານເລຂາທິການໃຫຍ່ຄະນະບໍລິຫານງານສູນກາງພັກ ຫງວຽນຟຸ໋ຈ້ອງ
ນຳໜ້າຄະນະຜູ້ແທນ ເຂົ້າວາງພວງມາລາອາເຖິງດວງວິນຍານພົນເອກຫວໍງວຽນຢາບ)
ພາຍຫຼັງຄຳເຫັນຂອງທ່ານຮອງນາຍົກລັດຖະມົນຕີ ຫງວຽນຊວນຟຸກ, ຄະນະຜູ້ແທນຄະນະບໍລິຫານງານສູນກາງພັກກອມມູນິດຫວຽດນາມ ໂດຍທ່ານເລຂາທິການໃຫຍ່ຄະນະບໍລິຫານງານສູນກາງພັກ ຫງວຽນຟຸ໋ຈ້ອງ ນຳໜ້າ; ຄະນະປະທານປະເທດ ສສ ຫວຽດນາມ ໂດຍທ່ານປະທານປະເທດ ເຈືອງເຕີນຊາງ ນຳໜ້າ; ຄະນະຜູ້ແທນສະພາແຫ່ງຊາດ ໂດຍທ່ານປະທານສະພາແຫ່ງຊາດ ຫງວຽນຊິງຮຸ່ງ ເປັນຫົວໜ້າຄະນະ; ຄະນະຜູ້ແທນລັດຖະບານໂດຍທ່ານນາຍົກລັດຖະມົນຕີ ຫງວຽນເຕີນຢຸງ ເປັນຫົວໜ້າຄະນະ, ຄະນະຜູ້ແທນຄະນະກຳມະການສູນກາງແນວໂຮມປະເທດຊາດຫວຽດນາມ ໂດຍທ່ານ ຫວູຈ້ອງກິມ, ຮອງປະທານ ທັງເປັນເລຂາທິການໃຫຍ່ຄະນະກຳມະການແນວໂຮມປະເທດຊາດຫວຽດນາມ ນຳໜ້າໄດ້ເຂົ້າໄຫວ້ອາໄລຕາມລຳດັບ. ບັນດາຄະນະຜູ້ແທນລ້ວນແຕ່ສະຫງວນເວລາ 1 ນາທີ່ເພື່ອໄຫວ້ອາໄລ ພົນເອກ ຫວໍງວຽນຢາບ.
(ທ່ານປະທານປະເທດ ເຈືອງເຕີນຊາງນຳໜ້າຄະນະຜູ້ແທນ
ໄຫວ້ອາໄລພົນເອກຫວໍງວຽນຢາບ)
ໃນປື້ມສະມຸດໄຫວ້ອາໄລທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸ໋ຈ້ອງ, ທ່ານປະທານປະເທດ ເຈືອງເຕີນຊາງ, ທ່ານນາຍົກລັດຖະມົນຕີ ຫງວຽນເຕີນຢຸງ ລ້ວນແຕ່ສະແດງຄວາມໂສກເສຍດາຍຕໍ່ພົນເອກ ຫວໍງວຽນຢາບ, ການນຳທີ່ມີອິດທິພົນຊື່ສຽງຂອງພັກ, ລັດ ແລະ ປະຊາຊົນຫວຽດນາມ, ແມ່ນລູກສິດທີ່ດີເດັ່ນ ແລະ ໃກ້ຊິດຂອງປະທານໂຮຈິມິນ, ເປັນອ້າຍກົກຂອງກອງທັບປະຊາຊົນຫວຽດນາມ ວິລະຊົນ. ບັນດາການນຳພັກ, ລັດ ລ້ວນແຕ່ຢືນຢັນວ່າ ພົນເອກໄດ້ມີການປະກອບສ່ວນຢ່າງໃຫຍ່ຫຼວງຕໍ່ພາລະກິດປະຕິວັດຂອງພັກ ແລະ ຊາດ, ພົນເອກແມ່ນແບບຢ່າງຄຸນສົບບັດອັນສົດໃສ, ເປັນແບບຢ່າງ, ສະຫງວນຕະຫຼອດຊີວິດຂອງຕົນໃຫ້ແກ່ພັກ, ປະຊາຊົນ ແລະ ປະເທດຊາດ. ຊື່ສຽງຂອງທ່ານພົນເອກ ຈະໄດ້ຮັກສາໄວໃນປະຫວັດສາດຂອງຊາດຕະຕະຫຼອດໄປ, ແມ່ນສັນຍາລັກທີ່ດີເດັ່ນຂອງລັດທິວິລະຊົນປະຕິວັດຫວຽດນາມ. ຕໍ່ໜ້າດວງວິນຍານພົນເອກ, ບັນດາການນຳພັກ, ລັດ ໝັນໝາຍຈະພ້ອມກັບທົ່ວພັກ, ທົ່ວກອງທັບ ແລະ ທົ່ວປວງຊົນຮ່ວມແຮງຮ່ວມໃຈ, ກໍ່ສ້າງພັກໃຫ້ປອດໄສ, ໝັ້ນຄົງເຂັ້ມແຂງ, ປົກປັກຮັກສາປະເທດຫວຽດນາມ ສັງຄົມນິຍົມ ຢ່າງໝັ້ນຄົງ.
(ທ່ານນາຍົກລັດຖະມົນຕີ ຫງວຽນເຕີນຢຸງ
ນຳໜ້າຄະນະຜູ້ແທນເຂົ້າວາງພວງມາລາອາເຖິງດວງວິນຍານພົນເອກຫວໍງວຽນຢາບ)
(ທ່ານປະທານສະພາແຫ່ງຊາດ ຫງວຽນຊິງຮຸ່ງ
ນຳໜ້າຄະນະຜູ້ແທນໄຫວ້ອາໄລພົນເອກຫວໍງວຽນຢາບ)
ແລະກໍ່ໃນຕອນເຊົ້າວັນດຽວກັນ, ຄະນະຜູ້ແທນຄະນະພັກການທະຫານສູນກາງ ແລະ ກະຊວງປ້ອງກັນປະເທດ; ບັນດາອະດີດການນຳຂັ້ນສູງຂອງພັກ ໄດ້ເຂົ້າວາງພວງມາລາດວງວິນຍານພົນເອກ ຫວໍງວຽນຢາບ; ອົງຄະນະພັກຕຳຫຼວດສູນກາງ ແລະ ກະຊວງຕຳຫຼວດ, ຄະນະພັກນະຄອນ, ສະພາປະຊາຊົນ, ຄະນະກຳມະການປະຊາຊົນ ຄະນະກຳມະການແນວໂຮມປະເທດຊາດນະຄອນຮ່າໂນ້ຍ; ຄະນະອະດີດນັກຮົບຫວຽດນາມ ໄດ້ເຂົ້າວາງພວງມາລາດວງວິນຍານພົນເອກຫວໍງວຽນຢາບ.
ຕອນເຊົ້າວັນດຽວກັນ, ມີຄະນະຜູ້ແທນສາກົນ 4 ຄະນະ ເຂົ້າວາງພວງມາລາດວງວິນຍານພົນເອກຫວໍງວຽນຢາບ ລວມມີ: ຄະນະຜູ້ແທນພັກ, ລັດ ແລະ ກອງທັບ ສປປລາວ ໂດຍທ່ານ ເລຂາທິການໃຫຍ່, ປະທານປະເທດ ຈູມມາລີ ໄຊຍະຊອນ ນຳໜ້າ.
(ທ່ານ ເລຂາທິການໃຫຍ່, ປະທານປະເທດ ຈູມມາລີ ໄຊຍະຊອນ
ນຳໜ້າຄະນະຜູ້ແທນສປປລາວ ເຂົ້າວາງພວງມາລາດວງວິນຍານພົນເອກຫວໍງວຽນຢາບ)
ຄະນະຜູ້ແທນຂັ້ນສູງແຫ່ງລະຊະອານາຈັກກຳປູເຈຍ ໂດຍທ່ານປະທານພັກປະຊາຊົນກຳປູ້ເຈຍ, ປະທານສະພາແຫ່ງຊາດ Heng Samrin ນຳໜ້າ
ທ່ານປະທານພັກປະຊາຊົນກຳປູ້ເຈຍ, ປະທານສະພາແຫ່ງຊາດ Heng Samrin
ນຳໜ້າຄະນະຜູ້ແທນກຳປູເຈຍ ເຂົ້າວາງພວງມາລາດວງວິນຍານພົນເອກຫວໍງວຽນຢາບ)
ຄະນະຜູ້ແທນ Algeri ແລະ Mozambique ໂດຍຜູ້ຕາງໜ້າກະຊວງອະດີດນັກຮົບນຳໜ້າ. ຕອນເຊົ້າວັນທີ 12 ຕຸລາ, ມີເອກອັກຄະລັດຖະທູດ, ອຸປະທູດຕ່າງປະເທດເກືອບ 100 ທ່ານທີ່ຕາງໜ້າໃຫ້ບັນດາອົງການສາກົນ, ຄະນະຜູ້ແທນຊາວຫວຽດນາມ ອາໄສຢູ່ຕ່າງປະເທດ ໄດ້ເຂົ້າວາງພວງມາລາດວງວິນຍານພົນເອກ. ບັນດາຄະນະຜູ້ແທນມາຈາກກະຊວງ, ຂະແໜງການ, ທ້ອງຖິ່ນຕ່າງໆກໍ່ເຂົ້າໄຫວ້ອາໄລພົນເອກ.
(ພິທີງານສົບພົນເອກຫວໍງວຽນຢາບ
ຢູ່ຫໍປະຊຸມເອກະພາບນະຄອນໂຮ່ຈິມິນ) ກົງກັບເວລາທີ່ຈັດພິທີງານສົບພົນເອກຫວໍງວຽນຢາບ ຢູ່ຮ່າໂນ້ຍນັ້ນ, ຢູ່ສຳນັກງານຄະນະກຳມະການປະຊາຊົນແຂວງກວາງບິ່ງ, ບ້ານເກີດເມືອງນອນຂອງພົນເອກ ແລະ ຫໍປະຊຸມເອກະພາບນະຄອນໂຮ່ຈິມິນ ກໍ່ຄືບັນດາທ້ອງຖິ່ນອື່ນໆຄື: ຕວຽນກວາງ, ດ້ຽນບຽນ, ກາວບັ່ງ, ເກີນເທີ, ເມືອງເກາະເຈື່ຶອງຊາ (ແຄ໋ງຮ່ວາ) ກໍ່ດຳເນີນພິທີງານສົບພົນເອກ ເຊັນດຽວກັນ, ປະຊາຊົນຫຼາຍຄົນໄດ້ສະແດງຄວາມໂສກເສຍດາຍ, ເຄົາລົບ, ນັບຖືຕໍ່ເພີ່ນ. ເພື່ອນໜຸ່ມຜູ້ນຶ່ງ ຢູ່ຕາແສງ ເຕີນຈ່າວ (ແຂວງຕວຽນກວາງ) ໃຫ້ຮູ້ວ່າ.
ສຳລັບນ້ອງແລ້ວ, ອາລົມຈິດທີ່ມີຕໍ່ພົນເອກ ແມ່ນບໍ່ອາດເວົ້າສຸດຄວາມໄດ້, ນັ້ນແມ່ນຄວາມເຄົາລົບນັບຖື, ຄວາມຮູ້ບຸນຄຸນ. ພວກນ້ອງເປັນລຸ່ນໜຸ່ມ ບໍ່ທັນໄດ້ພົບກັບພົນເອກຈັກເທື່ອ, ພຽງແຕ່ຮູ້ຈັກບຸນຄຸນຂອງເພີ່ນຜ່ານການເລົ່າເລື່ອງຂອງພໍ່ແມ່ນ, ປຸ່ຍາ, ຕາຍາຍເທົ່ານັ້ນ. ນ້ອງໝັ້ນໝາຍວ່າ ຈະຈົດຈຳບຸນຄຸນຂອງພົນເອກ ແລະ ພະຍາຍາມຮໍ່າຳ່ຮຽນເພື່ອສ້າງສາບ້ານເກີດເມືອງນອນ”.
ອ້າຍ ໂຕດຶກວິງ, ຊາວຕາແສງ Ea Tam, ນະຄອນ ບວນມາທວດ (ແຂວງດັກລັກ) ແບ່ງປັນວ່າ.
“ຄອບຄົວຂ້າພະເຈົ້າ ໄດ້ພາລູກເຂົ້າໄຫວ້ອາໄລພົນເອກ. ຄອບຄົວຂ້າພະເຈົ້າໄດ້ສອນໃຫ້ລຸກຫຼານເຂົ້າໃຈກ່ຽວກັບວິລະກຳແຫງ່ການສູ້ຮົບຂອງພົນເອກ ກໍ່ຄືທະຫານລຸ່ງໂຮ່ ເພື່ອປົດປ່ອຍຊາດ”
ພົນເອກ ຫວໍງວຽນຢາບ, ອະດີດກຳມະການກົມການເມືອງ, ອະດີດເລຂາຄະນະພັກການທະຫານສູນກາງ, ອະດີດຮອງນາຍົກລັດຖະມົນຕີຜູ້ປະຈຳການລັດຖະບານ, ອະດີດລັດຖະມົນຕີກະຊວງປ້ອງກັນປະເທດ, ເລຂາທິການໃຫຍ່ກອງທັບປະຊາຊົນຫວຽດນາມ; ສະມາຊິກສະພາແຫ່ງຊາດແຕ່ຊຸດທີ 1 ຫາຊຸດທີ 7 ໄດ້ເຖິງແກ່ມໍລະນະກຳໃນວັນທີ 04 ຕຸລາ 2013, ອາຍຸຍື່ນ 103 ປີ.
ຄະນະກຳມະການພິທີງານສົບ ພົນເອກຫວໍງວຽນຢາບ ລວມມີ 30 ທ່ານ ໂດຍທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸ໋ຈ້ອງ ເປັນຫົວໜ້າຄະນະ. ເລີ່ມແຕ່ເວລາ 12 ໂມງ ວັນທີ 11 ຕຸລາ 2013, ບັນດາສຳນັກງານ, ບ່ອນສາທະລະນະຢູ່ຫວຽດນາມ ລ້ວນແຕ່ຊັກທຸງລົງເຄິ່ງເສົາ, ທຸກໆການລະຫຼີ້ນໄດ້ຢຸດຕິຊົ່ວຄາວຮອດເວລາ 12 ໂມງ ວັນທີ 13 ຕຸລາ 2013 ເພື່ອຕອນບຸນແທນຄຸນພົນເອກ.