(vovworld) - ຕອນເຊົ້າວັນທີ 20/11 ຕາມເວລາ New Delhi, ຢູ່ສຳນັກງານປະທານາທິບໍດີອີນເດຍ ໄດ້ດຳເນີນພິທີຕ້ອນຮັບທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ແລະ ຄະນະຜູ້ແທນຂັ້ນສູງຫວຽດນາມ ທີ່ມາຢ້ຽມຢາມທາງລັດຖະກິດອີນເດຍ ຢ່າງເປັນທາງການ ຕາມພິທີການສູງສຸດທີ່ສະຫງວນໃຫ້ປະມຸກລັດ. ທ່ານນາຍົກລັດຖະມົນຕີ ອີນເດຍ Manmohan Singh ເປັນເຈົ້າພາບພິທີຕ້ອນຮັບ.
(ທ່ານເລຂາທິການໃຫຍ່ ຫງວຽນຟຸຈ້ອງ
ຕ້ອນຮັບທ່ານລັດຖະມົນຕີການຕ່າງປະເທດອີນເດຍ Salman Khurshid)
ແລະກໍ່ໃນຕອນເຊົ້າວັນດຽວກັນ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ໃຫ້ການຕ້ອນຮັບທ່ານລັດຖະມົນຕີການຕ່າງປະເທດອີນເດຍ Salman Khurshid ເຂົ້າຢ້ຽມຂໍ່ານັບ ແລະ ລາຍງານກ່ຽວກັບລາຍການເຄື່ອນໄຫວຢ້ຽມຢາມຂອງທ່ານ. ທ່ານເລຂາທິການໃຫຍ່ ຫງວຽນຟຸຈ້ອງ ສະແດງຄວາມປິຕິຊົມຊື່ນເມື່ອໄດ້ກັບມາຢ້ຽມຢາມປະເທດອີນເດຍ ທີ່ສວຍງາມ, ຮັກແພງແຂກຄົນ; ຂອບໃຈຕໍ່ລັດຖະບານ ແລະ ປະຊາຊົນອິນເດຍ ທີ່ໄດ້ສະຫງວນໃຫ້ທ່ານ ແລະ ຄະນະຜູ້ແທນຂັ້ນສູງຫວຽດນາມ ການຕ້ອນຮັບຢ່າງສົມກຽດ, ຈິງໃຈ, ສຸດຈິດສຸດໃຈ ແລະ ເຊື່ອໝັ້ນວ່າການຢ້ຽມຢາມຈະໄດ້ຮັບຜົນສຳເລັດຢ່າງດີງາມ. ທ່ານເລຂາທິການໃຫຍ່ ຫງວຽນຟຸຈ້ອງ ຢືນຢັນວ່າ ບັນດາບາດກ້າວພັດທະນາອັນດີງາມລະຫວ່າງ 2 ປະເທດ ອີງບົນພື້ນຖານຄວາມໄວ້ເນື້ອເຊື່ອໃຈດ້ານການເມືອງ ແລະ ບັນດາຈຸດທີ່ຄ້າຍຄືກັນ, ເຫັນດີເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ເປີດກວ້າງການຮ່ວມມືໃນທຸກຂົງເຂດທີ່ມີຄວາມສາມາດບົມຊ້ອນຫຼາຍຢ່າງ, ເນັ້ນໜັກເຖິງການຖືເປັນສຳຄັນການຮ່ວມມືດ້ານເສດຖະກິດ, ການຄ້າ, ການລົງທຶນ, ການຮ່ວມມືປ້ອງກັນຊາດ, ປ້ອງກັນຄວາມສະຫງົບ. ທ່ານເລຂາທິການໃຫຍ່ ຕີລາຄາສູງໝາກຜົນຂອງກອງປະຊຸມຄັ້ງທີ 15 ຂອງຄະນະກຳມະການປະສົມຫວຽດນາມ - ອີນເດຍ ກ່ຽວກັບການຮ່ວມມືດ້ານເສດຖະກິດ, ການຄ້າ ແລະ ວິທະຍາສາດ ໂດຍທ່ານລັດຖະມົນຕີການຕ່າງປະເທດ 2 ປະເທດເປັນເຈົ້າການຈັດຕັ້ງໃນເດືອນ 07 ຜ່ານມາ; ປາດຖະໜາວ່າລັດຖະບານ, ບັນດາກະຊວງ, ຂະແໜງການ 2 ຝ່າຍມານະພະຍາຍາມຜັນຂະຫຍາຍ, ຊຸກຍູ້ບັນດາໝາກຜົນທີ່ບັນລຸໄດ້ໃນຂໍ້ຕົກລົງຂັ້ນສູງ, ລາຍການເຄື່ອນໄຫວປີ 2013 – 2015 ກໍ່ຄືບັນດາເອກະສານຮ່ວມມືທີ່ໄດ້ຮັບການລົງນາມໃນການຢ້ຽມຢາມຄັ້ງນີ້.
(ທ່ານເລຂາທິການໃຫຍ່ ຫງວຽນຟຸຈ້ອງ
ພົບປະເຈລະຈາກັບທ່ານນາງປະທານພັກຄອງເກດ Sonia Gandhi)
ໃນຕອນບ່າຍວັນທີ 20/11, ຢູ່ສຳນັກງານພັກຄອງເກດ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ມີການພົບປະເຈລະຈາກັບທ່ານນາງປະທານພັກຄອງເກດ Sonia Gandhi. ທ່ານເລຂາທິການໃຫຍ່ ເນັ້ນໜັກວ່າ ພັກກອມມູນິດຫວຽດນາມ ຖືເປັນສຳຄັນ ແລະ ປາດຖະໜາຢາກຍູ້ແຮງການຮ່ວມມືກັບພັກການເມືອງອີນເດຍ, ໂດຍສະເພາະແມ່ນພັກຄອງເກດ ທີ່ພວມຮັກສາບົດບາດສຳຄັນໃນລັດຖະບານຮ່ວມສຳພັນ, ຖືນັ້ນແມ່ນພື້ນຖານການເມືອງທີ່ສຳຄັນໃຫ້ແກ່ການພົວພັວລະຫວ່າງ 2 ປະເທດ; ສະເໜີວ່າ ໃນໄລຍະຈະມາເຖິງ, 2 ພັກຄວນເພີ່ມທະວີການແລກປ່ຽນຄະນະຜູ້ແທນ, ແບ່ງປັນບັດຮຽນໃນການກໍ່ສ້າງພັກ, ຄຸ້ມຄອງປະເທດ ແລະ ຮ່ວມມືຢູ່ບັນດາເວທີປາໄສຫຼາຍຝ່າຍຂອງພັກການເມືອງ. ທ່ານນາງປະທານ Sonia Gandhi ສະແດງຄວາມປາດຖະໜາຢາກເພີ່ມທະວີການພົວພັນລະຫວ່າງ 2 ພັກ, ຊຸກຍູ້ການພົບປະແລກປ່ຽນລະຫວ່າງບັນດາອົງການຈັດຕັ້ງມະຫາຊົນຂອງພັກ, ແລກປ່ຽນບົດຮຽນການການຊີ້ນຳ, ຄຸ້ມຄອງ ແລະ ເປັນພື້ນຖານການເມືອງໃຫ້ແກ່ການພົວພັນລະຫວ່າງ 2 ປະເທດ.
ແລະກໍ່ໃນວັນດຽກັນ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ມີການພົບປະເຈລະຈາກັບບັນດາການນຳອີນເດຍ ເຊິ່ງລວມມີທ່ານປະທານາທິບໍດີສ.ອີນເດຍ Pranab Mukherjee, ທ່ານຮອງປະທານາທິບໍດີ ທັງເປັນປະທານສະພາສູງ Mohammad Hamid Ansari.