(vovworld) – ວັນທີ 28/10, ຢູ່ນະຄອນຫຼວງ ນິວເດລີ, ດຳເນີນພິທີຕ້ອນຮັບທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ຢ້ຽມຢາມ ອິນເດຍ ຢ່າງເປັນທາງການ, ຕາມຄຳເຊື້ອເຊີນຂອງທ່ານນາຍົກລັດຖະມົນຕີ Narendra Modi. ພາຍຫຼັງ ພິທີຕ້ອນຮັບ, ນາຍົກລັດຖະມົນຕີ 2 ທ່ານດຳເນີນການເຈລະຈາ ແລະ ເປັນສັກຂີພິຍານພິທີເຊັນບັນດາຂໍ້ຕົກລົງຮ່ວມມື.
ກ່ອນໜ້ານັ້ນ, ໃນຂອບເຂດການຢ້ຽມຢາມ ອິນເດຍ ຢ່າງເປັນທາງການ, ວັນທີ 27/10, ຢູ່ນະຄອນຫຼວງ ນິວເດລີ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເຂົ້າຮ່ວມ ແລະ ກ່າວຄຳເຫັນທີ່ເວທີປາໄສການຄ້າ ແລະ ການລົງທຶນ ຫວຽດນາມ - ອິນເດຍ. ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ຫວຽດນາມ ຍາມໃດກໍ່ຖືການພົວພັນຄູ່ຮ່ວມມືຍຸດທະສາດກັບ ອິນເດຍ ແມ່ນບຸລິມະສິດໃນນະໂຍບາຍພົວພັນຕ່າງປະເທດຂອງປະເທດຊາດ. 2 ຝ່າຍພ້ອມກັນຕັດສິນໃຈບັນລຸຈຸດໝາຍເພີ່ມວົງເງິນການຄ້າຂຶ້ນເຖິງ 7 ຕື້ USD ໃນປີ 2015 ແລະ ຂຶ້ນເຖິງ 15 ຕື້ USD ໃນປີ 2020.
2 ຝ່າຍສືບຕໍ່ສົມທົບເພື່ອຜົນປະໂຫຍດລວມໃນບັນດາເວທີປາໄສເສດຖະກິດພາກພື້ນ ແລະ ສາກົນ, ສ້າງຕັ້ງເຂດການຄ້າເສລີ ອາຊຽນ - ອິນເດຍ, ເຈລະຈາສັນຍາຄູ່ຮ່ວມມືເສດຖະກິດຮອບດ້ານພາກພື້ນ. ທ່ານນາຍົກລັດຖະມົນຕີ ຫງວຽນເຕີນຢູ້ງ, ຢັ້ງຢືນວ່າ:
“ຫວຽດນາມ ພວມມານະພະຍາຍາມພ້ອມກັບບັນດາປະເທດສະມາຊິກປະຕິບັດສຳເລັດຈຸດໝາຍສ້າງປະຊາຄົມເສດຖະກິດ ອາຊຽນ ໃນປີ 2015. ຫວຽດນາມ ພ້ອມແລ້ວທີ່ເປັນຂົວເຊື່ອມຕໍ່ເພື່ອໃຫ້ບັນດາວິສາຫະກິດ ອິນເດຍເຊື່ອມຊຶມເຂົ້າຕະຫຼາດນີ້. ຫວຽດນາມ ຈະກາຍເປັນຕຳໂສ້ສຳຄັນຂອງເຄືອຂ່າຍຮ່ວມສຳພັນຕ້ານເສດຖະກິດຢ່າງກ້ວາງຂວາງກັບ 55 ປະເທດຄູ່ຮ່ວມມື, ໃນນັ້ນມີ 15 ປະເທດສະມາຊິກຂອງ G – 20. ພວກຂ້າພະເຈົ້າຫວັງວ່າ: ບັນດາວິສາຫະກິດ ອິນເດຍ ຈະ ມາ ຫວຽດນາມ ດຳເນີນທຸລະກິດ, ລົງທຶນ ແລະ ພ້ອມກັນແບ່ງປັນບັນດາຜົນປະໂຫຍດຂອງຕະຫຼາດ ຫວຽດນາມ ແລະ ກາລະໂອກາດສຳພັດກັບຕະຫຼາດ ບັນດາຄູ່ຮ່ວມມືຂອງ ຫວຽດນາມ.”
ທ່ານນາຍົກລັດຖະມົນຕີ ຫງວຽນເຕີນຢູ້ງ ກໍ່ສະເໜີວິສາຫະກິດ 2 ປະເທດຍູ້ແຮງການຮ່ວມມືລົງທຶນໃນຂົງເຂດເຕັກໂນໂລຢີຂໍ້ມູນຂ່າວສານ, ວິທະຍາສາດຊີວະພາບ, ຜະລິດກົນຈັກ, ເຄມີ, ການຢາ, ໄຟຟ້າ, ນ້ຳມັນອາຍແກັດ, ປຸງແຕ່ງຜະລິດຕະພັນກະເສດ - ສິນໃນນ້ຳ.
ແລະກໍ່ໃນວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ໃຫ້ການຕ້ອນຮັບການນຳບາງກຸ່ມບໍລິສັດອຸດສາຫະກຳອັນດັບໜຶ່ງຂອງ ອິນເດຍຄື: ກຸ່ມບໍລິສັດ TATA, ESSAR, Jet Airways… ແລະ ຢ້ຽມຢາມສະຖານທູດ ຫວຽດນາມ ປະຈຳ ອິນເດຍ.